សម្តេចធិបតី៖ រោងចក្រដំឡើងរថយន្តតូយ៉ូតានៅកម្ពុជា គឺនាំផលប្រយោជន៍ជាច្រើនដល់សេដ្ឋកិច្ចជាតិ និងពលរដ្ឋខ្មែរ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ការសម្ពោធរោងចក្រដំឡើងរថយន្តរបស់ក្រុមហ៊ុនតូយ៉ូតានៅកម្ពុជា គឺនឹងនាំផលប្រយោជន៍ជាច្រើនទៅដល់សេដ្ឋកិច្ច សង្គម និងប្រជាពលរដ្ឋខ្មែរ ។
ក្នុងពិធីសម្ពោធរោងចក្រដំឡើងរថយន្តតូយ៉ូតា ដែលមានទុកវិនិយោគ៣៧លានដុល្លារ ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នាថ្ងៃទី២ ខែឧសភា ឆ្នាំ២០២៤ សម្ដេចធិបតី មានប្រសាសន៍ថា ការបើករោងចក្រផលិតនៅក្នុងប្រទេស មិនចំណាយថ្លៃពន្ធនាំចូល នោះនឹងធ្វើឱ្យប្រជាជនអាចទិញប្រើប្រាស់ក្នុងតម្លៃសមរម្យ។ ទោះបីមិនបង់ពន្ធនាំចូល តែក្រុមហ៊ុនក៏ត្រូវបង់ពន្ធក្នុងស្រុកដែរ ព្រោះនៅពេលប្រជាជនទិញប្រើប្រាស់ច្រើន នឹងមានការបង់ពន្ធផ្សេងៗទៀត។
សម្ដេចធិបតី បញ្ជាក់ថា «ការសម្ពោធរោងចក្រដំឡើងរថយន្តរបស់ក្រុមហ៊ុនតូយ៉ូតានាពេលនេះ គឺនាំផលប្រយោជន៍ជាច្រើនជូនទៅដល់សេដ្ឋកិច្ចជាតិ និងប្រជាពលរដ្ឋកម្ពុជា ហើយសំខាន់គឺលើកកម្ពស់លទ្ធភាព និងកិត្យានុភាពរបស់កម្ពុជា ក៏ជាមោទនភាពរបស់ជាតិយើងផង របស់ប្រជាជនខ្មែរយើងផង»។
សម្ដេចបានបន្តថា បច្ចុប្បន្ននៅកម្ពុជាមិនត្រឹមតែមានក្រុមហ៊ុនផលិតប្រើប្រាស់ក្នុងស្រុកប៉ុណ្ណោះទេ តែក៏មានក្រុមហ៊ុនផលិតទំនិញ ផលិតផលនាំចេញក្រៅស្រុកទៀតដែរ។ នេះហើយជាមហិច្ឆតារបស់កម្ពុជា ដែលពីមុនធ្លាប់តែជាប្រទេសនាំចូលគ្រប់មុខ តែឥឡូវនេះមានសមត្ថភាពអាចផលិតខ្លួនឯង ពង្រីកការផ្គត់ផ្គង់ ពង្រីកមុខទំនិញកាន់តែច្រើនជាងមុខ។
សម្ដេចលើកឡើងថា ការបង្កើនជីវភាពរស់នៅរបស់ប្រជាជន មិនមែនត្រឹមតែបង្កើនតែប្រាក់បៀវត្សរ៍របស់ពួកគាត់នោះទេ តែក៏ត្រូវរក្សានូវថ្លៃទំនិញ ដើម្បីធ្វើឱ្យចំណាយរបស់ពួកគាត់នៅតិច មានលទ្ធភាពទិញបានច្រើន ហើយសល់ប្រាក់ច្រើនសម្រាប់ប្រើប្រាស់លើផ្នែកផ្សេងៗ។ ដូច្នេះការរក្សាអតិផរណារបស់កម្ពុជា គឺជាការសំខាន់ៗ ៕
