និស្សិតនៃសាកលវិទ្យាល័យជាតិគ្រប់គ្រង ៥០នាក់ ធ្វើទស្សនកិច្ចសិក្សាស្វែងយល់អំពីតួនាទី និងភារកិច្ចរបស់រដ្ឋសភាកម្ពុជា
ភ្នំពេញ៖ នៅវិមានរដ្ឋសភា នាព្រឹកថ្ងៃទី២៩ ខែមីនា ឆ្នាំ២០២៤ ឯកឧត្តម អាំង សំបូរ សមាជិកគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា (គណៈកម្មការទី២) បានអញ្ជើញជាអធិបតី និងផ្តល់បទឧទ្ទេសនាម អមដោយ ឯកឧត្តម ឡេង ប៉េងឡុង អគ្គលេខាធិការរដ្ឋសភា ជូនដល់ប្រតិភូនិស្សិតនៃសាកលវិទ្យាល័យជាតិគ្រប់គ្រង ចំនួន ៥០នាក់ ដឹកនាំដោយ ឯកឧត្តម ឌិន ស៊ីដែន នាយកកម្មវិធីអន្តរជាតិផ្នែកនីតិសាស្ត្រ នៃសាកលវិទ្យាល័យជាតិគ្រប់គ្រង ដែលបានមកធ្វើទស្សនកិច្ចសិក្សាស្វែងយល់ពី “តួនាទី និងភារកិច្ចរបស់រដ្ឋសភា នៃព្រះរាជាណាចក្រកម្ពុជា”។
ឯកឧត្តម ឌិន ស៊ីដែន បានថ្លែងអំណរគុណយ៉ាងជ្រាលជ្រៅជូនចំពោះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ដែលបានអនុញ្ញាតឱ្យប្រតិភូនិស្សិតបានធ្វើទស្សនកិច្ចសិក្សាស្វែងយល់អំពីរដ្ឋសភានាពេលនេះ។ ឯកឧត្តម បានបន្ថែមថា ការមកធ្វើទស្សនកិច្ចនេះ មានគោលបំណងសិក្សាស្វែងយល់ឱ្យកាន់តែស៊ីជម្រៅបន្ថែមទៀតអំពីច្បាប់ និងតួនាទីភារកិច្ចរបស់រដ្ឋសភា ក៏ដូចជាដើម្បីពង្រឹងចំណេះដឹងផ្នែកច្បាប់ដល់និស្សិតឱ្យកាន់តែប្រសើរ។
ក្រៅពីនេះ ឯកឧត្តម បានបង្ហាញដោយសង្ខេបអំពីប្រវត្តិនៃការករកើត វឌ្ឍនភាព និងសមិទ្ធផលសំខាន់នានា ដែលសាកលវិទ្យាល័យសម្រេចបានចាប់តាំងពីថ្ងៃបង្កើតរហូតដល់ឆ្នាំ២០២៤។
ឯកឧត្តម ឡេង ប៉េងឡុង អគ្គលេខាធិការរដ្ឋសភា បានបង្ហាញជូនប្រតិភូនិស្សិតអំពីរចនាសម្ព័ន្ធ និងតួនាទីភារកិច្ចរបស់អគ្គលេខាធិការដ្ឋានរដ្ឋសភា ដែលជាសេនាធិការផ្តល់សេវាគាំទ្របច្ចេកទេសជូនដល់តំណាងរាស្ត្រក្នុងការអនុវត្តមុខងារស្នូលទាំងបីរបស់ខ្លួន។
ឯកឧត្តមបានបញ្ជាក់ថា អគ្គលេខាធិការដ្ឋានរដ្ឋសភាមានអគ្គនាយកដ្ឋានចំនួន៤ រួមមាន (១)អគ្គនាយកដ្ឋានរដ្ឋបាល និងហិរញ្ញវត្ថុ (២)អគ្គនាយកដ្ឋាននីតិកម្ម និងស្រាវជ្រាវ (៣)អគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន និង (៤)អគ្គនាយកដ្ឋានបច្ចេកវិទ្យាព័ត៌មាន និងគមនាគមន៍ ដែលផ្តល់សេវាគាំទ្រជូនសមាជិក សមាជិការដ្ឋសភា ក្នុងការអនុវត្តការងាររបស់ខ្លួន ក្នុងនោះរួមមាន សេវានីតិវិធី សេវាស្រាវជ្រាវកិច្ចការសភា និងច្បាប់ សេវាគាំទ្រដល់ការងារការទូតសភា និងសេវាផ្សព្វផ្សាយសាធារណៈជាដើម។
