អង្គការរូមធូរីដ រៀបចំកិច្ចប្រជុំឆ្លុះបញ្ចាំងសមិទ្ធិផលសម្រេចបានឆ្នាំ២០២៣ និងផ្សព្វផ្សាយផែនការសកម្មភាពក្នុងឆ្នាំ ២០២៤ របស់កម្មវិធីអប់រំកុមារី
ភ្នំពេញ៖ អង្គការរូមធូរីដ បានរៀបចំកិច្ចប្រជុំឆ្លុះបញ្ចាំងសមិទ្ធិផលសម្រេចបានឆ្នាំ២០២៣ និងផ្សព្វផ្សាយ ផែនការសកម្មភាពក្នុងឆ្នាំ ២០២៤ របស់កម្មវិធីអប់រំកុមារី នៃអង្គការរូមធីរីដកម្ពុជា ប្រចាំខេត្តបន្ទាយមានជ័យ ជូនដល់ស្រុក សាលាពាក់ព័ន្ធដែលអង្គការបានដំណើរការសកម្មភាពនាពេលកន្លងមក ធ្វើឡើងនៅសាលប្រជុំ មន្ទីរអប់រំ យុវជន និងកីឡានាថ្ងៃទី២០ ខែកុម្ភៈ ឆ្នាំ ២០២៤។
លោក ប៊ុនចាន់ ស៊ីសាវាត់ ប្រធានអង្គការរូមធូរីដប្រចាំខេត្តបន្ទាយមានជ័យ បានឱ្យដឹងថា ៖ អង្គការូមធូរីដប្រចាំខេត្តបន្ទាយមានជ័យ បានចាប់ផ្តើមអនុវត្តកម្មវិធីរបស់ខ្លួនជាផ្លូវការនៅចុងឆ្នាំ២០១៥ លើកម្មវិធីអំណាន ហើយចំពោះកម្មវិធីអប់រំកុមារីនៅចុងឆ្នាំ២០១៩ មកទល់ពេលនេះ អង្គការរូមធូរីដប្រចាំខេត្តបន្ទាយមានជ័យអនុវត្តកម្មវិធីអំណានក្នុងសាលាបឋមសិក្សា សរុប៩៥សាលា ក្នុងក្រុង/ស្រុកចំនួន៦។
ក្នុងនោះ៧០សាលាបានបញ្ចប់ការអនុវត្តកម្មវិធីអំណានរយៈពេល៣ទៅ៤ឆ្នាំ និងចំនួន២៥សាលាកំពុងអនុវត្ត ដែលក្នុងនោះគឺនៅស្រុកម៉ាឡៃចំនួន១៧សាលាបឋមសិក្សា និងក្រុងប៉ោយប៉ែតចំនួន៨សាលាបឋមសិក្សា។ ចំណែកកម្មវិធីអប់រំកុមារី បាននិងកំពុងអនុវត្តន៍ក្នុងវិទ្យាល័យ និងអនុវិទ្យាល័យចំនួន៨ ក្នុងចំណោមនោះមានវិទ្យាល័យភ្នំធំផងដែរ ក្នុងស្រុកចំនួនពីរ គឺស្រុកព្រះនេត្រព្រះចំនួន និងស្រុកមង្គលបូរី ដែលមានកុមារីគោលដៅចំនួនសរុប ប្រមាណ ១,៨៥៤នាក់។
លោក ខិម តាំងស៊ុន អនុប្រធានមន្ទីរអប់រំ យុវជន និងកីឡាខេត្ត តំណាងលោកប្រធានមន្ទីរ ក៏បានថ្លែងនូវការអរគុណចំពោះអង្គការរូមធូរីដកម្ពុជា ដែលបានចូលរួមចំណែកយ៉ាងសំខាន់ក្នុងវិស័យអប់រំ នៅប្រទេសកម្ពុជាក៏ដូចជានៅក្នុងខេត្តបន្ទាយមានជ័យ ដែលកន្លងមកអង្គការតែងតែបានចូលរួមចំណែកយ៉ាងសកម្មភាពក្នុងការជួយឧបត្ថម្ភទៅដល់សិស្សានុសិស្សដែលមានជីវភាពខ្វះខាត ហើយមានឱកាសក្នុងការទទួលបាននូវសម្ភារៈសិក្សាដូចជាកង់ជាដើម ដើម្បីឱ្យពួកគេមានឱកាលសិក្សារៀនសូត្រក្រេបយកចំណេះដឹង។
សូមបញ្ជាក់ផងដែរថា ក្នុងរយៈពេល៨ឆ្នាំមកនេះ អង្គការរូមធូរីដបានវិនិយោគថវិការប្រមាណ២លានដុល្លា លើវិស័យអប់រំ ក្នុងខេត្តបន្ទាយមានជ័យ ៕
