ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក ដឹកនាំអង្គសិក្ខាសាលាស្តីពីយុទ្ធសាស្ត្រអភិវឌ្ឍន៍បន្តប្រព័ន្ធធារាសាស្ត្រព្រែកពោធិ ក្នុងខេត្តកំពង់ចាម
ភ្នំពេញ៖ នាថ្ងៃអង្គារ ៩រោច ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២ ខែមេសា ឆ្នាំ២០២៤នេះ នៅទីស្ដីការក្រសួង ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំអង្គសិក្ខាសាលាស្តីពីយុទ្ធសាស្រ្តកិច្ចអភិវឌ្ឍន៍បន្ត និងពង្រីកសហគមន៍កសិករប្រើប្រាស់ទឹក (សកបទ) នៃប្រព័ន្ធធារាសាស្រ្តព្រែកពោធិ ស្ថិតក្នុងភូមិសាស្រ្តស្រុកស្រីសន្ធរ ខេត្តកំពង់ចាម និងស្រុកខ្សាច់កណ្តាល ខេត្តកណ្តាល។
សូមជម្រាបថា សិក្ខាសាលានេះមានការអញ្ជើញចូលរួមពីសំណាក់លោកអភិបាលរង នៃគណៈអភិបាលខេត្តកំពង់ចាម និងខេត្តកណ្តាល លោកអភិបាល អភិបាលរង នៃគណៈអភិបាលស្រុកស្រីសន្ធរ និងស្រុកខ្សាច់កណ្តាល លោកមេឃុំ មេភូមិពាក់ព័ន្ធមកពីគ្រប់ភូមិ សមាជិក សមាជិកា នៃគណៈកម្មការ ស.ក.ប.ទ. នៃប្រព័ន្ធធារាសាស្រ្តព្រែកពោធិចំនួន ៦០រូប និងសហការីជាច្រើនរូបទៀត។
ឯកឧត្តមរដ្ឋលេខាធិការបានឱ្យដឹងថា ប្រព័ន្ធធារាសាស្រ្តនេះត្រូវបានសាងសង់ និងធ្វើទំនើបកម្មវិស្វកម្មដោយក្រសួងធនធានទឹក និងឧតុនិយម ដោយមានការគាំទ្រយ៉ាងពេញទំហឹងពីសំណាក់ក្រសួងសេដ្ឋកិច្ច និងហិរញ្ញវត្ថុ ក្រោមហិរញ្ញប្បទានពីធនាគារអភិវឌ្ឍន៍អាស៊ី(ADB) សហហិរញ្ញប្បទានពីធនាគារវិនិយោគសហគមន៍អុឺរ៉ុប(EIB) និងសហហិរញ្ញប្បទាននៃរាជរដ្ឋាភិបាលអូស្ត្រាលី(DFAT)។ ឯកឧត្តមរដ្ឋលេខាធិការបន្តថា ប្រព័ន្ធធារាសាស្រ្តព្រែកពោធិមានសក្តានុពលស្រោចស្រពផ្ទៃដីបង្កបង្កើនផលប្រមាណ ៨,០០០ ហិកតា និងអាចធ្វើបាន ៣ដង ក្នុងមួយឆ្នាំជាមួយទិន្នផលទទួលបានពី ៥ទៅ ៦តោន ក្នុងមួយហិកតា។
ទន្ទឹមនឹងនេះ ឯកឧត្តមរដ្ឋលេខាធិការបានបញ្ជាក់ថា អង្គសិក្ខាសាលាបានទទួលនូវធាតុចូលដ៏ច្រើនផ្តល់ជូនគណៈកម្មការ ស.ក.ប.ទ. នៃប្រព័ន្ធធារាសាស្រ្តព្រែកពោធិ សម្រាប់ជាមូលដ្ឋានដើម្បីដាក់បញ្ចូលបន្ថែមលើលក្ខន្តិក ស.ក.ប.ទ. ដែលបានចុះបញ្ជី និងប្រកាសដាក់ឱ្យប្រើប្រាស់រួចហើយដោយក្រសួងធនធានទឹក និងឧតុនិយម ដើម្បីធ្វើឱ្យការអនុវត្តរបស់ ស.ក.ប.ទ. និងការគ្រប់គ្រងប្រព័ន្ធធារាសាស្រ្តព្រែកពោធិ ប្រព្រឹត្តទៅប្រកបដោយប្រសិទ្ធភាពខ្ពស់ មានស័ក្តិសិទ្ធិភាព និងមាននិរន្តរភាព ៕
