ឯកឧត្តមរដ្ឋមន្ត្រី ឆាយ ឫទ្ធិសែន ដឹកនាំកិច្ចប្រជុំពិនិត្យលើរបាយការណ៍ស្ដីពី ការងារវិភាគមុខងារ និងតម្រូវការធនធានរបស់ក្រសួងអភិវឌ្ឍន៍ជនបទ

ភ្នំពេញ៖ នារសៀលថ្ងៃពុធ ៥រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៦ ខែមិថុនា ឆ្នាំ២០២៤ នៅទីស្ដីការក្រសួង ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំពិនិត្យលើរបាយការណ៍ស្ដីពី ការងារវិភាគមុខងារ និងតម្រូវការធនធានរបស់ក្រសួងអភិវឌ្ឍន៍ជនបទ ដោយអញ្ជើញជាវត្តមានពីសំណាក់ ឯកឧត្តម រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធាននាយកដ្ឋាន ព្រមទាំងថ្នាក់ដឹកនាំ និងក្រុមការងារនៃលេខាធិការដ្ឋានកែទម្រង់មុខងារសាធារណៈរបស់ក្រសួងអភិវឌ្ឍន៍ជនបទ។

ឯកឧត្តមរដ្ឋមន្ត្រី បានមានប្រសាសន៍ថា កិច្ចប្រជុំនេះរៀបចំឡើងដើម្បីពិនិត្យលើវឌ្ឍនភាពរបាយការណ៍លទ្ធផលនៃការវិភាគមុខងារ និងតម្រូវការធនធានរបស់ក្រសួង ក្នុងគោលបំណងធានាដល់ការបំពេញតួនាទី ភារកិច្ច ដើម្បីឆ្លើយតបទៅនឹងតម្រូវការរបស់ប្រជាពលរដ្ឋឱ្យមានប្រសិទ្ធភាព តាមរយៈការចាត់តាំងមន្ដ្រីឱ្យត្រូវតាមចំណេះដឹង ជំនាញបច្ចេកទេស និងមានចំនួនគ្រប់គ្រាន់ ស្របតាមគោលការណ៍កំណែទម្រង់រដ្ឋបាលសាធារណៈ។

ឯកឧត្តមរដ្ឋមន្ដ្រី បានបន្ដថា ក្រុមការងារកំណែទម្រង់មុខងារសាធារណៈរបស់ក្រសួង បានពិនិត្យឡើងវិញរាល់មុខងារទាំងអស់របស់អង្គភាពចំណុះក្រសួងអភិវឌ្ឍន៍ជនបទ ចាប់ពីកម្រិត អគ្គនាយកដ្ឋាន អគ្គាធិការដ្ឋាន នាយកដ្ឋាន និងកម្រិតមន្ទីរអភិវឌ្ឍន៍ជនបទរាជធានី ខេត្ត ដើម្បីកំណត់លទ្ធផលជាក់លាក់ ព្រមទាំងបានពិនិត្យផ្ទៀងផ្ទាត់ និងធ្វើបច្ចុប្បន្នភាពលើមុខងារគ្រប់អង្គភាព ធៀបនឹងវិសាលភាព នៃគោលនយោបាយរបស់ក្រសួងទាំងពេលបច្ចុប្បន្ន និងអនាគត ដើម្បីធានាឱ្យបាននូវការគ្របដណ្ដប់គ្រប់ជ្រុងជ្រោយ ស្របតាមបំណងប្រាថ្នាពិតប្រាកដរបស់ប្រជាជននៅតំបន់ជនបទ ឈានទៅចូលរួមសម្រេចឱ្យបាននូវគោលនយោបាយនៃយុទ្ធសាស្ត្របញ្ចកោណ និងកម្មវិធីកំណែទម្រង់នានារបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា ៕