ក្រសួងបរិស្ថាន រៀបចំកិច្ចប្រជុំចាប់ផ្តើមអនុវត្តកិច្ចសហប្រតិបត្តិការអាស៊ាន-ន័រវែសក្នុងការពង្រឹងសមត្ថភាពមូលដ្ឋានសម្រាប់កាត់បន្ថយការបំពុលដោយប្លាស្ទិកនៅតំបន់អាស៊ាន
ភ្នំពេញ៖ នាថ្ងៃទី៤ ខែមីនា ឆ្នាំ២០២៤ អគ្គនាយកដ្ឋានតំបន់ការពារធម្មជាតិ នៃក្រសួងបរិស្ថាន បានរៀបចំកិច្ចប្រជុំកិច្ចប្រជុំចាប់ផ្តើមអនុវត្តការចាប់ផ្តើមកិច្ចសហប្រតិបត្តិការអាស៊ាន-ន័រវែសក្នុងការពង្រឹងសមត្ថភាពមូលដ្ឋានសម្រាប់កាត់បន្ថយការបំពុលដោយប្លាស្ទិកនៅតំបន់អាស៊ាន (ASEANO 2) ក្រោមអធិបតីភាព ឯកឧត្តម សាន វណ្ណទី រដ្ឋលេខាធិការប្រចាំការ ក្រសួងបរិស្ថាន ឯកឧត្តម Kjell Tormod Pettersen អគ្គរាជទូតនៃព្រះរាជាណាចក្រន័រវែសប្រចាំអាស៊ាន និងឯកឧត្តម យុន លីនណេ អភិបាលរង នៃគណៈអភិបាលខេត្តសៀមរាប ។
កិច្ចប្រជុំមានការចូលរួមពី តំណាងស្ថានទូតន័រវែសនៅទីក្រុងហាណូយ ស្ថានទូតន័រវែសនៅទីក្រុងបាងកក ឯកឧត្តម ប៉ាក សុខារ៉ាវុត អនុរដ្ឋលេខាធិការ ក្រសួងបរិស្ថាន ឯកឧត្តម គឹម ណុង អគ្គនាយកនៃអគ្គនាយកដ្ឋានតំបន់ការពារធម្មជាតិ លោកប្រធាននាយកដ្ឋានចំណុះឱ្យអគ្គនាយកដ្ឋានតំបន់ការពារធម្មជាតិ នាយកដ្ឋានសេដ្ឋកិច្ចបៃតង នាយកដ្ឋានគ្រប់គ្រងសំណល់រឹង នាយកដ្ឋានគ្រប់គ្រងគុណភាពទឹក នាយកដ្ឋានព័ត៌មាននិងផ្សព្វផ្សាយបរិស្ថាន តំណាងក្រុមការងារអាស៊ានទទួលបន្ទុកបរិស្ថានឆ្នេរនិងសមុទ្រ ប្រទេសជាសមាជិកអាស៊ាន អង្គការដៃគូដូចជា CSEAS, NIVA, Wild Earth Allies, GIZ, វិទ្យាស្ថានបច្ចេកវិទ្យាកម្ពុជា និងសាកលវិទ្យាល័យភូមិន្ទកសិកម្ម មូលនិធិទំពាំងស្នងឬស្សី ជាច្រើនរូបទៀត។
កិច្ចប្រជុំរៀបចំឡើងក្នុងគោលបំណងចាប់ផ្តើមអនុវត្តកិច្ចសហប្រតិបត្តិការអាស៊ាន-ន័រវែសក្នុងការពង្រឹងសមត្ថភាពមូលដ្ឋានសម្រាប់កាត់បន្ថយការបំពុលដោយប្លាស្ទិកនៅតំបន់អាស៊ាន (ASEANO 2) ដែលប្រទេសកម្ពុជា និងប្រទេសវៀតណាមត្រូវបានជ្រើសរើសជាទីតាំងអនុវត្ត។
ក្នុងឱកាសនោះដែរ ឯកឧត្តម សាន វណ្ណទី រដ្ឋលេខាធិការប្រចាំការ ក្រសួងបរិស្ថាន បានលើកឡើងពីភាពជោគជ័យនៃយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» និងយុទ្ធនាការផ្ទៃទឹកស្អាត កាត់បន្ថយការបំពុលក្នុងផ្ទៃទឹក ដើម្បីសុខភាពប្រជាជន ដែលទើបនឹងប្រកាសចាប់ផ្តើមដោយឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន នាថ្ងៃទី១ ខែមីនា ឆ្នាំ២០២៤។
ឯកឧត្តមរដ្ឋលេខាធិការ បានឱ្យដឹងទៀតថា ការចាប់ផ្តើមអនុវត្តកិច្ចសហប្រតិបត្តិការអាស៊ាន-ន័រវែសក្នុងការពង្រឹងសមត្ថភាពមូលដ្ឋានសម្រាប់កាត់បន្ថយការបំពុលដោយប្លាស្ទិកនៅតំបន់អាស៊ាន (ASEANO 2) គឺស្របទៅនឹងអាទិភាពរបស់ក្រសួងបរិស្ថាន ជាពិសេសយុទ្ធសាស្ត្រចក្រាវិស័យបរិស្ថាន ២០២៣- ២០២៨។
ជាមួយគ្នានេះដែរ ឯកឧត្តម Kjell Tormod Pettersen អគ្គរាជទូតនៃព្រះរាជាណាចក្រន័រវែសប្រចាំអាស៊ាន បានគាំទ្រ និងកិច្ចផ្តួចផ្តើមរបស់ក្រសួងបរិស្ថាន និងបានសាទរដល់ការជោគជ័យរបស់ក្រសួងបរិស្ថាន អំពីយុទ្ធនាការ « ថ្ងៃនេះ ខ្ញុំមិនប្រើថង់ប្លាស្ទិកទេ» ដែលបានចូលរួមកាត់បន្ថយការបំពុលដោយប្លាស្ទិកនៅប្រទេសកម្ពុជា និងឈានទៅដល់ថ្នាក់តំបន់។
គួរបញ្ជាក់ឱ្យដឹងថា កិច្ចប្រជុំនេះ ប្រព្រឹត្តរយៈពេល ១(មួយ)ថ្ងៃ ដោយផ្ទាល់ និងតាមរយៈអនឡាញ និងមានការចុះទស្សនកិច្ចនៅតំបន់ប្រើប្រាស់ច្រើនយ៉ាងបឹងទន្លេសាប នៅថ្ងៃទី៥ ខែមីនា ឆ្នាំ២០២៤៕
