លោកជំទាវឧត្តមសេនីយ៍ឯក ជុំ ស៊ីណា ចុះត្រួតពិនិត្យវឌ្ឍន៍ភាពការងារយេនឌ័រ នៅទីបញ្ជាការយោធភូមិភាគទី១

ភ្នំពេញ៖ លោកជំទាវ ឧត្តមសេនីយ៍ឯក ជុំ ស៊ីណា អនុរដ្ឋលេខាធិការក្រសួងការពារជាតិ អនុប្រធានក្រុមការងារយេនឌ័រក្រសួង ការពាជាតិ នៅថ្ងៃទី១៨ ខែ កក្កដា ឆ្នាំ ២០២៤ បានដឹកនាំក្រុមការងារចុះពិនិត្យ វឌ្ឍន៍ភាពការងារយេនឌ័រ និង សួរសុខទុក្ខ យោធិននារី និង គ្រួសារកងទ័ព នៅទីបញ្ជាការយោធភូមិភាគទី១ ។

លោកជំទាវ ឧត្តមសេនីយ៍ឯក ជុំ ស៊ីណា បានពាំនាំការផ្តាំផ្ញើសាកសួរពីសំណាក់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ចំពោះបងប្អូនយុទ្ធនារីយើង និង បានថ្លែងនូវការកោតសរសើរចំពោះគំរូវីរភាពដ៏អង់អាចក្លាហានរបស់យុទ្ធនារីយើង ដែលមានមនសិការ ស្នេហាជាតិ ដ៏ខ្ពង់ខ្ពស់ ស្ម័គ្រចិត្តចូលបំរើក្នុងជួរកងទ័ព ពុះពាររាល់ការលំបាក និង ឧបស័គ្គនានា ដូចជាបុរសដែរ ដើម្បីបុព្វហេតុ ការពារបូរណភាពទឹក ការពារជាតិ សាសនា ព្រះមហាក្សត្រ រួមចំណែក អភិវឌ្ឍន៍ប្រទេសជាតិ រីកចំរើនលូតលាស់ជានិច្ចនិរន្តរ៍តរៀងទៅ ។

. លោកជំទាវ ឧត្តមសេនីយ៍ឯក បានផ្តាំផ្ញើដល់យុទ្ធនារីយើង៖ ត្រូវយកចិត្តទុកដាក់ខិតខំរៀនសូត្រ ក្រេបជញ្ជក់នូវចំណេះដឹងនានា ដើម្បីលើកកម្ពស់សមត្ថភាពខ្លួន ឲ្យទាន់សភាពការណ៍ វិវត្តន៍របស់សង្គមជាតិ និងសកលលោក ។ ខិតខំគោរពវិន័យរបស់កងទ័ព និងបទបញ្ជារបស់អង្គភាព ។ ត្រូវខិតខំបង្កបង្កើនផល ចិញ្ចឹមសត្វដោះស្រាយជីវភាពរស់នៅ ឲ្យបានសមរម្យ និង គ្រប់គ្រងថែរក្សា ក្រុមគ្រួសារ រស់នៅប្រកបដោយសុភមង្គល ៕