ក្រុមគ្រូពេទ្យស្ម័គ្រចិត្តនៃសាកលវិទ្យាល័យពេទ្យ ស៊ូន ឆុនយ៉ាង ទីក្រុងសេអ៊ូល សហការជាមួយក្រុមគ្រូពេទ្យអង្គឌួង និងមន្ទីរពេទ្យបង្អែកខេត្តព្រះសីហនុ ពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃ

ភ្នំពេញ៖ លោក ឡុង ឌីម៉ង់ អភិបាលរងខេត្តព្រះសីហនុ នាថ្ងៃទី២៩ ខែកុម្ភៈ ឆ្នាំ២០២៤ បានអញ្ជើញស្វាគមន៍ក្រុមគ្រូពេទ្យស្ម័គ្រចិត្ត នៃសាកលវិទ្យាល័យពេទ្យ ស៊ូន ឆុនយ៉ាង ទីក្រុងសេអ៊ូល សហការជាមួយក្រុមគ្រូពេទ្យនៃមន្ទីរពេទ្យព្រះអង្គឌួង (រាជធានីភ្នំពេញ) និងក្រុមគ្រូពេទ្យនៃមន្ទីរពេទ្យបង្អែកខេត្តព្រះសីហនុ ជួយពិនិត្យព្យាបាលជំងឺជូនប្រជាពលរដ្ឋខេត្តព្រះសីហនុ ដោយឥតគិតថ្លៃ រយៈពេលពីរថ្ងៃគឺចាប់ពីថ្ងៃទី២៩ ខែកុម្ភៈ ដល់ថ្ងៃទី១ ខែមីនា ឆ្នាំ២០២៤ នៅមន្ទីរពេទ្យបង្អែកខេត្តព្រះសីហនុ ស្ថិតនៅសង្កាត់លេខ៤ ក្រុងព្រះសីហនុ។

លោក ឡុង ឌីម៉ង់ អភិបាលរងខេត្ត បានថ្លែងអំណរគុណក្រុមគ្រូពេទ្យស្ម័គ្រចិត្តសកល វិទ្យាល័យពេទ្យ ស៊ូន ឆុនយ៉ាង ប្រទេសកូរ៉េ សហការជាមួយក្រុមគ្រូពេទ្យ នៃមន្ទីរពេទ្យអង្គឌួង និងក្រុមគ្រូពេទ្យមន្ទីរពេទ្យបង្អែកខេត្តព្រះសីហនុ ពិគ្រោះពិនិត្យជំងឺជូនប្រជាពលរដ្ឋខេត្តព្រះសីហនុ។

បងប្អូនប្រជាពលរដ្ឋដែលចង់មកពិគ្រោះជំងឺជាមួយក្រុមគ្រូពេទ្យចំណានមកពីសកលវិទ្យាល័យពេទ្យ ស៊ូន ឆុនយ៉ាង និងក្រុមគ្រូពេទ្យមកពីមន្ទីរពេទ្យព្រះអង្គឌួង និងក្រុមគ្រូពេទ្យនៃមន្ទីរពេទ្យបង្អែកខេត្តព្រះសីហនុ ព្រោះការពិនិត្យពិគ្រោះជាមួយគ្រូពេទ្យបានច្រើន គឺរឹតតែល្អ ហើយថ្ងៃនេះយើងចាប់ផ្តើមពិនិត្យពិគ្រោះជំងឺឥតគិតថ្លៃជូនប្រជាពលរដ្ឋចំនួន ៥០នាក់។ ព្រោះវិធីសាស្ត្រនៃការពិគ្រោះជំងឺមានលក្ខណខុសគ្នា សម្រាប់កម្ពុជា ពិគ្រោះជំងឺជាមុនសិន ទើបយកឈាម និងទឹកនោម ដោយឡែកក្រុមគ្រូពេទ្យកូរ៉េ គឺយកឈាម និងយកទឹកនោមជាមុន នៅពេលបានលទ្ធផលទើបពិគ្រោះ និងព្យាបាលតែម្តង។ មន្ទីរពេទ្យ ស៊ូន ឆុនយ៉ាង និងមន្ទីរពេទ្យអង្គឌួង បានសហការគ្នាល្អ បង្កើតបាននូវសមិទ្ធផលជួយជិវិតប្រជាពលរដ្ឋខ្មែរយើងបានច្រើន សូមថ្លែងការកោតសរសើរ និងអរគុណយ៉ាងជ្រាលជ្រៅចំពោះក្រុមគ្រូពេទ្យស្ម័គ្រចិត្តកូរ៉េ ខ្ញុំស្រមៃថា និងមានកិច្ចសហប្រតិបត្តិការត្រីភាគី ឬអាចចុះ MOU ត្រីភាគីរវាងមន្ទីរពេទ្យទាំង៣។ ថ្ងៃនេះមានក្រុមគ្រូពេទ្យស្ម័គ្រចិត្ត ស៊ូន ឆុងយ៉ាង ១៤រូប មានវេជ្ជបណ្ឌិត ៣រូប ហើយថ្ងៃស្អែកថែមពីររូបបន្ថែមទៀត និងក្រុមគ្រូពេទ្យស្ម័គ្រចិត្តមកពីមន្ទីរពេទ្យអង្គឌួងចំនួន ២៦រូប និងក្រុមគ្រូពេទ្យនៃមន្ទីរពេទ្យបង្អែកខេត្តព្រះសីហនុធ្វើការជាមួយគ្នា។

