អភិបាលរងខេត្តស្ទឹងត្រែង៖ ឆមាសទី១ ឆ្នាំនេះ កម្លាំងជំនាញ បង្ក្រាបទីតាំងលេងល្បែងស៊ីសងខុសច្បាប់ ឃាត់អ្នកលេង ៤១នាក់
ភ្នំពេញ៖ លោក សែន វ៉ាន់ស៊ីម អភិបាលរងខេត្តស្ទឹងត្រែង បានថ្លែងឲ្យដឹងថា ក្នុងឆមាសទី១ ឆ្នាំ២០២៤នេះ កម្លាំងជំនាញ នៃស្នងការដ្ឋាននគរបាលខេត្ត បង្ក្រាបទីតាំងលេងល្បែងស៊ីសងខុសច្បាប់ បានធ្វើការឃាត់អ្នកលេង ល្បែងស៊ីសងខុសច្បាប់ចំនួន ៤១នាក់ ស្រី ៣៦នាក់ ។
ថ្លែងក្នុងកិច្ចប្រជុំស្ដីពីការពង្រឹងការគ្រប់គ្រងសណ្ដាប់ធ្នាប់សាធារណៈ និងក្មេងទំនើង ក្រោមអធិបតីភាពឯកឧត្ដម ស្វាយ សំអ៊ាង អភិបាលខេត្ត និងជាប្រធានគណៈបញ្ជាការឯកភាពរដ្ឋបាល ខេត្តស្ទឹងត្រែង នាព្រឹកថ្ងៃទី៥ ខែមិថុនា ឆ្នាំ២០២៤ លោកអភិបាលរងខេត្តស្ទឹងត្រែង បានមានប្រសាសន៍ថា «កម្លាំងជំនាញ នៃស្នងការដ្ឋាននគរបាលខេត្ត បង្ក្រាបទីតាំងលេងល្បែងស៊ីសងខុសច្បាប់ បានធ្វើការឃាត់អ្នកលេង ល្បែងស៊ីសងខុសច្បាប់ចំនួន ៤១នាក់ ស្រី ៣៦នាក់ ចាប់យកវត្ថុតាងរួមមានៈ ម៉ូតូ ៥៣គ្រឿង, រថយន្ត ១គ្រឿង, ទូរស័ព្ទដៃ ១៣គ្រឿង, សត្វមាន់ ៣៥ក្បាល កម្លាំងជំនាញ បានធ្វើការអប់រំ ណែនាំធ្វើកិច្ចសន្យា ឲ្យបញ្ឈប់លេងល្បែង ស៊ីសងឲ្យត្រឡប់ទៅលំនៅដ្ឋានវិញចំនួន ៧លើក មនុស្សចំនួន ៤១នាក់ ស្រី ២៦នាក់» ៕
