តំបន់ប្រតិបត្តិការសឹករងកំពង់ធំ អបអរសាទរខួបអនុស្សាវរីយ៍លើកទី១១៣ ទិវានារីអន្តរជាតិ ក្រោមប្រធានបទ ស្ត្រី និងក្មេងស្រីក្នុងបរិវត្តកម្មឌីជីថល
ភ្នំពេញ៖ នៅរសៀលថ្ងៃទី៧ ខែមីនា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងកំពង់ធំយោធភូមិភាគទី៤ បានរៀបចំពិធីអបអរសាទរខួបលើកទី ១១៣ទិវានារីអន្តរជាតិ ៨មីនា ឆ្នាំ២០២៤ ក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤។
លោកស្រីវរសេនីយ៍ត្រី អ៊ុត លក្ខិណា អនុប្រធានក្រុមការងារយេនឌ័រ បានឡើងអានរបាយការណ៍បូកសរុបលទ្ឋផលការងារសំខាន់ៗរបស់នារី ក្នុងឆ្នាំ២០២៣កន្លងទៅ និងស្វាគមន៍ ក្នុងពិធីអបអរសាទរខួបលើកទី ១១៣ទិវានារីអន្តរជាតិ ៨មីនា ឆ្នាំ២០២៤ ក្រោមប្រធានបទ ស្ត្រី និងក្មេងស្រីក្នុងបរិវត្តកម្មឌីជីថល។
លោកស្រីវរសេនីយ៍ទោ យូ មុន្នីរ័ត្ន នាយសេនាធិការរង និងជាប្រធានក្រុមការងារយេនឌ័រនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានព្រះរាជសាររបស់សម្ដេចព្រះមហាក្សត្រីនរោតត្តមមុនីនាថសីហនុព្រះវររាជជាតិមាតាជាតិខ្មែរ ក្នុងសេរីភាពសេចក្តីថ្លៃថ្នូរនិងសុភមង្គល ក្នុងទិវានារីអន្តរជាតិខួបលើកទី ១១៣ ឆ្នាំ ២០២៤ ក្រោមប្រធានបទ ស្ត្រី និងក្មេងស្រីក្នុងបរិវត្តកម្មឌីជីថល ជូនអង្គពិធី ។
ឧត្តមសេនីយ៍ទោ សោម ស៊ុន បានប្រគល់ប័ណ្ណសរសើររបស់ ឯកឧត្តមអគ្គបញ្ជាការនៃកងយោធពលខេមរភូមិន្ទ ជូនដល់លោកស្រីវរសេនីយ៍ទោ យូ មុន្នីរ័ត្ន នាយសេនាធិការរង និងយោធិននារី ៣ រូបផ្សេងទៀតដែលមានស្នាដៃល្អឆ្នើម ក្នុងសកម្មភាពការងារនារី នាឆ្នាំ២០២៣កន្លងមក និងបានជូនបាច់ផ្កាដល់ភរិយា និងវត្ថុអនុស្សារីយដល់យោធិននារីគ្រប់រូបនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ផងដែរ ។
ឧត្តមសេនីយ៍ទោ សោម ស៊ុន បានថ្លែងនូវការអបអរសាទរចំពោះខួបលើកទី១១៣ នៃទិវានារីអន្តរជាតិឆ្នាំ២០២៤ ក្រោមប្រធានបទស្ត្រីនិងក្មេងស្រីក្នុងបរិវត្តកម្មឌីជីថល ហើយនឹងបានកោតសរសើរចំពោះស្មារតីដ៏អង់អាចក្លាហានរបស់នារីនៅក្នុងពិភពលោក ដែលបានតស៊ូទាមទារសិទ្ធិ និងសេរីភាពស្មើគ្នា ក្នុងការលើកកម្ពស់សមភាពយេនឌ័រ ដើម្បីបង្កើនភាពអង់អាចដល់ស្ត្រី និងក្មេងស្រីគ្រប់រូប និងបានផ្តាំផ្ញើដល់យោធិននារីគ្រប់រូប ព្រមទាំងភរិយារបស់ថ្នាក់ដឹកនាំ នាយទាហាន នាយទាហានរង និងពលទាហាន ត្រូវថែទាំសុខភាព ឲ្យបានល្អ ចូលរួមក្នុងការងារសង្គម ដោយអនុវត្តន៍តាមយុទ្ធសាស្ត្របញ្ចកោណក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ពិសេសចូលរួមយ៉ាងសកម្មក្នុងការងារមនុស្សធម៌ និងអនុវត្តតាមប្រធានបទ ស្ត្រី និងក្មេងស្រី ក្នុងបរិវត្តកម្មឌីជីថល។
លោកស្រីព្រិន្ទបាលឯក ចាយ សុផល តំណាងឲ្យយោធិននារី នៃបញ្ជាការដ្ខានតំបន់ប្រតិបត្តិការសឹករងកំពង់ធំ បានឡើងធ្វើចំណាប់អារម្មណ៍និងការប្តេជ្ញាចិត្តក្នុងពិធីអបអរសាទរខួបលើកទី ១១៣ នៃទិវានារីអន្តរជាតិ ៨មីនា ឆ្នាំ២០២៤ ប្រកបដោយស្មារតីទទួលខុសត្រូវ និងរីករាយក្រៃលែង ។