លោកសាស្ត្រាចារ្យ Park Pong Vorng ប្រធានក្រុមគ្រូពេទ្យស្ម័គ្រចិត្តសកលវិទ្យាល័យពេទ្យ ស៊ូន ឆុនយ៉ាង ទីក្រុងសេអ៊ូល ប្រធានក្រុមការងារបានថ្លែងអំណរគុណការទទួលស្វាគមន៍របស់អាជ្ញាធរខេត្តព្រះសីហនុ ចំពោះក្រុមគ្រូពេទ្យស្ម័គ្រចិត្តវិទ្យាល័យពេទ្យរបស់យើង ក្រុមគ្រូពេទ្យមានគម្រោងមកកាន់ខេត្តព្រះសីហនុកាលពីឆ្នាំមុន ក៏ប៉ុន្តែត្រូវខកខាន និងឱ្យពួកយើងបានមកឆ្នាំនេះ យើងមានវេជ្ជបណ្ឌិតចំនួន ៥រូប ដោយសារមានបញ្ហាតិចតួច យើងមានវេជ្ជបណ្ឌិត ២រូប គឺខាងបេះដូង និងធ្មេញ ហើយថ្ងៃស្អែកនឹងមានវេជ្ចបណ្ឌិត ២រូបបន្ថែមទៀត ផ្នែកជំងឺទូទៅ និងផ្នែកភ្នែក។ ទំនាក់ទំនងរវាងវិទ្យាល័យ ស៊ូន ឆុងយ៉ាង និងប្រទេសកម្ពុជាពិតជាមានការស្និតស្នាល ជាមិត្តភ័កដែលមានទំនាក់ទំនងល្អនឹងគ្នារយពេល ២០ឆ្នាំកន្លងមកហើយ។ កន្លងមកមានក្រុមគ្រូពេទ្យកម្ពុជាប្រមាណ ១០០នាក់ បានទទួលការសិក្សានៅសាកលវិទ្យាល័យ ស៊ូន ឆុងយ៉ាង យើងក៏បានជួយព្យាបាលជំងឺប្រជាពលរដ្ឋកម្ពុជាជាច្រើនផងដែរ។

លោក បានបញ្ជាក់ថា លោកបានមកកម្ពុជា ៥ដងហើយ គឺមកខេត្តសៀមរាប ក្នុងនោះមានអ្នកជំងឺបេះដូងធ្ងន់ធ្ងរច្រើន ដូច្នេះខ្ញុំបានព្យាបាលពួកគាត់ និងមានអ្នកវះកាត់ជំងឺបេះដូងនៅទីនោះដែរ។ ដោយមានការជួយជ្រោមជ្រែងពីរាជរដ្ឋាភិបាលកម្ពុជា ទើបខ្ញុំមានឱកាសច្រើនបែបនេះ ទន្ទឹមនោះយើងក៏បានទទួលជំនួយជាច្រើនពីលោកអភិបាលរងខេត្តព្រះសីហនុ លោក ឡុង ឌីម៉ង យើងមានឱកាសម្តងទៀតមកធ្វើការជាមួយអ្នកទាំងអស់គ្នា។ ចំពោះមន្ទីរពេទ្យអង្គឌួង បានសហការជាមួយមន្ទីរពេទ្យយើងខ្ញុំរយៈពេល ៥ឆ្នាំកន្លងមក យើងបានធ្វើគម្រោងជាមួយគ្នា ហើយថ្ងៃនេះពួកគាត់ក៏បានចូលរួមជាមួយពួកយើងដែរ សមិទ្ធផលដែលយើងទទួលបានមកដល់ថ្ងៃនេះ គឺជាការសហការគ្នារវាងរដ្ឋបាលខេត្តព្រះសីហនុ មន្ទីរពេទ្យព្រះអង្គឌួង និងមន្ទីរពេទ្យសកលវិទ្យាល័យ ស៊ូន ឆុងយ៉ាង ហើយប្រជាជនជាច្រើននឹងទទួលបានអត្ថប្រយោជន៍ សូមកុំស្ទាក់ស្ទើរមកជួបពួកខ្ញុំពិគ្រោះយោបល់ផ្នែកសុខភាពទាំងអស់គ្នា យើងមានរយពេល ២ថ្ងៃ ជារយៈពេលខ្លី ក៏ប៉ុន្តែពួកយើងនឹងខិតខំឪ្យអស់ពីលទ្ធភាព ដើម្បីជួយឱ្យអ្នកទាំងអស់គ្នាមានសុខភាពល្អ សង្ឃឹមថា ឱកាសនេះមិនមែនជាឱកាសលើកទី១ និងក៏មិនមែនជាឱកាសលើកចុងក្រោយនោះដែរ យើងមានឱកាសជាច្រើនទៀត គឺលើកទី២ ទី៣ នៅឆ្នាំក្រោយៗទៀត យើងនឹងខិតខំប្រឹងប្រែងធ្វើយ៉ាងណាឱ្យប្រទេសកម្ពុជា ដែលជាប្រទេសមិត្តរបស់ពួកយើងមានសុខភាពល្អ។

សូមបញ្ជាក់ថា ការពិនិត្យពិគ្រោះយោបល់សម្រាប់អ្នកជំងឺ ជាមធ្យមអាចជួយពិនិត្យ ពិគ្រោះជំងឺជូនប្រជាពលរដ្ឋប្រមាណជា ១០០នាក់ ក្នុងមួយថ្ងៃ៕