អង្គការនៃក្រុមប្រទេសនាំចេញប្រេង OPEC+ ព្រមព្រៀងគ្នាកាត់បន្ថយ ទិន្នផលប្រេងកាន់តែច្រើនថែមទៀត រហូតដល់ឆ្នាំ២០២៥
ឌូបៃ៖ អង្គការនៃក្រុមប្រទេសនាំចេញប្រេង OPEC+ បានព្រមព្រៀងគ្នាកាលពីថ្ងៃអាទិត្យទី២មិថុនា កាត់បន្ថយទិន្នផលប្រេងកាន់តែច្រើនថែមទៀត រហូតដល់ឆ្នាំ២០២៥។ នេះជាវិធានការដែលលើសពីការរំពឹងទុកកន្លងមក ខណៈក្រុមនេះព្យាយាមស្វែងរកការវាយលុកទីផ្សារ ចំពេលមានកំណើនតម្រូវការកើនឡើង អត្រាការប្រាក់ខ្ពស់ និងការកើនឡើងនៃផលិតកម្មរបស់សហរដ្ឋអាម៉េរិក។
តម្លៃប្រេងជួញដូរនៅក្បែរនឹង៨០ដុល្លារក្នុងមួយធុងបារ៉ែល ទាបជាងអ្វីដែលសមាជិក OPEC+ ជាច្រើនត្រូវការ ធ្វើឱ្យមានតុល្យភាពថវិការបស់ពួកគេ។ ការព្រួយបារម្ភអំពីកំណើនតម្រូវការយឺតក្នុងប្រទេសនាំចូលប្រេងកំពូលគឺប្រទេសចិន បានប៉ះពាល់លើតម្លៃជាមួយនឹងការកើនឡើងនៃស្តុកប្រេងនៅក្នុងប្រទេសអភិវឌ្ឍន៍។ អង្គការនៃប្រទេសនាំចេញប្រេង និងសម្ព័ន្ធមិត្តដែលដឹកនាំដោយប្រទេសរុស្ស៊ី រួមគ្នាហៅថា OPEC+ បានកាត់បន្ថយទិន្នផលជាបន្តបន្ទាប់ចាប់តាំងពីចុងឆ្នាំ២០២២។ បច្ចុប្បន្នសមាជិក OPEC+ កំពុងកាត់បន្ថយទិន្នផលសរុបចំនួន៥,៨៦លានបារ៉ែលក្នុងមួយថ្ងៃ (bpd) ឬប្រហែល៥,៧ភាគរយនៃតម្រូវការសកល។ ទាំងនេះរួមមាន៖ ការកាត់បន្ថយចំនួន ៣,៦៦លានបារ៉ែលក្នុងមួយថ្ងៃ ដែលនឹងត្រូវផុតកំណត់នៅចុងឆ្នាំ២០២៤ និងការកាត់បន្ថយដោយស្ម័គ្រចិត្តដោយសមាជិកប្រាំបីនៃចំនួន២,២លានបារ៉ែលក្នុងមួយថ្ងៃ នឹងផុតកំណត់នៅចុងខែមិថុនា ឆ្នាំ២០២៤។
កាលពីថ្ងៃអាទិត្យអង្គការ OPEC+ បានយល់ព្រមបន្តកាត់បន្ថយចំនួន៣,៦៦លានបារ៉ែល ក្នុងមួយថ្ងៃ សម្រាប់ពេលមួយឆ្នាំរហូតដល់ចុងឆ្នាំ២០២៥ និងពន្យារការកាត់បន្ថយចំនួន២,២លានបារ៉ែលក្នុងមួយថ្ងៃ សម្រាប់ពេលបីខែទៀត រហូតដល់ចុងខែកញ្ញាឆ្នាំ២០២៤។ រដ្ឋមន្ត្រីថាមពលអារ៉ាប៊ីសាអូឌីត ព្រះអង្គម្ចាស់ អាប់ឌុលឡាហ្សីស ប៊ីន សាល់ម៉ាន (Abdulaziz bin Salman) មានព្រះបន្ទូលប្រាប់អ្នកយកព័ត៌មានថា៖«នៅពេលនិយាយអំពីកំណើនសេដ្ឋកិច្ច យើងកំពុងរង់ចាំអត្រាការប្រាក់ធ្លាក់ចុះ និងប្រសើរជាងមុន»។ OPEC រំពឹងថាតម្រូវការប្រេងឆៅរបស់ OPEC+ នឹងមានជាមធ្យម៤៣,៦៥លានបារ៉ែលក្នុងមួយថ្ងៃ ក្នុងឆមាសទីពីរនៃឆ្នាំ២០២៤ បង្ហាញពីការធ្លាក់ចុះ២,៦៣លានបារ៉ែលក្នុងមួយថ្ងៃ ប្រសិនបើក្រុមនេះរក្សាទិន្នផលក្នុងអត្រា៤១,០២លានបារ៉ែលក្នុងមួយថ្ងៃ នៅខែមេសា។ ទីភ្នាក់ងារថាមពលអន្តរជាតិ ដែលតំណាងឱ្យអ្នកប្រើប្រាស់កំពូលៗលើពិភពលោក ប៉ាន់ប្រមាណថា តម្រូវការប្រេង OPEC+ បូកនឹងស្តុកទុកជាមធ្យមនឹងមានកម្រិតទាបជាង៤១,៩លានបារ៉ែលក្នុងមួយថ្ងៃ ក្នុងឆ្នាំ២០២៤។
អ្នកវិភាគជាច្រើនបានទស្សន៍ទាយថា ក្រុមនេះនឹងពិបាកក្នុងការកំណត់គោលដៅសម្រាប់ឆ្នាំ២០២៥ ព្រោះវាមិនទាន់បានយល់ព្រមពីសមាជិកនីមួយៗនៅឡើយ ហើយវាជាបញ្ហាដែលបានបង្កើតភាពតានតឹងពីមុនមក។ ជាឧទាហរណ៍ អេមីរ៉ាត់អារ៉ាប់រួម បាននិងកំពុងជំរុញឱ្យមានកូតាផលិតកម្មខ្ពស់ជាងមុន ដោយលើកហេតុផលថា តួលេខផលិតរបស់ខ្លួន គឺមិនគ្រប់កូតាជាយូរមកហើយ។ ផ្ទុយទៅវិញ ក្រុមនេះបានយល់ព្រមលើគោលដៅទិន្នផលថ្មីសម្រាប់អេមីរ៉ាត់អារ៉ាប់រួម ដែលនឹងត្រូវបានអនុញ្ញាតឱ្យបង្កើនផលិតកម្មបន្តិចម្ដងៗក្នុងចំនួន០,៣លានបារ៉ែលក្នុងមួយថ្ងៃ កើនឡើងពីកម្រិតបច្ចុប្បន្ន២,៩លាន។ សូមជម្រាបថា ក្រៅពីអេមីរ៉ាត់អារ៉ាប់រួម ប្រទេសដែលបានកាត់បន្ថយទិន្នផលដោយស្ម័គ្រចិត្តមាន អាល់ហ្សេរី អ៊ីរ៉ាក់ កាហ្សាក់ស្ថាន គុយវ៉ែត អូម៉ង់ រុស្ស៊ី អារ៉ាប៊ីសាអូឌីត និងអេមីរ៉ាត់អារ៉ាប់រួម។ OPEC+ នឹងបើកកិច្ចប្រជុំបន្ទាប់របស់ខ្លួននៅថ្ងៃទី១ ខែធ្នូ ឆ្នាំ២០២៤៕
