នាយករដ្ឋមន្ត្រី៖ កម្ពុជា មានសិទ្ធស្នើសុំដាក់ «សង្ក្រាន្តនៅកម្ពុជា» ទៅក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា នៅពេលខាងមុខ កម្ពុជា មានសិទ្ធស្នើសុំដាក់ «សង្ក្រាន្តនៅកម្ពុជា» ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ។

ក្នុងឱកាសអញ្ជើញបិទសន្និបាតបូកសរុបការងារឆ្នាំចាស់ និងលើកទិសដៅការងារឆ្នាំថ្មីរបស់ក្រសួងការងារ និងបណ្តុះបណ្តាលវិជ្ជាជីវៈ នាថ្ងៃទី៨ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត បញ្ជាក់ថា «ខ្ញុំបបួលឯកឧត្តម សេដ្ឋា (នាយករដ្ឋមន្ត្រីថៃ) ឥលូវជិតចូលឆ្នាំហើយ យើងចូលឆ្នាំទាំងពីរ។ រឿងហ្នឹង ក៏មានការយល់ច្រឡំច្រើន គឺថៃគាត់សុំចុះបេតិកភណ្ឌវប្បធម៌អរូបីនៃមនុស្សជាតិ សង្ក្រាន្ត (នៅថៃ)។ ថៃ អត់មានទៅយករបស់ខ្មែរចុះនោះទេ។ សង្ក្រាន្តនេះ វានៅមានប្រទេសដែលកាន់ព្រះពុទ្ធសាសនា សង្ក្រាន្តនៅកម្ពុជា និងសង្ក្រាន្តនៅថៃ គាត់ចុះសង្ក្រាន្តនៅថៃ។ យើងក៏មានដែរ ក្រសួងវប្បធម៌ ទៅថ្ងៃមុខក៏កំពុងពិចារណាដាក់សង្ក្រាន្តនៅកម្ពុជា ជាបេតិកភណ្ឌដែរ»។

សម្តេចបន្តថា «វប្បធម៌ វាស្រដៀងគ្នា ដូចស្រដៀងរវាងមួយថៃ និងគុនខ្មែរ។ សង្ក្រាន្ត ដែលថៃចុះ គឺ Songkran in Thailand កម្ពុជា ក៏មានសិទ្ធិចុះសង្ក្រាន្តនៅកម្ពុជាដែរ។ វាអត់មានអីខុសទេ សុំបញ្ជាក់។ ហើយកុំឲ្យយករឿងយល់ច្រឡំ ទៅឈ្លោះគ្នារវាងប្រទេសជាតិឲ្យសោះ»។

សូមបញ្ជាក់ថា សព្វថ្ងៃ មានប្រទេសជាច្រើនលើលោកនេះ ដែលប្រារព្ធសង្ក្រាន្ត រួមមាន៖ បង់ក្លាដេស, កម្ពុជា, ឡាវ, មីយ៉ាន់ម៉ា, ស្រីលង្កា, ថៃ, ផ្នែកនៃភាគឦសាននៃប្រទេសឥណ្ឌា, ផ្នែកនៃប្រទេសវៀតណាម និងក្រុងស៊ីហ្សួងបាន់ណា (Xishuangbanna) ប្រទេសចិន។ ចំពោះនីតិវិធីរបស់អង្គការយូណេស្កូ តម្រូវឱ្យគ្រប់ប្រទេសអាចចុះបញ្ជីបេតិកភណ្ឌអរូបី រយៈពេល ២ឆ្នាំម្តង៕