ផ្តើមពីភាពស្អាតចេញពីបេះដូង ប្រជាពលរដ្ឋនៅក្នុងឃុំមៀន បានចូលរួមក្នុង «យុទ្ធនាការកម្ពុជាស្អាត»
ភ្នំពេញ៖ បន្ទាប់ពី «យុទ្ធនាការកម្ពុជាស្អាត» នៅឃុំព្រះធាតុ គឺនៅនៅថ្ងៃនេះ បានចាប់ផ្តើមនៅឃុំមៀន ក្នុងស្រុកអូររាំងឪ ខេត្តត្បូងឃ្មុំ។ សិស្សានុសិស្ស លោកគ្រូអ្នកគ្រូ ព្រះសង្ឃ រួមជាមួយអាជ្ញាធរមូលដ្ឋាន ប្រជាការពារភូមិ យុវជន និងប្រជាពលរដ្ឋចំនួន ១,៦០០នាក់ បានចេញមកសម្អាតអនាម័យនៅជុំវិញផ្ទះ នៅតាមសាលារៀន វត្តអារាម និងមូលដ្ឋានទាំង១៤ភូមិ និងបានប្រមូលបានសំរាមសំណល់ប្លាស្តិកបានចំនួន ២តោន។
តាមរយៈ «យុទ្ធនាការកម្ពុជាស្អាត» ប្រជាពលរដ្ឋ ក្នុងឃុំមៀនបានប្រមូលសំរាមបានលើកឡើងពីការប្តេជ្ញាចិត្តចូលរួម សម្អាតបរិស្ថាន ដែលតម្រូវឱ្យមានការចូលរួម ដោយចំណាយពេលយ៉ាងតិច១០ទៅ១៥នាទីក្នុង១ថ្ងៃ ប្រមូលទុកដាក់សំរាមឱ្យបានត្រឹមត្រូវ។
ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានមានប្រសាសន៍ថា ក្រសួងបរិស្ថានបានបើកយុទ្ធនាការ «ថ្ងៃនេះខ្ញុំមិនប្រើថង់ប្លាស្ទិកទេ» កាលពីថ្ងៃទី១ ខែកញ្ញា ឆ្នាំ២០២៣។ រហូតមកដល់ពេលនេះ យុទ្ធនាការនេះមានការចូលរួមពីសំណាក់សិស្សានុសិស្ស និងប្រជាជនជាង ៨លាន អង្គ/នាក់ ដែលជាចំនួនលើសពីពាក់កណ្តាលនៃប្រជាជនកម្ពុជាសរុបទាំងអស់។ នេះសបញ្ជាក់ថា កម្ពុជាយើងបានទប់ស្កាត់ ការពារការប្រើប្រាស់ និងបោះចោលថង់ប្លាស្ទិកបានច្រើនជាងការបោះចោលទៅក្នុងទីសាធារណៈហើយ។ ដើម្បីជំរុញយុទ្ធនាការនេះឱ្យទទួលបានជោគជ័យមួយកម្រិតទៀត ក្រសួងបរិស្ថាន កំណត់យកថ្ងៃទី១៥ ខែឧសភា ឆ្នាំ២០២៤ ជាថ្ងៃបើកយុទ្ធនាការ «កម្ពុជាស្អាត ខ្មែរធ្វើបាន» ដែលជាយុទ្ធនាការបន្ត ហើយដើរទន្ទឹមគ្នាជាមួយយុទ្ធនាការ «ថ្ងៃនេះខ្ញុំមិនប្រើថង់ប្លាស្ទិកទេ»។
ឯកឧត្តមតដ្ឋមន្រ្តី បានបញ្ជាក់ថា យុទ្ធនាការ «កម្ពុជាស្អាត ខ្មែរធ្វើបាន» គឺជាយុទ្ធនាការសុំឱ្យសិស្សានុសិស្ស បងប្អូនប្រជាពលរដ្ឋមួយភូមិ ឬមួយឃុំ ឬមួយស្រុក ឬមួយខេត្តម្តង ចេញមកទាំងអស់គ្នារើសសំរាមជំវិញបរិវេណផ្ទះ សាលា វត្ត ទីសាធារណៈ ១៥នាទីរៀងរាល់ថ្ងៃសៅរ៍ ៕
