ឯកឧត្តម សុខ ប្រសិទ្ធិ ទទួលជួបពិភាក្សាការងារជាមួយ ជំនួយការអគ្គនាយកវិទ្យាស្ថានយុទ្ធសាស្ត្រសេដ្ឋកិច្ចអន្តរជាតិ នៃប្រទេសចិន
ភ្នំពេញ៖ នៅរសៀលថ្ងៃទី២៩ ខែមេសា ឆ្នាំ២០២៤ ឯកឧត្តម សុខ ប្រសិទ្ធិ រដ្ឋលេខាធិការក្រសួងព័ត៌មាន បានទទួលជួបពិភាក្សាការងារជាមួយ លោក Shi Bin ជំនួយការអគ្គនាយកវិទ្យាស្ថានយុទ្ធសាស្ត្រសេដ្ឋកិច្ចអន្តរជាតិនៃសាធារណៈរដ្ឋប្រជាមានិតចិន ដែលមានការសម្របសម្រួលពីសមាគមកម្ពុជា-ចិន ទាក់ទាញអ្នកវិនិយោគ។
ឯកឧត្តម សុខ ប្រសិទ្ធិ បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនចិន ដែលតែងតែគាំទ្រជានិច្ចដល់ការជំរុញការអភិវឌ្ឍសេដ្ឋកិច្ច ពាណិជ្ជកម្ម និងទេសចរណ៍នៅ កម្ពុជា។ ឯកឧត្តមរដ្ឋលេខាធិការ បានរំលេចអំពីប្រវត្តិនៃទំនាក់ទំនងរវាងប្រទេសទាំងពីរ ដោយផ្តើមចេញពីចំណងមិត្តភាពជិតពីរពាន់ឆ្នាំ ដល់ការបង្កើតចំណងការទូតរហូតដល់ការក្លាយជា«មិត្តដែកថែប» និងឆ្ពោះទៅរកកិច្ចសហប្រតិបត្តិការត្បូងពេជ្រ។
ឯកឧត្តមរដ្ឋលេខាធិការ បានបញ្ជាក់ជូនអំពីទំនាក់ទំនងពាណិជ្ជកម្មរវាងប្រទេសទាំងពីរ បាននឹងកំពុងចូលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច និងការនាំចេញរបស់កម្ពុជា។
ទន្ទឹមនឹងនេះ ឯកឧត្តមរដ្ឋលេខាធិការ បានជម្រាបជូនអំពីសូចនករចំនួន០៥ របស់ក្រសួងព័ត៌មាន ក្នុងការត្រៀមខ្លួនសម្រាប់សេដ្ឋកិច្ចឌីជីថល និងឆ្លើយតបបដិវត្តឧស្សាហកម្ម ៤.០ រួមមាន៖ (១).ការផ្លាស់ប្តូរប្រព័ន្ធទូរទស្សន៍អាណាឡូកទៅ ឌីជីថល, (២).ការអភិវឌ្ឍវិស័យ ព័ត៌មាន, (៣).ការបណ្តុះបណ្តាលបច្ចេកទេស និងវិជ្ជាជីវៈសារព័ត៌មាន, (៤).សន្តិសុខព័ត៌មាន និងការប្រយុទ្ធប្រឆាំងព័ត៌មានក្លែងក្លាយ និង(៥).ការកសាងមូលដ្ឋានគតិយុត្តិ និងការពង្រឹងការអនុវត្តច្បាប់។
ដើម្បីចូលរួមអភិវឌ្ឍធនធានមនុស្សនៅកម្ពុជា ជាពិសេសលើវិស័យព័ត៌មាន និងផ្សព្វផ្សាយ ឯកឧត្តម បានស្នើសុំ វិទ្យាស្ថានបង្កើតកិច្ចសហប្រតិបត្តិការ តាមរយៈការរៀបចំចុះអនុស្សរណៈនៃការយោគយល់គ្នារវាងក្រសួងព័ត៌មាន និងវិទ្យាស្ថានយុទ្ធសាស្ត្រសេដ្ឋកិច្ចអន្តរជាតិនៃសាធារណៈរដ្ឋប្រជាមានិតចិន។
លោក Shi Bin បានជម្រាបជូនអំពីសវតារបស់វិទ្យាស្ថាន រួមជាមួយនឹងចក្ខុវិស័យរបស់វិទ្យាស្ថានដោយផ្តោតលើការស្រាវជ្រាវពីការអភិវឌ្ឍថ្មី យុទ្ធសាស្ត្រ និងផែនការវិនិយោគទាំងក្នុង និងក្រៅប្រទេស ដើម្បីធ្វើឱ្យក្រុមហ៊ុនសហគ្រាសមានការអភិវឌ្ឍហើយនឹងជម្រុញទំនាក់ទំនងរវាងរដ្ឋាភិបាល និងសហគ្រាសឱ្យមានទំនាក់ទំនងល្អជាមួយគ្នា និងជាច្រកផ្លូវមួយបន្ថែមសម្រាប់សហគ្រាសអាចមានទំនាក់ទំនងជាមួយសហគ្រាសជុំវិញពិភពលោក។
ជាមួយគ្នានេះ លោក Shi Bin បានលើកពីគម្រោងផលិតវីដេអូបង្ហាញអំពីមិត្តភាពរវាងកម្ពុជា-ចិន ដែលនឹងចូលរួមបង្ហាញពីរូបភាពវិជ្ជមានរបស់កម្ពុជា ចំពោះអ្នកទេសចរណ៍ និងអ្នកវិនិយោគ។
ក្នុងការចូលរួមលើកកម្ពស់ប្រព័ន្ធផ្សព្វផ្សាយ និងព័ត៌មាននៅកម្ពុជា លោក Shi Bin បានលើកឡើងថា វិទ្យាស្ថានមានបំណងក្នុងការចូលរួមជួយក្រសួងព័ត៌មានកម្ពុជា លើការបង្កើនកម្រិតសមត្ថភាពរៀបចំប្រព័ន្ធស្តុកទិន្នន័យ (Data Base) ដោយវិទ្យាស្ថាន នឹងធ្វើការសម្របសម្រួលក្នុងការអញ្ជើញប្រតិភូក្រសួងព័ត៌មាន ដើម្បីទៅបំពេញទស្សនកិច្ចនៅក្រុមហ៊ុននានានៅប្រទេសចិន ទាក់ទងនឹងវិស័យនេះ។
ឆ្លើយតបនឹងគម្រោងផលិតវីដែអូឯកសារស្តីពីទំនាក់ទំនងកម្ពុជា-ចិន ឯកឧត្តម សុខ ប្រសិទ្ធិ បានថ្លែងកោតសរសើរ និងវាយតម្លៃខ្ពស់ចំពោះវិទ្យាស្ថាន ដែលនិងចូលរួមផ្សព្វផ្សាយពីកម្ពុជាទៅកាន់ពិភពលោកក្នុងការបម្រើដល់វិស័យទេសចរណ៍ ក៏ដូចជាការទាក់ទាញអ្នកវិនិយោគចិន មកកាន់កម្ពុជា កាន់តែច្រើនបន្ថែមទៀត ៕
