ការប្រើប្រាស់ទូរស័ព្ទពេលកំពុងបើកបរ អាចបណ្តាលឱ្យអ្នកបើកបរបាត់បង់ការផ្តោតអាម្មណ៍ទៅលើការបើកបរ ជាហេតុដែលបណ្តាលឱ្យមានគ្រោះថ្នាក់ចរាចរណ៍កើតឡើង
ភ្នំពេញ៖ ក្រសួងសាធារណការ និងដឹកជញ្ជូនបានបញ្ជាក់ថា ការប្រើប្រាស់ទូរស័ព្ទពេលកំពុងបើកបរ អាចបណ្តាលឱ្យអ្នកបើកបរបាត់បង់ការផ្តោតអាម្មណ៍ទៅលើការបើកបរ ជាហេតុដែលបណ្តាលឱ្យមានគ្រោះថ្នាក់ចរាចរណ៍កើតឡើង។
ក្រសួងបន្តថា នៅលើដងផ្លូវ គេច្រើនឃើញមានអ្នកបើកបរនិយាយទូរស័ព្ទ ចំណែកអ្នកខ្លះទៀតនោះ ពេលឈប់ស្តុបម្តងៗនាំគ្នាចុចទូរស័ព្ទ លេងហ្វេសប៊ុកថែមទៀតផង។ ជាការពិត មិនថាអ្នកបើកបរឡាន ឬម៉ូតូទេ នៅពេលលើកទូរស័ព្ទចុច និយាយ ឬក៏លេងហ្វេសប៊ុក មើលសារផ្សេងៗ គឺអាចនឹងបង្កគ្រោះថ្នាក់ជាយថាហេតុ ដោយនឹកស្មានមិនដល់ អាចបង្កគ្រោះថ្នាក់ដល់ខ្លួនឯងផង និងអ្នកដទៃផង ដោយសាររវល់តែដៃម្ខាងកាន់ទូរស័ព្ទ ហើយដៃម្ខាងកាន់ចង្កូត។
ក្រសួងសាធារណការបន្ថែមថា នៅក្នុងច្បាប់ចរាចរណ៍ផ្លូវគោក មាត្រា៨ថ្មី ចំនុចទី៦ បានចែងថា “ហាមអ្នកបើកបរប្រើទូរស័ព្ទនៅពេលកំពុងបើកបរយានជំនិះដោយគ្មានឧបករណ៍សម្លេងភ្ជាប់ទំនាក់ទំនង” ។ ក្នុងករណីអ្នកបើកបរដែលត្រូវការប្រើទូរស័ព្ទបន្ទាន់ត្រូវឈប់អែបខាងផ្លូវ នៅកន្លែងមានសុវត្ថិភាពដើម្បីប្រើទូរស័ព្ទ ។
ជាមួយគ្នានោះក្រសួងបានអំពាវនាវសូមចូលរួមគោរពច្បាប់ចរាចរណ៍ និងបើកបរដោយស្មារតីទួលខុសត្រូវខ្ពស់ ដើម្បីសុខសុវត្តិភាពរបស់យើងទាំងគ្នា។ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍និងសូមគោរពច្បាប់ចរាចរណ៍ និងបើកបរដោយស្មារតីទទួលខុសត្រូវខ្ពស់ ដើម្បីសុវត្ថិភាពរបស់យើងទាំងអស់គ្នា។ ឈ្វេងយល់ពីច្បាប់ចរាចរណ៍ផ្លូវគោក គឺជាការចូលរួមចំណែកកាត់បន្ថយការកកស្ទះ និងជួយទប់ស្កាត់គ្រោះថ្នាក់ចរាចរណ៍៕
