ក្រសួងកសិកម្ម ដឹកនាំកម្លាំងអន្តរាគមន៍ ពាក់ព័ន្ធ និងរដ្ឋបាលជលផលបាត់ដំបង ចុះបង្ក្រាបបទល្មើសជលផល ក្នុងភូមិសាស្រ្តមួយចំនួន នៅខេត្តសៀមរាប និងខេត្តបាត់ដំបង
ភ្នំពេញ៖ កាលពីថ្ងៃទី៤ ខែសីហា ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខា ធិការ ក្រសួងកសិកម្ម រុក្ខាប្រមាញ់ និងនេសាទ ដឹកនាំកម្លាំងអន្តរាគមន៍ ពាក់ព័ន្ធ ចេញប្រតិបត្តិការបង្ក្រាបបទល្មើសជលផល ក្នុងភូមិសាស្រ្ត មួយចំនួន នៅខេត្តសៀមរាប និងខេត្តបាត់ដំបង។
ការចុះបង្ក្រាបនេះ មានការចូលរួមពីក្រុមអន្តរាគមន៍ថ្នាក់ជាតិទប់ស្កាត់ និងបង្រ្កាប បទ ល្មើសជលផលបឹងទន្លេសាបប្រចាំស្នាក់ការកំពង់ភ្លុក ដឹកនាំ ដោយ លោក កើត គា នាយអធិការដ្ឋានរដ្ឋបាលជលផលខាងជើងបឹងទន្លេសាប តំណាងរដ្ឋបាលជលផល និងសហការី លោកវរៈសេនីយ៍ឯក សេង សំអាត តំណាងកងរាជអាវុធហត្ថលើផ្ទៃប្រទេស លោកវរសេនីយ៍ត្រី រស់ សុផុនណេន តំណាងអគ្គស្នងការដ្ឋាននគរបាលជាតិ។
ដំណើរអនុវត្តការងារនោះ ក៏មានការចូលរួមសហការដឹកនាំពីកំលាំង ខណ្ឌ រដ្ឋបាលជលផលបាត់ដំបង ផ្នែករដ្ឋបាលជលផលព្រែកទាល់ សង្កាត់ រដ្ឋបាលជលផលកំពង់ប្រហុក និងសហគមន៍នេសាទអន្លង់តាអួ ដែលកំលាំងសរុបចំនួន២៧នាក់។
ប្រតិបត្តិការបង្រ្កាបដោយប្រើមធ្យោបាយកាណូតធំចំនួន០១គ្រឿង កាណូត ស្មាច់ចំនួន០៤គ្រឿង បានចេញត្រួតពិនិត្យ និងបង្រ្កាបបទ ល្មើស ចាប់ពីចំណុចមុខពាមមេជ្រៃ ស្ថិតក្នុងភូមិសាស្រ្តឃុំកែវពណ៍ ស្រុកពួក ខេត្ត សៀមរាប រហូតដល់ចំណុចមុខពាមព្រែកទាល់ ឃុំកោះជីវាំង ស្រុក ឯកភ្នំ ខេត្តបាត់ដំបង។
ជាលទ្ធផល មន្ដ្រីជំនាញនិងកងអន្តរាគមន៍ចម្រុះបានរុះរើ និងបំផ្លាញចោលនៅនឹងកន្លែង នូវឧបករណ៍ នេសាទ ល្មើសច្បាប់ របាំងសាច់អួនក្រឡាតូចជាង៣សង់ទីម៉ែត្រ បានចំនួន០២ ករណី រួមមាន៖ របាំងសាច់អួនក្រឡាញឹកចុះនួន ២៥របាំង ឡុកចំនួន ២៥ ឡុក បង្គោលចំរឹង ៣២០០ដើម និងបានចាក់លែងត្រីចំរុះចំនួន ៧០គីឡូក្រាម៕
