សម្តេចធិបតី៖ កម្ពុជាមិនមែនជាប្រទេស ត្រូវតែផលិតនិងនាំចេញតែវត្ថុធាតុដើមទេ គឺត្រូវមានសមត្ថភាពផលិតផលិតផលពាក់កណ្តាលសម្រេច និងសម្រេច ដើម្បីផ្គត់ផ្គង់ទីផ្សារក្នុងស្រុក និងនាំចេញ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា កម្ពុជាមិនមែនត្រឹមតែជាប្រទេសដែលនាំចេញតែវត្ថុធាតុដើមប៉ុណ្ណោះទេ ប៉ុន្តែកម្ពុជាត្រូវតែជាប្រទេសមានសមត្ថភាព ផលិតផលិតផលពាក់កណ្តាលសម្រេច និងសម្រេច សម្រាប់ផ្គត់ផ្គង់ទីផ្សារក្នុងស្រុក និងនាំចេញ ។
ក្នុងឱកាសអញ្ជើញសម្ពោធរោងចក្រដំឡើងរថយន្តតូយ៉ូតា ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នាថ្ងៃទី២ ខែឧសភា ឆ្នាំ២០២៤នេះ សម្ដេចធិបតី ហ៊ុន ម៉ាណែត មានប្រសាសន៍ថា យើងប្រែក្លាយផលិតភាពរបស់ប្រជាជនយើង យើងប្រែក្លាយសក្តានុពលរបស់ប្រជាជនយើងមិនត្រឹមតែបង្កើតនូវឱកាសការងារមួយមុខនោះទេ ប៉ុន្តែប្រភេទនៃការងារគឺត្រូវការចាំបាច់ ។ យើងប្រែក្លាយពីកសិកម្មផ្អែកទៅលើសត្វពាហនៈ គោក្របីទៅកសិឧស្សាហកម្ម ឬកសិកម្មផ្អែកលើគ្រឿងយន្ត យើងឈានមកដល់ការជំរុញវិស័យកម្មន្តសាល វិស័យទេសចរណ៍ វិស័យឧស្សាហកម្មធនស្រាល ថ្ងៃក្រោយយើងអាចរៀបចំនូវការផលិតធុនធ្ងន់ ពេលដែលយើងមានធនធានមនុស្ស។ បែបនេះហើយទើបយើងធានានូវនិរន្តភាពក៏ដូចជាលើកស្ទួយនូវកម្រិតជីវភាពរបស់ប្រជាពលរដ្ឋរបស់យើង។
សម្ដេចធិបតីបញ្ជាក់ថា «យើងមិនមែនជាប្រទេសដែលត្រូវតែផលិតនិងនាំចេញតែវត្ថុធាតុដើមប៉ុណ្ណឹងនោះទេ ត្រូវមានសមត្ថភាពនៅក្នុងការផលិតផលិតផលពាក់កណ្តាលសម្រេច និងផលិតផលដើម្បីនាំចេញ ដើម្បីធានានូវផលតម្លៃកម្ពុជាឱ្យបានច្រើន ចែកជូនប្រជាជននៅកម្ពុជា នេះជាគោលដៅរបស់យើង។ យើងមិននាំចេញវត្ថុធាតុដើមហើយទៅទិញនាំចូលវត្ថុសម្រេចនោះទេ យើងក៏មានសិទ្ធិផលិត និងផ្គត់ផ្គង់ទីផ្សារខ្លួនឯង»។
សម្តេចធិបតីលើកឡើងថា នៅពេលដែលបរិមាណ និងគុណភាពធនធានមនុស្សរបស់កម្ពុជា មានជំនាញពីឧស្សាហកម្មគ្រឿងយន្តនេះកាន់តែច្រើន នៅថ្ងៃខាងមុខ នឹងអាចទាក់ទាញបានក្រុមហ៊ុនផ្សេងទៀតមកកម្ពុជាផងដែរ៕
