ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក អញ្ជើញចូលរួមប្រជុំឆ្លងការងារគ្រប់គ្រង និងដោះស្រាយហានិភ័យគ្រោះទឹកជំនន់ និងគ្រោះរាំងស្ងួត ជាមួយក្រសួងសេដ្ឋកិច្ច និងហិរញ្ញវត្ថុ

ភ្នំពេញ៖ នៅទីស្តីការក្រសួងសេដ្ឋកិច្ច និងហិរញ្ញវត្ថុ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយមបានអញ្ជើញដឹកនាំក្រុមការងារក្រសួងចូលរួមក្នុងកិច្ចប្រជុំត្រួតពិនិត្យ និងឆ្លងការងារគ្រប់គ្រង និងដោះស្រាយបញ្ហាគ្រោះហានិភ័យដែលបង្កឡើងដោយគ្រោះទឹកជំនន់ និងគ្រោះរាំងស្ងួតក្នុងក្របខ័ណ្ឌទូទាំងប្រទេស ក្រោមអធិបតីភាពឯកឧត្តម ប៉ែន ធីរុង្គ អនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ។

ឯកឧត្តមរដ្ឋលេខាធិការបានមានប្រសាសន៍ថា ក្រោមកិច្ចសហការដ៏រឹងមាំពីសំណាក់ក្រសួងសេដ្ឋកិច្ច និងហិរញ្ញវត្ថុ និងអនុវត្តតាមបទបញ្ជាដ៏ខ្ពង់ខ្ពស់របស់សម្តេចមហាបរវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្រសួងធនធានទឹក និងឧតុនិយមបានអនុវត្តដោយម៉ឺងម៉ាត់កំណត់អាទិភាពលើអាទិភាពការងារដូចខាងក្រោម៖

ទី១) ធ្វើការសាងសង់ទំនប់លេខ ២ និងលេខ ៤ ក្បាលស្ទឹងពោធិ៍សាត់ ក្នុងខេត្តពោធិ៍សាត់ ដែលស្តុកទឹកទុកបានចំនួន ១៥០០ លានម៉ែត្រត្រីគុណ ដើម្បីដោះស្រាយបញ្ហាគ្រោះទឹកជំនន់ និងគ្រោះរាំងស្ងួតដែលតែងតែយាយីក្នុងខេត្តនេះជាប្រចាំ។

ទី២) ធ្វើការសាងសង់ទំនប់អាងស្ទឹងក្រញូងពីលើក្បាលស្ទឹងសង្កែដែលមានលទ្ធភាពស្តុកទឹកបានចំនួន ៥០០ លានម៉ែត្រត្រីគុណ ក្នុងខេត្តបាត់ដំបង ដែលមានលទ្ធភាពដោះស្រាយបញ្ហាទឹកជំនន់ និងគ្រោះរាំងស្ងួតដែលតែងកើតមានជារឿយៗ ជាពិសេសជួយដោះស្រាយបានទាំងគ្រោះរាំងស្ងួតដែលតែងកើតមានលើតំបន់សំឡូត តំបន់រតនមណ្ឌល តំបន់គាស់ក្រឡ តំបន់មោងឫស្សី តំបន់ព្រែកជីក តំបន់ឯកភ្នំ តំបន់វាលទ្រា តំបន់អូរតាគី តំបន់បាណន់ និងតំបន់បវេល។

ទី៣) ធ្វើការសាងសង់ទំនប់អាងកំពង់គោ ក្នុងខេត្តកំពង់ធំ ដែលស្តុកទឹកបានចំនួន ៥០០ លានម៉ែត្រត្រីគុណ ធានាបាននូវសន្តិសុខទឹកលើគ្រប់វិស័យបានចំនួន ៣០០ ០០០ ហិកតា បញ្ចៀសការលិចលង់ដល់តំបន់ក្រុងស្ទឹងសែន ស្រុកសន្ទុក ស្រុកកំពង់ស្វាយ ស្រុកប្រាសាទសំបូរ និងស្រុកសណ្តាន់ របស់ខេត្តកំពង់ធំ និងធានាសុវត្ថិភាពទឹកឱ្យស្រុកកំពង់លែង និងតំបន់កំពង់ហៅ របស់ខេត្តកំពង់ឆ្នាំងទៀតផង។

ការកសាងទំនប់អាងទឹកកំពង់គោក្នុងខេត្តកំពង់ធំរួចនឹងធ្វើឱ្យខេត្តនៅភូមិភាគកណ្តាលរបស់ប្រទេសកម្ពុជាមួយនេះមានសុវត្ថិភាពទឹកប្រកបដោយនិរន្តរភាព ជំរុញឱ្យមានកំណើនជាអតិបរមាលើវិស័យកសិកម្ម វិស័យកសិឧស្សាហកម្ម វិស័យអេកូទេសចរ ជាពិសេសមានការកើនឡើងទ្វេដងនូវ ត្រី និងប្រភទសត្វកម្រ ព្រមទាំងផ្តល់ទឹកគ្រប់គ្រាន់ដល់ប្រាង្គប្រាសាទនានា ធ្វើឱ្យព្រៃឈើមានពណ៌ខៀវស្រងាត់ និងរីកលូតលាល់ល្អសម្រាប់ជាជម្រករបស់សត្វ និងមនុស្ស៕