ឧត្តមសេនីយ៍ឯក ជីវ ផល្លី អញ្ជើញបិទវគ្គបណ្តុះបណ្តាលស្តីពី នីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ដល់មន្រ្តីនគរបាលជំនាញ នៃស្នងការដ្ឋាននគរបាលខេត្តតាកែវ

ភ្នំពេញ៖ នារសៀលថ្ងៃសុក្រ ១៤កើត ខែអាសាឍ ឆ្នាំរោង ឆស័ក ពុ​ទ្ធសករាជ ២៥៦៨ ត្រូវនឹងថ្ងៃទី១៩ ខែកក្កដា ឆ្នាំ២០២៤ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងតំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានអញ្ជើញជាអធិបតីក្នុងពិធីបិទវគ្គបណ្តុះបណ្តាលស្តីពី នីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ដល់មន្រ្តីនគរបាលជំនាញ នៃស្នងការដ្ឋាននគរបាលខេត្តតាកែវ។

ពិធីនេះក៏មានការអញ្ជើញចូលរួមពី លោកឧត្តមសេនីយ៍ វរសេនីយ៍ ជាប្រតិភូអមដំណើរ លោកឧត្តមសេនីយ៍ទោ ឈាង ផាន់ណារ៉ា ស្នងការ នៃស្នងការដ្ឋាននគរបាលខេត្ត លោក លោកស្រី ឧត្តមសេនីយ៍ វរសេនីយ៍ ស្នងការរង លោកនាយការិយាល័យជំនាញពាក់ព័ន្ធ លោកមេបញ្ជាការវរសេនាតូចនគរបាលការពារព្រំដែនគោកលេខ៦០៣ លោកអធិការ អធិការរង នៃអធិការដ្ឋាននគរបាលក្រុង ស្រុក លោកនាយប៉ុស្តិ៍ច្រកទ្វារទ្វេភាគីកំពង់ក្រសាំង លោកនាយប៉ុស្តិ៍ការពារព្រំដែនគោកទាំង១១ប៉ុស្តិ៍ លោកនាយប៉ុស្តិ៍នគរបាលរដ្ឋបាលឃុំសង្កាត់ទាំង ១០០ប៉ុស្តិ៍ សរុបចំនួន ១៦៦នាក់ ក្នុងនោះមានសិក្ខាកាមមកចូលរួមសិក្សាវគ្គបណ្តុះបណ្តាលខ្លីរយៈពេល ០២ថ្ងៃចំនួន ១៣៦នាក់ ស្រី ០១នាក់ ផងដែរ។

មានប្រសាសន៍សំណេះសំណាលណែនាំផ្តាំផ្ញើក្នុងឱកាសនោះ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ សូមកោតសរសើរ និងវាយតម្លៃខ្ពស់ចំពោះលោកឧត្តមសេនីយ៍ទោ ស្នងការនគរបាលខេត្ត ដែលបានបង្ករលក្ខណៈងាយស្រួលដល់ប្រតិភូយើងខ្ញុំ ព្រមទាំងលោកឧត្តមសេនីយ៍ត្រី ស្នងការរង តំណាងឲ្យសិក្ខកាមដែលបានរាយការណ៍បានយ៉ាងក្បោះក្បាយអំពីលទ្ធផល នៃការសិក្សារយៈពេលខ្លីនេះប្រកបដោយជោគជ័យទទួលបាននិទ្ទេសល្អ ល្អបង្គួរ និងមធ្យមគ្រប់ៗគ្នា ហើយត្រូវតែបន្តជម្រុញការផ្សព្វផ្សាយដល់សហគមន៍អំពីច្បាប់របស់អាជ្ញាធរមានសមត្ថកិច្ចពាក់ព័ន្ធ ខេត្ត ក្រុង ស្រុក ដើម្បីបង្ការទប់ស្កាត់បង្រ្កាបបទល្មើសរត់ពន្ធមនុស្ស ជួញដូរមនុស្សឆ្លងដែនដោយខុសច្បាប់ បន្តការចែករំលែកចំណេះដឹងបទពិសោធន៍ទៅដល់អ្នកដែលមិនទាន់ទទួលបានការបណ្តុះបណ្តាលសិក្សាអំពីនីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ។

ជាទីបញ្ចប់ ឯកឧត្តម ឧត្តមសេនីយ៍ឯក អគ្គស្នងការរងនគរបាលជាតិ បានទទួលយកសំណើរបស់លោកឧត្តមសេនីយ៍ទោ ស្នងការនគរបាលខេត្ត ស្នើសុំបើកវគ្គបណ្តុះបណ្តាល និងបំប៉នជំនាញវគ្គខ្លីបន្ថែមចំនួន ០២វគ្គទៀតគឺ វគ្គបណ្តុះបណ្តាលស្តីពី នីតិវិធីអនុវត្តច្បាប់យុត្តិធម៌ អនីតិជន និងវគ្គបណ្តុះបណ្តាលស្តីពីនីតិវិធីស៊ើបអង្កេត ប្រមូលភស្តុតាង សរសេរសំណុំរឿងបញ្ជូនទៅតុលាការនៅពេលខាងមុខនេះ ដល់មន្រ្តីនគរបាលជាតិ នៃស្នងការដ្ឋាននគរបាលខេត្តតាកែវ ដើម្បីប្រសិទ្ធភាពការងារប្រចាំថ្ងៃផងដែរ ៕