រដ្ឋបាលខេត្តក្រចេះ ចេញសេចក្តីណែនាំស្ដីពីការបង្ការ និងទប់ស្កាត់ការឆ្លងរាលដាលនៃជំងឺផ្តាសាយបក្សី (H5N1) នៅក្នុងភូមិសាស្ត្រខេត្ត

ភ្នំពេញ៖ នាថ្ងៃទី០៩ ខែកុម្ភៈ ឆ្នាំ២០២៤ រដ្ឋបាលខេត្តក្រចេះ បានចេញសេចក្តីណែនាំស្ដីពីការបង្ការ និងទប់ស្កាត់ការឆ្លងរាលដាលនៃជំងឺផ្តាសាយបក្សី (H5N1) នៅក្នុងភូមិសាស្ត្រខេត្ត។

បើយោងតាមលទ្ធផលវិភាគ ចុះថ្ងៃទី០៨ ខែកុម្ភៈ ឆ្នាំ២០២៤ របស់មន្ទីរពិសោធន៍វិទ្យាស្ថានជាតិសុខភាពសាធារណ: បានធ្វើវិភាគលើអ្នកជំងឺឈ្មោះ រឿន វីរុន (ROEUN VIRUN) ភេទប្រុស អាយុ ៩ឆ្នាំ មានទីលំនៅភូមិកាប៉ូ១ សង្កាត់អូរឬស្សី ក្រុងក្រចេះ ខេត្តក្រចេះ បានរកឃើញមានវីរុសផ្ដាសាយបក្សី ដែលបង្កដោយវីរុស (H5N1)។

ក្នុងន័យនេះ ដើម្បីបង្ការ និងទប់ស្កាត់ការឆ្លងរាលដាលនៃជំងឺផ្តាសាយបក្សី (H5N1) ពីបក្សីទៅបក្សី និងពីបក្សីទៅមនុស្ស ក្នុងគោលបំណងការពារអាយុជីវិតរបស់ប្រជាពលរដ្ឋ ការពារសុខភាពសាធារណៈ និងសណ្តាប់ធ្នាប់សង្គម រដ្ឋបាលខេត្តក្រចេះ សូមធ្វើការណែនាំដល់មន្ទីរ-អង្គភាពជុំវិញរដ្ឋបាលខេត្ត រដ្ឋបាលក្រុង ស្រុក ឃុំ សង្កាត់ និងប្រជាពលរដ្ឋក្នុងខេត្តក្រចេះ ចូលរួមអនុវត្តវិធានការ ដូចខាងក្រោម៖
១. ត្រូវយកចិត្តទុកដាក់ប្រុងប្រយ័ត្នចំពោះជំងឺផ្តាសាយបក្សី។
២. ត្រូវលាងដៃឱ្យបានញឹកញាប់ជាមួយសាប៊ូ និងទឹកមុនពេលបរិភោគអាហារ និងបន្ទាប់ពីប៉ះពាល់ជាមួយបក្សី។
៣. កុំបរិភោគសត្វបក្សីដែលឈឺឬងាប់ និងរាល់សត្វបក្សីដែលធ្វើសម្រាប់បរិភោគត្រូវចម្អិនអោយបានឆ្អិនល្អ។
៤. បំផ្លាញចោលចំពោះសត្វបក្សីដែលមានការសង្ស័យ (សាកសពបក្សី)។
៥. ពង្រឹងការអនុវត្តវិធានការជីវសុវត្ថិភាពឱ្យបានហ្មត់ចត់នៅគ្រប់កសិដ្ឋានចិញ្ចឹមបក្សី កន្លែងចិញ្ចឹមបក្សី កន្លែង ប្រមូលផ្តុំបក្សី កន្លែងអាជីវកម្មបក្សី និងសត្តឃាតដ្ឋានបក្សី ព្រមទាំងបង្កើនការអង្កេត តាមដាន ឃ្លាំមើល ត្រួតពិនិត្យសុខភាពបក្សីនៅទូទាំងខេត្ត និងចាត់វិធានការឱ្យបានទាន់ពេលវេលាក្នុងករណីសង្ស័យមានជំងឺ ផ្តាសាយបក្សី។
៦. ត្រូវបង្កើនការត្រួតពិនិត្យចរាចរណ៍សត្វ និងផលិតផលសត្វបន្ថែម ដោយសហការជាមួយអាជ្ញាធរមូល ដ្ឋានគ្រប់ថ្នាក់ និងសមត្ថកិច្ចពាក់ព័ន្ធ។
៧. ត្រូវពង្រឹងការទប់ស្កាត់ការនាំចូលបក្សី និងផលិតផលពីបក្សីខុសច្បាប់ដែលឆ្លងកាត់តាមច្រកទ្វារព្រំដែន និង នាំចេញ-ចូលទាំងក្រៅខេត្ត និងក្នុងខេត្ត ឬពីតំបន់មួយទៅតំបន់មួយ ដោយសហការជាមួយអាជ្ញាធរមូលដ្ឋាន ពិសេសសមត្ថកិច្ចច្រកចេញ-ចូលតាមព្រំដែន។
៨. រាល់ការចរាចរណ៍បក្សី និងផលិតផលពីបក្សីពីតំបន់ដែលមានផ្ទះជំងឺផ្តាសាយបក្សី ឬសង្ស័យមាន ជំងឺផ្តាសាយបក្សី អាជ្ញាធរមានសមត្ថកិច្ចត្រូវធ្វើការត្រួតពិនិត្យឱ្យហ្មត់ចត់ស្របតាមបទដ្ឋានបច្ចេកទេស។
៩. ត្រូវបង្កើនការអប់រំ និងផ្សព្វផ្សាយឱ្យបានទូលំទូលាយដល់ប្រជាពលរដ្ឋ កសិករចិញ្ចឹមបក្សី ម្ចាស់កសិដ្ឋាន ចិញ្ចឹមបក្សី ម្ចាស់សត្តឃាតដ្ឋានបក្សី អ្នកពិឃាតបក្សី អ្នកធ្វើអាជីវកម្មទិញ-លក់បក្សី និងផលិតផលពីបក្សី ត្រូវយកចិត្តទុកដាក់ធ្វើអនាម័យបាញ់ថ្នាំសម្លាប់មេរោគ និងអនុវត្តវិធានការជីវសុវត្ថិភាពក្នុងការចិញ្ចឹមបក្សី នៅពេលចរាចរណ៍ដឹកជញ្ជូនបក្សី និងផលិតផលពីបក្សី សកម្មភាពពិឃាតបក្សី និងកន្លែងតាំងលក់នៅ ទីផ្សារ ជាពិសេសផលប៉ះពាល់នៃជំងឺផ្តាសាយបក្សី និងវិធានការការពារជំងឺផ្តាសាយបក្សី។
១០. ករណ៏សង្ស័យមានផ្ទុះជំងឺផ្តាសាយបក្សី ចេញរោគសញ្ញាដូចជា គ្រុនក្តៅ ក្អក ពិបាកដកដង្ហើម និងមាន ប្រវត្តិប៉ះពាល់ជាមួយសត្វបក្សី ឈឺឬងាប់ក្នុងអំឡុងពេល ១៤ថ្ងៃមុន សូមធ្វើការទំនាក់ទំនង ឬរាយការណ៍ ជាបន្ទាន់ទៅអាជ្ញាធរមូលដ្ឋាន និងទៅពិនិត្យសុខភាពនៅមណ្ឌលសុខភាព ឬមន្ទីរពេទ្យដែលនៅជិតបំផុត ៕