ឯកឧត្តម ស្វាយ សំអ៊ាង និងឯកឧត្តម ឈាង ឡាក់ អញ្ជើញដឹកនាំលេងល្បែងប្រជាប្រិយ ក្នុងព្រឹត្តិការណ៍«សង្ក្រាន្តស្ទឹងត្រែង» នាឱកាសបុណ្យចូលឆ្នាំថ្មី ប្រពៃណីជាតិខ្មែរ
ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង និងឯកឧត្តម ឈាង ឡាក់ ប្រធានក្រុមប្រឹក្សាខេត្ត នៅព្រឹកថ្ងៃទី១៦ ខែមេសា ឆ្នាំ២០២៤ នេះ បានអញ្ជើញដឹកនាំលេងល្បែងប្រជាប្រិយ ក្នុងព្រឹត្តិការណ៍ «សង្ក្រាន្តស្ទឹងត្រែង» នាឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំរោង ឆស័ក.ព. ២៥៦៧។
បើយោងតាមឯកឧត្តម ស្វាយ សំអ៊ាង អភិបាលខេត្ត បានប្រាប់ អង្គភាព Hot News Asia ថា ក្នុងឱកាសបុណ្យចូលឆ្នាំថ្មី ឆ្នាំ២០២៤ ចាប់ពីថ្ងៃទី១៣-១៦ ខែមេសា ឆ្នាំ២០២៤ ក្នុងខេត្តស្ទឹងត្រែង មានភ្ញៀវទេសចរជាតិ និងអន្តរជាតិ រួមនិងប្រជាពលរដ្ឋសរុបចំនួន ១០៩,៦៣៤នាក់ កើនឡើង ៧៨,៨០% បើធៀបទៅនឹងឆ្នាំ២០២៣ ក្នុងនោះមានៈ
-ទេសចរជាតិតាមរមណីយដ្ឋាន ទេសចរអន្តរជាតិ ទេសចរជាតិស្នាក់នៅចំនួន ២៧,៥៩២នាក់ កើនឡើង ៥% ទេសចរអន្តរជាតិចំនួន ៤២នាក់ កើនឡើង ៥%
-ប្រជាជនដើរលេងកម្សាន្ត ៨២,០០០នាក់ កើនឡើង បើធៀបទៅនឹងឆ្នាំ២០២៣ មានត្រឹមតែជាង៣មុឺននាក់ប៉ុណ្ណោះ ។
ក្នុងឱកាសនោះ ឯកឧត្តម ស្វាយ សំអ៊ាង អភិបាលខេត្ត បានមានប្រសាសន៍ថា ប្រទេសយើងមានសុខសន្តិភាព ស្ថិរភាពនយោបាយល្អ ទើបយើងមានឱកាសរៀបចំ កម្មវិធីផ្សេងៗ ក៏ដូចជាការរៀបចំកម្មវិធីសង្ក្រាន្តស្ទឹងត្រែង និងតាមរមណីយដ្ឋាននានា តាមបណ្តាក្រុង-ស្រុក ហើយជាមួយគ្នានេះ ក៏មាននៅតាមទីវត្តអារាមទូទាំងខេត្តផងដែរ ។
ម្យ៉ាងវិញទៀត បងប្អូនប្រជាពលរដ្ឋ ពិសេស ក្មួយៗយុវជនរបស់យើង ដែលមានបំណងមកចូលរួមលេងសប្បាយរីករាយក្នុងឱកាសឈប់សម្រាកបុណ្យចូលឆ្នាំថ្មី ពិសេសក្នុងឱកាសដែលបងប្អូនប្រជាពលរដ្ឋ ក្មួយៗ ដែលរស់នៅទីជិតទីឆ្ងាយ មានឱកាសវិលត្រឡប់មកកាន់ស្រុកកំណើតជួបជុំក្រុមគ្រួសារមិត្តភ័ក្ត ចូលរួមអំណរបុណ្យចូលឆ្នាំថ្មីប្រពៃណីជាតិរបស់ខ្មែរយើង ។
ឯកឧត្តមអភិបាលខេត្ត បានយកឱកាសនេះ សូមកោតសរសើរដល់បងប្អូនប្រជាពលរដ្ឋ លើ០៤ចំណុច ដែលបានអញ្ជើញមកចូលរួមលេងសប្បាយ នៃសង្ក្រាន្តស្ទឹងត្រែង នាឱកាសបុណ្យចូលឆ្នាំថ្មីប្រពៃណីជាតិខ្មែរនេះ ដោយ៖
ទី១៖ សូមកោតសរសើរដល់បងប្អូនប្រជាពលរដ្ឋ ដែលបានអញ្ជើញចូលរួម មកកំសាន្តសប្បាយយ៉ាងច្រើនកុះករ នៅតាមរមណីយដ្ឋាននានា ក្នុងខេត្តស្ទឹងត្រែង ។
ទី២៖ សូមកោតសរសើរដល់បងប្អូនប្រជាពលរដ្ឋទាំងអស់ រួមជាមួយអាជ្ញាធរមានសមត្ថកិច្ច ដែលបានបង្កលក្ខណៈសប្បាយ និងរក្សានូវសន្តិសុខ សណ្ដាប់ធ្នាប់បានល្អ នៅតាមគ្រប់ទីកន្លែងដែលខ្លួនបានទៅកំសាន្តសប្បាយ ជាពិសេសបានរក្សានូវសេចក្តីថ្លៃថ្នូរ និងប្រពៃណីទំនៀមទម្លាប់របស់ខ្មែរយើង ។
ទី៣៖ សូមកោតសរសើរដល់បងប្អូនភ្ញៀវទេសចរណ៍ទាំងអស់ ដែលបានរក្សាអនាម័យយបានយ៉ាងល្អប្រសើរ នៅតាមទីកន្លែងរមណីយដ្ឋាននានា ដើម្បីបន្សល់ទុកនូវសោភ័ណភាព ដែលគណៈកម្មការបានរៀបចំជូន ។
ទី៤៖ សូមកោតសរសើរដល់អាជ្ញាធរមានសមត្ថកិច្ច ក៏ដូចជាកងកម្លាំងប្រដាប់អាវុធទាំងអស់ ដែលបានពង្រឹងលើការងាររក្សាសន្តិសុខសណ្ដាប់ធ្នាប់ នៅតាមទីរមណីយដ្ឋាន បានល្អប្រសើរ ដើម្បីបម្រើសេចក្តីត្រូវការ និងអ្វីដែលជាបំណងប្រាថ្នារបស់ប្រជាពលរដ្ឋ មកកំសាន្តសប្បាយ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលកន្លងផុតទៅថ្ងៃនេះ ។
ជាទីបញ្ចប់ ឯកឧត្តម ស្វាយ សំអ៊ាង អភិបាលខេត្ត ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ដែលបានមកកម្សាន្តនៅក្នុងខេត្តស្ទឹងត្រែង នាឱកាសបុណ្យចូលឆ្នាំថ្មី ប្រពៃណីជាតិខ្មែរនេះ សូមឲ្យបន្តមកកម្សាន្តនៅតាមរមណីយដ្ឋានទេសចរណ៍នៅក្នុងខេត្តទាំងមូលឲ្យបានច្រើនកកុះករថែមទៀត នាពេលខាងមុខ ៕
