នាយករដ្ឋមន្ត្រី ហ៊ុន ម៉ាណែត៖ សិល្បករ សិល្បការិនី ជាគំរូ ជាតួរអង្គមានឥទ្ធិពល លើមជ្ឈដ្ឋានផ្សេងៗ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា សិល្បករ សិល្បការិនី ជាគំរូ ជាតួរអង្គមានឥទ្ធិពល ទៅលើមជ្ឈដ្ឋានផ្សេង ជាពិសេសឧបករណ៍ផ្សព្វផ្សាយ តាមរយៈការសម្តែងដោយផ្ទាល់ ឬមិនផ្ទាល់ ការរក្សាបាននូវតម្លៃសិល្បវប្បធម៌ជាតិ និងតម្លៃផ្ទាល់ខ្លួនរបស់សិល្បករ សិល្បការិនី គឺពិតជាអាស្រ័យ លើសេចក្តីសម្រេចផ្ទាល់ខ្លួន របស់សិល្បករសិល្បការិនីទាំងអស់ ។
ក្នុងឱកាសអញ្ជើញពិសាអាហារសាមគ្គី និងបំពាក់គ្រឿងឥស្សរិយយសជូនលោកគ្រូ អ្នកគ្រូ សិល្បករ សិល្បការិនី នារសៀលថ្ងៃទី២៥ ខែមេសា ឆ្នាំ២០២៤នេះ នៅមជ្ឈមណ្ឌលសន្និបាត និងពិពរណ៍កោះពេជ្រ សម្តេចធិបតី ហ៊ុន ម៉ាណែត បានណែនាំ ឱ្យសិល្បករ សិល្បការិនីទាំងអស់ មុននឹងសម្រេចចិត្តធ្វើសកម្មភាពអ្វីមួយ ត្រូវប្រុងប្រយ័ត្ន នឹងត្រូវគិតគូឱ្យច្បាស់ ព្រោះការរក្សាបានតម្លៃសិល្បៈវប្បធម៌ជាតិ និងតម្លៃផ្ទាល់ខ្លួនរបស់អ្នកសិល្បៈ គឺអាស្រ័យលើសេចក្តីសម្រេចផ្ទាល់ខ្លួន របស់សិល្បករសិល្បការិនីទាំងអស់ ប្រសិនបើសម្រេចចិត្តមិនត្រឹមត្រូវ នឹងទទួលរងសម្ពាធពីសង្គម ។
សម្តេចធិបតី គូសបញ្ជាក់ថា ការសម្រេចចិត្តត្រឹមត្រូវ នឹងទទួលបានការគាំទ្រ ពីសំណាក់ទស្សនិកជន រីឯការសម្រេចចិត្តមិនត្រឹមត្រូវ នឹងទទួលបាននូវសម្ពាធសង្គម” ។
ទន្ទឹមគ្នានោះសម្តេចធិបតី ក៏បានណែនាំ ដល់សិល្បករ សិល្បការិនីទាំងអស់ថា មុននឹងជ្រើសរើស យកសកម្មភាពណាមួយ សិល្បករ សិល្បការិនីទាំងអស់ គួរប្រកាន់ខ្ជាប់ នូវគោលការណ៍ សិល្បធម៌ គុណធម៌ សច្ចធម៌ ទាំងសំណេរ ទាំងការប្រើប្រាស់ពាក្យពេចន៍ កាយវិការ សកម្មភាព ឥរិយាបទ ការស្លៀកពាក់ ដោយរក្សាឱ្យបាននូវភាពថ្លៃថ្នូ និងការចូលរួមលើកកម្ពស់ សិល្បធម៌សង្គម ដែលនឹងចូលរួម ដល់ការពង្រឹងនូវអត្តសញ្ញាណ និងកិត្យានុភាពជាតិ ៕
