សម្តេចធិបតី ណែនាំឱ្យក្រសួងឧស្សាហកម្ម បន្តការយកចិត្តទុកដាក់ ក្នុងការគ្រប់គ្រង និងការអភិរក្ស ដីស្រែអំបិលនៅខេត្តកំពត-កែប ដែលជាកេរដំណែលពីដូនតា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានណែនាំឱ្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ត្រូវបន្តការយកចិត្តទុកដាក់ខ្ពស់ ក្នុងការពង្រឹងការគ្រប់គ្រង និងការអភិរក្ស ដីស្រែអំបិលនៅខេត្តកំពត-កែប ដែលជាកេរដំណែលពីដូនតា និងជំរុញការផលិតអំបិលដែលរាជរដ្ឋាភិបាលចាត់ទុកជាទំនិញយុទ្ធសាស្ត្រ ឱ្យដើរព្រមគ្នានឹងវិធានការដោះស្រាយបញ្ហាដីស្រែអំបិល ដែលមិនមានសក្តានុពល។
សម្តេចធិបតី ហ៊ុន ម៉ាណែត បានថ្លែងយ៉ាងដូច្នេះ ក្នុងឱកាសដែលសម្តេចអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ «អគារ តេជោសែន» និងបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នារសៀលថ្ងៃទី២១ ខែកុម្ភៈ ឆ្នាំ២០២៤នេះ។
ក្នុងឱកាសនេះ សម្តេចធិបតី ហ៊ុន ម៉ាណែត ក៏បានណែនាំដល់ក្រសួង-ស្ថាប័ន រដ្ឋបាលថ្នាក់ក្រោមជាតិ និងភាគីពាក់ព័ន្ធត្រូវសហការជាមួយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ អំពីច្បាប់ស្តីពី ការគ្រប់គ្រងទឹកស្អាត ដើម្បីឱ្យការផ្គត់ផ្គង់ទឹកស្អាតសម្រេចបានលក្ខខណ្ឌគោលទាំង៤ គឺ៖ គុណភាព, សុវត្ថិភាព, និរន្តរភាព និងតម្លៃសមរម្យ។
សម្តេចធិបតី ក៏បានណែនាំឱ្យក្រសួងឧស្សាហកម្ម ត្រូវបន្តពង្រីកវិសាលភាពនៃការផ្គត់ផ្គង់ទឹកស្អាតតាមបំពង់ជូនប្រជាពលរដ្ឋទាំងនៅទីប្រជុំជន និងជនបទ, ពង្រឹងការលើកទឹកចិត្តដល់ការវិនិយោគផលិតទឹកស្អាតខ្នាតធំ ឫមធ្យម ដើម្បីជួយទ្រទ្រង់នៅតំបន់ដែលប្រឈម និងការខ្វះប្រភពទឹក និងខ្វះធនធានហិរញ្ញវត្ថុ។
សម្តេចធិបតី នាយករដ្ឋមន្ត្រី ក៏បានណែនាំឱ្យក្រសួងត្រូវគ្រប់គ្រងគោលនយោបាយថ្លៃទឹកស្អាតឱ្យបានម៉ឺងម៉ាត់ តែទន់ភ្លន់ ជាមួយនឹងការគិតគូរដល់ភាពសុខុដុមនីយកម្ម រវាងអ្នកផលិត និងអ្នកប្រើប្រាស់ និងត្រូវផ្តល់អតិភាពដល់ប្រជាពលរដ្ឋក្រីក្រ និងមានជីវភាពក្សត់ខ្សោយ រួមទាំងបងប្អូនកម្មករ សិស្ស និស្សិត ដែលស្នាក់នៅតាមបន្ទប់ជួលឱ្យទទួលបានថ្លៃទឹកស្អាតមួយសមរម្យ។ ត្រូវជម្រុញការរៀបចំបង្កើតនិយ័តករទឹកស្អាត ដើម្បីពង្រឹងនិយ័តកម្ម និងអាជ្ញាប័ណ្ណ និងពន្លឿនការរៀបចំអនុក្រឹត្យស្តីពីការរៀបចំ និងប្រព្រឹត្តទៅរបបមូលនិធិអភិវឌ្ឍន៍វិស័យទឹកស្អាត ដើម្បីផ្តល់ទ្ធភាពបន្ថែមទៀតក្នុងការជួយផ្តត់ផ្គង់ទឹកស្អាត នៅកន្លែងដែលជួបការលំបាកខ្លាំងផងដែរ ៕
