ភ្នំពេញ៖ សាកសព របស់ឯកឧត្ដម ជាវ តាយ រដ្ឋលេខាធិការក្រសួងមហាផ្ទៃ អតីតអភិបាលខេត្តពោធិ៍សាត់ និងខេត្តកំពត ត្រូវបានដង្ហែទៅបញ្ចុះ នាព្រឹកថ្ងៃទី៦ ខែឧសភា ឆ្នាំ២០២៤នេះ នៅភូមិកំណើត ស្ថិតក្នុងភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង បន្ទាប់ពីបានតម្កល់ធ្វើបុណ្យទក្ខិណានុប្បទានតាមប្រពៃណីជាតិ និងព្រះពុទ្ធសាសនា នៅគេហដ្ឋានសព ផ្ទះលេខ៣ ផ្លូវលេខ២៣៤ សង្កាត់ផ្សារដើមគរ ខណ្ឌទួលគោក រាជធានីភ្នំពេញ អស់រយៈពេល ៤ថ្ងៃកន្លងមក។
ពិធីដង្ហែ និងបញ្ចុះសពឯកឧត្ដម ជាវ តាយ មានការរួមពីឯកឧត្ដម ប្រាក់ សំអឿន រដ្ឋលេខាធិការក្រសួងមហាផ្ទៃ តំណាងឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ និងក្រុមគ្រួសារ សាច់ញាតិបងប្អូន កូនចៅនៃសព ព្រមទាំងថ្នាក់ដឹកនាំ តាមបណ្តាក្រសួង ស្ថាប័នមួយចំនួនទៀត។
គួរជម្រាបជូនថា ឯកឧត្ដម ជាវ តាយ បានទទួលមរណភាព នាថ្ងៃពុធ ៨រោច ខែចេត្រ ឆ្នាំរោង ឆស័ក ព.ស២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ ក្នុងជន្មាយុ ៥៧ឆ្នាំ វេលាម៉ោង ០១ និង០០នាទីរសៀល នៅមន្ទីរពេទ្យប្រទេសសិង្ហបុរី ដោយរោគាពាធ។
សពរបស់ឯកឧត្ដម ជាវ តាយ ត្រូវបានដឹកជញ្ជូន តាមជើងហោះហើរផ្ទាល់ ឆ្ពោះមកព្រលានយន្តហោះភ្នំពេញ ព្រមទាំងតម្កល់ធ្វើបុណ្យទក្ខិណានុប្បទានតាមប្រពៃណីជាតិ និងព្រះពុទ្ធសាសនា នៅគេហដ្ឋានសព ចាប់ពីថ្ងៃទី០៣ ខែឧសភា ឆ្នាំ២០២៤ នឹងត្រូវដង្ហែទៅបញ្ចុះនៅថ្ងៃចន្ទ ១៣រោច ខែចេត្រ ឆ្នាំរោង ឆស័ក ព.ស២៥៦៧ ត្រូវនឹងថ្ងៃទី០៦ ខែឧសភា ឆ្នាំ២០២៤នេះ នៅភូមិចាស់របស់ឯកឧត្ដម ស្ថិតក្នុងភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង។
ការបាត់បង់រូបឯកឧត្ដម ជាវ តាយ គឺជាការបាត់បង់នូវជីតា ស្វាមី ឪពុក ជាទីគោរពស្រលាញ់ ដ៏ឧត្តុង្គឧត្តម និងជាម្លប់ដ៏ត្រជាក់ដល់កូនចៅនាពេលកន្លងមក ក៏ដូចជាការបាត់បង់នូវឥស្សរជនដ៏ឆ្នើម ដែលបានលះបង់ និងចូលរួមចំណែកយ៉ាងសកម្ម ជាមួយរដ្ឋាភិបាល ក្នុងបុព្វហេតុដើម្បីបម្រើជាតិ មាតុភូមិ និងប្រជាជន ប្រកបដោយស្មារតីទទួលខុសត្រូវ៕
