សម្តេចធិបតី៖ មន្ត្រីរាជការត្រូវបណ្ដេញចេញពីក្របខណ្ឌ ដោយសារគ្រឿងញៀន គឺមិនអនុញ្ញាតឱ្យចូលក្របខណ្ឌរដ្ឋឡើងវិញឡើយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យដឹងថា មន្ត្រីរាជការដែលត្រូវបានបណ្ដេញចេញពីក្របខណ្ឌ ដោយសារជាប់ពាក់ព័ន្ធគ្រឿងញៀន គឺមិនអនុញ្ញាតឲ្យចូលបម្រើការងារជាមន្ត្រីរាជការ នៅក្នុងស្ថាប័នរដ្ឋណាមួយផ្សេងទៀតបានទេ។

ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់អាជ្ញាធរជាតិ​ ប្រយុទ្ធប្រឆាំងគ្រឿងញៀន និងផ្សព្វផ្សាយផែនការយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់ លើកទី៩ នារសៀលថ្ងៃទី២០ ខែកុម្ភៈ ឆ្នាំ២០២៤នេះ សម្តេចធិបតី ហ៊ុន ម៉ាណែត បញ្ជាក់ថា «ថ្ងៃមុន ឯកឧត្តម អភិសន្តិបណ្ឌិត ស សុខា បានលើកនូវគំនិតផ្តួចផ្តើមមួយ ពិភាក្សាជាមួយឯកឧត្តម ទៀ សីហា ខ្ញុំឯកភាព បានឲ្យចារហើយ ឲ្យធ្វើទិន្ន័យមួយ (Database) ពិភាក្សាជាមួយក្រសួងការពារជាតិ ជាមួយមុខងារសាធារណៈ ឯកឧត្តម ហ៊ុន ម៉ានី ធ្វើបញ្ជីមួយ ចែករំលែកទិន្ន័យ អ្នកដែលត្រូវបណ្តេញចេញពីក្របខ័ណ្ឌដោយគ្រឿងញៀន និងកំហុសធ្ងន់ ត្រូវចែករំលែកទិន្ន័យនេះឲ្យដឹង កុំឲ្យដេញចេញពីមួយ​រត់ចូលមួយទៀត ដាក់ឲ្យជាប់តែម្តង ។ ពិនិត្យជាមួយខាងក្រសួងយុត្តិធម៌ គិតគូរឥឡូវយើងគ្រាន់តែចែករំលែក ទិន្និន័យទេ ទៅមុខទៀតកំពុងគិតគូរក្រមវិធានការ ទៅខាងមុខ ដោយផ្អែកទៅលើគោលការណ៍ច្បាប់ គោលការណ៍សន្តិសុខជាតិ គោលការណ៍សន្តិសុខសង្គម គោលការណ៍សិទ្ធិបុគ្គល និងគោលការណ៍ផលប្រយោជន៍សហគមន៍ គិតគូរ ថាតើបើអ្នកទទួលអាហ្នឹងហើយ (គ្រឿងញៀន)​ ថាទៅបន្តទទួលទោសស្អីទៀត កុំឲ្យរួចតែខ្លួន» ។

សូមជម្រាបថា នៅថ្ងៃនេះដែរសម្ដេចមហាបវរធិបតី បានចេញបទបញ្ជា ស្តីពី “ការដាក់ចេញវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ” ។ ក្នុងនោះរាជរដ្ឋាភិបាលមានភាពចាំបាច់ ក្នុងការដាក់ចេញនូវវិធានការដ៏ម៉ឺងម៉ាត់តាមរយៈបទបញ្ជាដាច់ខាត ដូចខាងក្រោម៖

១, គ្រប់ក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រូវបង្កើនការត្រួតពិនិត្យជាប្រចាំចំពោះមន្ត្រីរាជការស៊ីវិល មន្ត្រីនគរបាលជាតិ និងយោធិន ព្រមទាំងមន្ត្រីជាប់កិច្ចសន្យាដែលស្ថិតក្រោមឱវាទរបស់ខ្លួនលើការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់។

២, គ្រប់ក្រសួង ស្ថាប័ន និងរដ្ឋបាលថ្នាក់ក្រោមជាតិ ត្រូវចាត់វិធានការបញ្ចប់មុខតំណែង និងបណ្តេញចេញពីក្របខ័ណ្ឌដោយគ្មានការលើកលែង ចំពោះមន្ត្រីរាជការស៊ីវិល មន្ត្រីនគរបាលជាតិ និងយោធិន ព្រមទាំងមន្ត្រីជាប់កិច្ចសន្យាណាដែលត្រូវបានរកឃើញថាមានការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធនឹងគ្រឿងញៀនខុសច្បាប់។

៣, ការអនុវត្តទណ្ឌកម្មខាងវិន័យនេះ ពុំរារាំងដល់ការអនុវត្តទណ្ឌកម្មព្រហ្មទណ្ឌដោយអនុលោមតាមច្បាប់ និងបទប្បញ្ញត្តិជាធរមានឡើយ ៕