មន្ត្រីជំនាញក្រសួងធនធានទឹក ចុះសិក្សា និងវាយតម្លៃគម្រោងស្នើសុំរបស់មន្ទីរធនធានទឹក និងឧតុនិយមខេត្តបន្ទាយមានជ័យ
ភ្នំពេញ៖ នៅថ្ងៃព្រហស្បតិ៍ ១៤រោច ខែបុស្ស ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៨ ខែកុម្ភៈ ឆ្នាំ២០២៤ មន្ត្រីនាយកដ្ឋានវិស្វកម្ម នៃក្រសួងធនធានទឹក និងឧតុនិយម បានចុះសិក្សាវាយតម្លៃគម្រោងដែលជាការស្នើសុំរបស់មន្ទីរធនធានទឹក និងឧតុនិយម ខេត្តបន្ទាយមានជ័យ។
បើតាមក្រុមការងារបានឱ្យដឹងថា មន្ទីរធនធានទឹក និងឧតុនិយមខេត្តបន្ទាយមានជ័យ មានសំណើរគម្រោងចំនួន៣ ជាគម្រោងខ្នាតធំស្ថិតនៅក្នុងផែនការរំកិលរបស់មន្ទីរ និងគម្រោងស្នើសុំបន្ទាន់ចំនួន ២ ផងដែរ ក្នុងឆ្នាំ២០២៤នេះ។
សូមជម្រាបថា គម្រោងខ្នាតធំចំនួន៣ ស្ថិតក្នុងផែនការរំកិលរបស់មន្ទីររួមមាន៖ ទី១) ស្ដារប្រឡាយសឿអូរញរប្រវែង ៣២,០០០ម៉ែត្រ ទី២)ស្ដារអូរពីអូរសំព័រ មកសាយសាម៉នប្រវែង ៨០,០០០ម៉ែត្រ និងទី៣) ពង្រីកប្រឡាយនាំទឹកពីប្រឡាយបេតុង ចូលអាងត្រពាំងថ្មប្រវែង ៧,០០០ម៉ែត្រ។
ជាមួយគ្នានេះ មន្ទីរបានស្នើសុំបន្ទាន់ក្នុងឆ្នាំ២០២៤ នូវគម្រោងស្តារប្រឡាយចំនួន២ គឺទី១)គម្រោងស្តារប្រឡាយស្របផ្លូវសាយសាម៉នប្រវែង ៨,០០០ម៉ែត្រ និងទី២)គម្រោងស្តារប្រឡាយបឹងកែប្រវែង ១៤,៥០០ម៉ែត្រ។
តាមការបញ្ជាក់របស់លោកប្រធានមន្ទីរធនធានទឹក និងឧតុនិយមខេត្តបន្ទាយមានជ័យបានឱ្យដឹងថា គម្រោងស្នើស្តារប្រឡាយចំនួន២ ខាងលើស្ថិតនៅក្នុងស្រុកមង្គលបូរី មានសារសំខាន់បម្រើឱ្យការស្រោចស្រព និងជួយដោះទឹកជំនន់ចេញពីទីរួមខេត្ត ៕
