នាយករដ្ឋមន្ដ្រីប្រកាសថា ខេត្តកំពត និងខេត្តកែប គឺមិនអនុញ្ញាតឲ្យចេញអាជ្ញាប័ណ្ណបើក កាស៊ីណូឡើយ
ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងប្រកាសថា ខេត្តកំពត និងខេត្តកែប គឺមិនអនុញ្ញាតឲ្យចេញអាជ្ញាប័ណ្ណបើក កាស៊ីណូ ឡើយ។
ក្នុងឱកាសអញ្ជើញជាអធិបតីសម្ពោធបើកឲ្យប្រើប្រាស់ជាផ្លូវការ «កំពង់ផែពហុបំណងកំពត» នៅថ្ងៃទី៦ មិថុនា សម្ដេចធិបតីមានប្រសាសន៍ថា “កន្លងទៅមានការស៊ើបសួរអំពីការស្នើសុំអាជ្ញាប័ណ្ណបើកកាស៊ីណូនៅខេត្តកំពត។ ខ្ញុំ សូមបញ្ជាក់ថា ការបើកកាស៊ីណូ កន្លងទៅយើងអនុញ្ញាតតែនៅច្រកព្រំដែន ហើយមានតែមួយទេនៅទីនេះ នៅបូកគោ។ ចឹងពីនេះទៅមុខ គឺក្រៅពីកន្លែងនេះ (បូកគោ) គឺមិនចេញអាជ្ញាប័ណ្ណសម្រាប់ធ្វើកាស៊ីណូ នៅក្នុងខេត្តកំពតទៀតទេ”។
សម្ដេចធិបតីបន្ដថា បើមានការចង់វិនិយោគខាងកាស៊ីណូ ត្រូវធ្វើនៅពំ្រដែន ក្នុងតំបន់ព្រែកចាក គឺមិនឆ្ងាយពីក្រុងឡើយ។ សម្ដេចថា ប៉ុន្តែប្រសិនបើចង់បើកសណ្ឋាគារ និងអូតែល នៅខេត្តទាំងពីរ គឺសម្តេចមិនហាមឃាត់នោះទេ ដោយអនុញ្ញាតឲ្យចេញអាជ្ញាបណ្ណ ព្រោះការបើកសណ្ឋាគារ និងអូតែល ដើម្បីលើកកម្ពស់វិស័យទេសចរណ៍។
សម្ដេចនាយករដ្ឋមន្ដ្រីបន្ថែមថា រាជរដ្ឋាភិបាល ទុកខេត្តកំពត និងខេត្តកែប សម្រាប់ឲ្យវិស័យទេសចរវិនិយោគ បើចង់ធ្វើការស៊ីណូ គឺធ្វើនៅព្រំដែន តំបន់ព្រែកចាក៕
