សម្តេចធិបតី ហ៊ុន ម៉ាណែត ស្នើឲ្យក្រុមហ៊ុនដំឡើងរថយន្តតូយ៉ូតា បើកឱកាសឲ្យយុវជនកម្ពុជា អាចចូលមកធ្វើកម្មសិក្សា ឬហាត់ការ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើសុំឲ្យក្រុមហ៊ុនដំឡើងរថយន្តតូយ៉ូតា បើកឱកាសឲ្យយុវជនរបស់កម្ពុជា អាចមានឱកាស ចូលមកធ្វើកម្មសិក្សាការី ឬហាត់ការទៅទីនេះ ដែលសហការជាមួយនឹងក្រសួងការងារ និងបណ្ដុះបណ្ដាលវិជ្ជាជីវៈ ដែលកំពុងរៀបចំនូវកម្មវិធី នឹងដាក់ចេញនូវកម្មវិធីរបស់រាជរដ្ឋាភិបាល ក្នុងការបណ្ដុះបណ្ដាលវិជ្ជាជីវៈ។
ក្នុងឱកាសអញ្ជើញសម្ពោធរោងចក្រដំឡើងរថយន្តតូយ៉ូតា ក្នុងតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ នាថ្ងៃទី២ ខែឧសភា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា ការដាក់សម្ពោធឲ្យដំណើរការរោងចក្រដំឡើងរថយន្តតូយ៉ូតា របស់ក្រុមហ៊ុនតូយ៉ូតា ស៊ុយស៊ូ មេនូហ្វេក ឈឺរីង ខេមបូឌា ក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ នាពេលនេះ គឺជាការរួមចំណែកយ៉ាងសំខាន់មួយទៀត ក្នុងវិស័យឯកជន ក្នុងការអភិវឌ្ឍឧស្សាហកម្ម ក៏ដូចជាសេដ្ឋកិច្ចជាតិ ។
សម្តេចធិបតី ហ៊ុន ម៉ាណែត លើកឡើងថា តាមរយៈក្រុមហ៊ុនដំឡើងរថយន្តតូយ៉ូតានាពេលនេះ នឹងចូលរួមបង្កើតភាពប្រកួតប្រជែង ការលើកកម្ពស់ ការធ្វើពិពិធកម្ម ការធ្វើទំនើបកម្មឧស្សាហកម្ម ក៏ដូចជាការផ្តល់ឱកាស និងជម្រើសការងារប្រកបដោយជំនាញកាន់តែច្រើន ដល់ប្រជាពលរដ្ឋកម្ពុជា។
សម្តេចធិបតី មានប្រសាសន៍ថា ការបង្កើតការងារផ្សេងៗ ជារឿងមួយ ប៉ុន្តែបន្ថែមទាំងនោះ ការបង្កើតរោងចក្របច្ចេកវិទ្យាខ្ពស់បែបនេះ គឺផ្តល់លទ្ធភាព នៅក្នុងការផ្ទេរបច្ចេកវិទ្យា ពីប្រទេសជប៉ុនមកកម្ពុជា ពីក្រុមហ៊ុនដែលបច្ចេកវិទ្យាខ្ពស់ គឺផ្ទេរមកកម្ពុជា។ សម្តេចធិបតីថា ការផ្ទេរបច្ចេកវិទ្យានេះ ក្នុងទម្រង់២ គឺទម្រង់ទី១៖ ហេដ្ឋារចនាសម្ព័ន្ធ និងគ្រឿងយន្ត និងទម្រង់ទី២៖ មនុស្ស ៕