ក្នុងឱកាសនោះដែរ ឯកឧត្តម អាំង សំបូរ បានសម្តែងនូវកិច្ចស្វាគមន៍យ៉ាងកក់ក្តៅចំពោះប្រតិភូនិស្សិតសាកលវិទ្យាល័យ និងបានធ្វើការបង្ហាញពិស្តារអំពីប្រវត្តិនៃការករកើតសភា ដំណើរការវិវត្តន៍របស់សភា និងជាពិសេសអំពីតួនាទីស្នូលរបស់រដ្ឋសភាកម្ពុជា ក្នុងការរួមចំណែកពង្រឹងនីតិរដ្ឋ លើកកម្ពស់លទ្ធិប្រជាធិបតេយ្យ និងការអភិវឌ្ឍជាតិ។
ឯកឧត្តម បានសង្កត់ធ្ងន់ថា តំណាងរាស្រ្តមានតួនាទីភារកិច្ចសំខាន់ចំនួន៣គឺ នីតិកម្ម (តាក់តែង និងអនុម័តច្បាប់) តាមដានការអនុវត្តច្បាប់របស់រាជរដ្ឋាភិបាល ភាពជាតំណាងប្រជាពលរដ្ឋ និងការងារការទូតសភា។ ជាមួយគ្នានេះ ឯកឧត្តម ក៏បានរំលេចដោយសង្ខេបអំពីរចនាសម្ព័ន្ធគ្រប់គ្រងរបស់រដ្ឋសភា ក្នុងនោះរដ្ឋសភានីតិកាលទី៧គឺ ដឹកនាំដោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ជាស្រ្តីទី១ ក្នុងប្រវត្តិសាស្រ្តកម្ពុជា ដែលទទួលបាននូវតួនាទីដ៏ឧត្តុង្គឧត្តមនេះ។
ឯកឧត្តម បានបន្តទៀតថា រដ្ឋសភាប្រជុំជាសាមញ្ញ២លើកក្នុងមួយឆ្នាំ ដែលក្នុងមួយលើកៗ មានរយៈពេល ៣ខែ ក្រៅពីការអនុម័តច្បាប់ តំណាងរាស្ត្រទាំងអស់ត្រូវចុះតាមមូលដ្ឋាន ដើម្បីតាមដានការអនុវត្តច្បាប់របស់រាជរដ្ឋាភិបាល ចុះសួរសុខទុក្ខប្រជាពលរដ្ឋតាមមូលដ្ឋាន រួមទាំងជួយសម្របសម្រួល ដោះស្រាយរាល់បញ្ហាប្រឈមផ្សេងៗរបស់ប្រជាពលរដ្ឋ។
ទន្ទឹមនឹងនោះ ឯកឧត្តម បានស្រាយបំភ្លឺនូវសំនួរមួយចំនួនរបស់និស្សិត និងបានផ្តល់ចំណេះដឹងថ្មីៗបន្ថែមទៀត ព្រមទាំងផ្តល់អនុសាសន៍ឱ្យនិស្សិតទាំងអស់ ចេះកំណត់គោលដៅ និងគោលបំណងរបស់ខ្លួនឱ្យច្បាស់លាស់ សម្រាប់ធ្វើការអភិវឌ្ឍទាំងចំណេះដឹង និងចំណេះធ្វើឱ្យបានល្អប្រសើរនាពេលខាងមុខនេះ។
ក្នុងឱកាសនោះដែរ ប្រតិភូនិស្សិតនៃសាកលវិទ្យាល័យក៏បានទស្សនាសាលប្រជុំពេញអង្គរដ្ឋសភា សាលពិព័រណ៍ បណ្ណាល័យ និងកន្លែងសំខាន់ៗមួយចំនួនទៀតផងដែរ ៕
