ព្រឹកថ្ងៃនេះ! រដ្ឋសភាបើកកិច្ចប្រជុំវិសាមញ្ញ ដើម្បីបោះឆ្នោតផ្តល់សេចក្តីទុកចិត្តលើ ឯកឧត្ដម ហ៊ុន ម៉ានី ជាឧបនាយករដ្ឋមន្រ្តី និងទេសរដ្ឋមន្រ្តី២រូបទៀត

ភ្នំពេញ៖ នៅព្រឹក ថ្ងៃទី២១ ខែកុម្ភៈ ឆ្នាំ២០២៤នេះ រដ្ឋសភា បានបើកកិច្ចប្រជុំវិសាមញ្ញ របស់ខ្លួនដើម្បីបោះឆ្នោតផ្តល់សេចក្តីទុកចិត្តលើ ការតែងតាំង ឯកឧត្ដម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ ជាឧបនាយករដ្ឋមន្រ្តី។

សូមបញ្ជាក់ថាក្រៅពីបោះឆ្នោតផ្តល់សេចក្តីទុកចិត្តលើការតែងតាំង ឯកឧត្ដម ហ៊ុន ម៉ានី, រដ្ឋសភាក៏នឹងបោះឆ្នោតផ្តល់សេចក្តីទុកចិត្តលើការស្នើតែងតាំងបន្ថែមទេសរដ្ឋមន្រ្តី ទទួលបន្ទុកបេសកកម្មពិសេស២រូបថែមទៀតនោះគឺ ឯកឧត្ដម ស្រ៊ី ថាមរុង្គ និង ឯកឧត្ដម ប៉ែន វិបុល ។

កិច្ចប្រជុំ បានធ្វើឡើងក្រោមអធិបតីភាព សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា ដោយមានការចូលរួមពី សម្តេចតេជោ ហ៊ុន សែន. សម្តេចអគ្គមហាពញាចក្រី ហេង សំរិន. សម្ដេចក្រឡាហោមស ខេង .សម្តេចធិបតី ហ៊ុន ម៉ាណែត និងសមាជិករបស់រដ្ឋសភាផងដែរ ៕