ប្រមុខរាជរដ្ឋាភិបាល ចែករំលែកទស្សនទានមួយចំនួន ដល់សាកលវិទ្យាល័យការពារជាតិ ដើម្បីពង្រឹងការស្រាវជ្រាវ និងពង្រីកសមត្ថភាពកងទ័ព

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានចែករំលែកទស្សនទានមួយចំនួន ដល់សាកលវិទ្យាល័យការពារជាតិ ដើម្បីពង្រឹងការស្រាវជ្រាវ និងពង្រីកសមត្ថភាពកងទ័ព ជាពិសេសនាយទាហាន ឆ្លើយតបនឹងបច្ចេកវិទ្យាថ្មីៗនៃសង្គ្រាម ដែលកើតមាននៅលើពិភពលោក។

ក្នុងពិធីសម្ពោធដាក់ឱ្យប្រើប្រាស់អគារសហសិក្សា អគារស្នាក់នៅ និងអគារអាហារដ្ឋាននៅសាកលវិទ្យាល័យការពារជាតិ រួមជាមួយពិធីបិទវគ្គបណ្តុះបណ្តាល និងហ្វឹកហ្វឺនឆ្នាំ២០២៣ និងបើកវគ្គសិក្សាសម្រាប់ឆ្នាំ២០២៤ នៅថ្ងៃទី១៩ ខែមេសា ឆ្នាំ២០២៤នេះ សម្តេចធិបតី ហ៊ុន ម៉ាណែត បញ្ជាក់ថា «ព័ត៌មានឌីជីថល គឺជាបច្ចុប្បន្ន និងអនាគត យើងមិនចាំបាច់ស៊ើបការថ្មើរជើងប្រដាប់អាវុធទៀតទេ បញ្ជូនមួយក្រុមស៊ើបការទៅចូលទៅព្រៃជ្រៅពិបាក បើហើបតែដ្រូនឡើងលើបន្តិចឃើញ៥គីឡូទៅ១០គីឡូខាងក្នុង»។

សម្តេចបន្តថា ពិតណាស់ យើងមិនអាចចោលនូវជំនាញ ចំណេះដឹងមូលដ្ឋាន អត់អាចយកម៉ាស៊ីនគិតលេខមកហើយឈប់រៀនបូកលេខនោះទេ គឺគ្រឹះដដែលប៉ុន្តែយើងក៏មិនចោលនូវការប្រើប្រាស់បច្ចេកវិទ្យា អញ្ចឹងមហាវិទ្យាល័យបច្ចេកវិទ្យា មហាវិទ្យាល័យព័ត៌មានវិទ្យា ដើរតួនាទីសំខាន់ បន្ថែមលើជ្រុងបច្ចេកវិទ្យាបន្ថែមទៀត ដើម្បីជួយក្នុងការស្រាវជ្រាវ ។

សម្តេចធិបតី ក៏បានជំរុញឲ្យសកលវិទ្យាល័យការពារជាតិ ខិតខំពង្រឹងគុណវឌ្ឍយោធាចារ្យកម្ពុជា ដោយមានគ្រប់កម្រិត និងពង្រីកលទ្ធភាពយោធាចារ្យ ក្នុងការសិក្សាស្រាវជ្រាវលើផ្នែកយោធា។ សម្តេចក៏បានលើកឡើងដែរថា សាកលវិទ្យាល័យក៏ត្រូវកសាងឯកសារសម្រាប់ការរៀនសូត្រថែមទៀត ៕