នៅថ្ងៃនេះ សម្ដេចតេជោ ហ៊ុន សែន នឹងអញ្ជើញទៅសួរសុខទុក្ខលោក ថាក់ស៊ីន នៅទីក្រុងបាងកក
បាងកក៖ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា គ្រោងនឹងធ្វើដំណើរទៅទីក្រុងបាងកកនៅថ្ងៃនេះ ដើម្បីទៅសួរសុខទុក្ខលោក ថាក់ស៊ីន ស៊ីណាវ៉ាត្រា នៅឯគេហដ្ឋានរបស់លោកបាន ចាន់សុងឡា នេះបើកយោង អ្នកស្រី ប៉ាតុងតាន់ ស៊ីណាវ៉ាត្រា ដែលជាកូនស្រីពៅរបស់លោកថាក់ស៊ីន បានបញ្ជាក់នៅថ្ងៃនេះ។
អ្នកស្រី ប៉ាតុងតាន់ ស៊ីណាវ៉ាត្រា បានបន្តថា សម្តេចតេជោ ហ៊ុន សែន ព្រួយបារម្ភអំពីស្ថានភាពរបស់លោកថាក់ស៊ីន ហើយបានស្នើសុំជួបលោកថាក់ស៊ីន ដោយអ្នកស្រីបានបន្ថែមថា សម្តេចតេជោ ហ៊ុន សែន នឹងទទួលទានអាហារថ្ងៃត្រង់ជាមួយលោក ថាក់ស៊ីន មុនពេលត្រឡប់មកទីក្រុងភ្នំពេញវិញ។
សូមបញ្ជាក់ថា សម្តេចតេជោ ហ៊ុន សែន ធ្លាប់បានតែងតាំងលោកថាក់ស៊ីន ដែលកំពុងនិរទេសខ្លួនឯងបន្ទាប់ពីរដ្ឋប្រហារទម្លាក់លោកនៅពេលនោះ ធ្វើជាទីប្រឹក្សាសេដ្ឋកិច្ចរបស់លោក ហើយកាលពីឆ្នាំមុន លោកថាក់ស៊ីន រួមជាមួយនឹងប្អូនស្រីរបស់លោក គឺលោកស្រីយីងឡាក់ ស៊ីណាវ៉ាត្រា បានចូលរួមពិធីខួបកំណើតរបស់សម្តេចតេជោ ហ៊ុន សែន នៅរាជធានីភ្នំពេញ ផងដែរ។
ប្រភព៖ Bangkok post
ប្រែសម្រួលដោយ៖ ឡាយ លីហួ
