ឯកឧត្តម ងួន រតនៈ ថ្លែងអំណរគុណដល់កងកម្លាំងចម្រុះ ដែលបានរួមគ្នាយ៉ាងសកម្ម ក្នុងការ ការពារ ទប់ស្កាត់និងបង្ក្រាបបទល្មើសធនធានធម្មជាតិក្នុងខេត្តកំពង់ធំ

ភ្នំពេញ៖ នៅព្រឹកថ្ងៃទី៤ ខែកក្កដា ឆ្នាំ២០២៤ នៅសាលាខេត្តកំពង់ធំ បានរៀបចំពិធីប្រជុំបូកសរុបលទ្ធផលសកម្មភាពគ្រប់ គ្រង ការពារ ទប់ស្កាត់ និងបង្ក្រាបបទល្មើសធនធានធម្មជាតិនៅក្នុងភូមិសាស្ត្រខេត្តកំពង់ធំ ប្រចាំខែមិថុនា និងដាក់ចេញនូវទិសដៅបន្តសម្រាប់អនុវត្តប្រចាំខែកក្កដា ឆ្នាំ២០២៤ដែលកិច្ចប្រជុំនេះស្ថិតក្រោមអធិបតីភាពឯកឧត្តម ងួន រតនៈ អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្ត និងជាប្រធានគណៈកម្មការគ្រប់គ្រង ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ។

លោកវារសេនីយ៍ឯក សោម សុភាវុធ មេបញ្ជាការរង នាយសេនាធិការ និងជាក្រុមលេខាធិការដ្ឋាន នៃគណៈកម្មការ គ្រប់គ្រងការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានឡើងធ្វើរបាយការណ៍ ស្តីពីលទ្ធផលនៃការប្រើប្រាស់កម្លាំងសរុប ក្នុងការ ការពារ ទប់ស្កាត់និងបង្ក្រាបបទល្មើសធនធានធម្មជាតិក្នុងខែមិថុនា ឆ្នាំ២០២៤កន្លងទៅនិងទិសដៅមួយចំនួនដែលត្រូវអនុវត្តបន្តនៅក្នុងខែកក្កដា ឆ្នាំ២០២៤។

ឧត្តមសេនីយ៍ទោ សោម ស៊ុន ក្នុងនាមមេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានឡើងគូសបញ្ជាក់អំពីចំណុចខ្លាំង បញ្ហាប្រឈមនិងសំណូមពរមួយចំនួន ជូនអង្គប្រជុំ ក្នុងនោះដោយបានបញ្ជាក់ថា ក្នុងរយៈពេលជាងពីរខែកន្លងទៅនេះ យើងបានទប់ស្កាត់ និងបង្ក្រាបបាន មិនឲ្យមានការកាត់ទន្ទ្រានព្រៃឈើជាថ្មីនៅក្នុងភូមិសាស្ត្រខេត្តកំពង់ធំទាំងមូល ហើយជាមួយនោះក្រុមប្រតិបត្តិការដោយកងកម្លាំងចម្រុះ បានរកឃើញផ្ទៃដី ដែលបានកាប់ទន្ទ្រានរួចជាង ១.២០០ហិកតា មុនពេលកងកម្លាំងចម្រុះមកដល់ និងបានទប់ស្កាត់មិនឲ្យមានការដាំដុះនៅលើផ្ទៃដី ដែលបានកាប់ទន្ទ្រានដោយខុសច្បាប់កន្លងទៅ ដោយត្រូវចាត់វិធានការគ្រប់គ្រងផ្ទៃដីទាំងនេះ ឲ្យបានច្បាស់លាស់ ព្រមទាំងបានសំណូមពរដល់ស្ថាប័នជំនាញ និងអាជ្ញាធរដែនដី ត្រូវស្រាវជ្រាវរកមុខសញ្ញាជនល្មើសដើម្បីផ្ដន្ទាទោសតាមផ្លូវច្បាប់។

ឯកឧត្តម ងួន រតនៈ បានថ្លែងនូវការកោតសរសើរ ដល់កងកម្លាំងប្រដាប់អាវុធទាំងបី មន្ត្រីស្ថាប័នជំនាញ ដែលមានការពាក់ព័ន្ធ រួមជាមួយអាជ្ញាធរដែនដី ដែលបានសហការគ្នាល្អ ក្នុងកិច្ចប្រតិបត្តិការប្រើប្រាស់កម្លាំងសរុប វិធានការសរុប និងមធ្យោបាយសរុប ក្នុងការការពារ ទប់ស្កាត់ និងបង្ក្រាបទល្មើសធនធានធម្មជាតិ ក្នុងរយៈពេលពីរខែកន្លងទៅនេះ ទទួលបានលទ្ធផលល្អ និងបានប្រគល់ភារកិច្ចសំខាន់ៗមួយចំនួន ជូនកងកម្លាំងប្រដាប់អាវុធទាំងបី និងមន្ត្រីស្ថាប័នជំនាញពាក់ព័ន្ធ អាជ្ញាធរដែនដី ត្រូវបន្តយកចិត្តទុកដាក់អនុវត្តសកម្មភាព ការពារ ទប់ស្កាត់និងបង្ក្រាបបទល្មើសធនធានធម្មជាតិនេះ ឲ្យដូចភ្លៀងរលឹម ព្រមជាមួយនោះផងដែរ ត្រូវគ្រប់គ្រងផ្ទៃដី ដែលបានរកឃើញដោយជនល្មើសលួចកាប់ទន្ទ្រានកន្លងទៅ ឱ្យបានល្អ មិនឱ្យមានការបាត់បង់ទៅវិញ ហើយត្រូវអនុវត្តវិធានការច្បាប់យ៉ាងម៉ឺងម៉ាត់ចំពោះជនល្មើស។ ដោយឡែកត្រូវរៀបចំផែនការប្រើប្រាស់កម្លាំងសរុប ក្នុងការដាំដើមឈើលើផ្ទៃដី ដែលបានរកឃើញ ដើម្បីទុកជាសម្បត្តិធនធានធម្មជាតិរបស់ប្រជាជនកម្ពុជាយើងទាំងអស់គ្នា៕