យប់ថ្ងៃទី៧ នៃការរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល សមត្ថកិច្ចឃាត់យានយន្តល្មើស ១០០គ្រឿង

ភ្នំពេញ៖ លោកវរសេនីយ៍ឯក សំ វិច្ឆិកា អ្នកនាំពាក្យស្នងការនគរបាលរាជធានីភ្នំពេញ បានឱ្យដឹងថា នៅយប់ថ្ងៃទី៧ គឺយប់ថ្ងៃទី៣១ ខែមករា ឆ្នាំ២០២៤នេះ ការអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល សមត្ថកិច្ចឃាត់យានយន្តល្មើស ចំនួន១០០គ្រឿង ក្នុងនោះរថយន្ត ចំនួន៣៥រឿង និងម៉ូតូ ចំនួន៦៥គ្រឿង។

លោកបន្តថា ការរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុលនេះ ធ្វើឡើងដោយអនុវត្តតាមបទបញ្ជាផ្ទាល់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការដឹកនាំត្រួតពិនិត្យអនុវត្តផ្ទាល់ពី ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ។

លោកវរសេនីយ៍ឯក សំ វិច្ឆិកា បានបញ្ជាក់ថា “នៅយប់ថ្ងៃទី៣១ ខែមករា ឆ្នាំ២០២៤ តាមបណ្តាអធិការដ្ឋាននគរបាលខណ្ឌ បានចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល ឃាត់យានយន្តល្មើស ចំនួន១០០គ្រឿង (រថយន្ត ចំនួន៣៥គ្រឿង, ម៉ូតូ ចំនួន៦៥គ្រឿង) ដែលក្នុងមាន ល្មើសជាតិស្រវឹង ចំនួន៥៦គ្រឿង កម្រិត ០.២៥ – ០.៣៩ mg/L ចំនួន២១គ្រឿង អ្នកបើកបរម៉ូតូ ចំនួន១១នាក់ អ្នកបើកបររថយន្ត ចំនួន១០នាក់ ដោយឡែក កម្រិត ០.៤០ mg/L ឡើង ចំនួន៣៥គ្រឿងមានអ្នកបើកបរម៉ូតូ ចំនួន២៣នាក់ និងអ្នកបើកបររថយន្ត ចំនួន១២នាក់ ចំពោះបទល្មើសផ្សេងៗ ចំនួន៤៤គ្រឿង ក្នុងនោះអ្នកអត់មួកសុវត្ថិភាព ចំនួន៣១គ្រឿង, រថយន្តអត់ប័ណ្ណបើកបរចំនួន០៦គ្រឿង, រថយន្តធំខុសប័ណ្ណបើកបរប្រភេទយានចំនួន០១គ្រឿង, រថយន្តធំដឹងសំពីងសំពោងចំនួន០៣គ្រឿង និងរថយន្តបើកបរល្មើសសញ្ញាចរាចរណ៍ចំនួន០៣គ្រឿង។ ដោយឡែក វិធានការអប់រំ បានអប់រំអ្នកបើកបរមានជាតិអាល់កុលក្រោម ០.២៥ mg/L ចំនួន៨៥នាក់ ក្នុងនោះមានអ្នកបើកបរម៉ូតូចំនួន៤០នាក់, អ្នកបើកបររថយន្តចំនួន៤៥នាក់ និងអប់រំអ្នកបើកបរមិនពាក់មួកសុវត្ថិភាព ចំនួន១៣៤នាក់”។

ក្នុងនោះផងដែរលោកវរសេនីយ៍ឯក សំ វិច្ឆិកា បានហាមដាច់ខាតមិនឱ្យមានការអន្តរាគមន៍ ក្នុងករណីណាមួយដែលមានការអន្តរាគមន៍ពាក់ព័ន្ធការល្មើសច្បាប់ចរាចរណ៍ផ្លូវគោក ជាពិសេសអ្នកបើកបរទទួលទានជាតិស្រវឹង និងធ្វើរបាយការណ៍ជូនថ្នាក់ដឹកនាំ។

ជាមួយគ្នានោះលោកអ្នកនាំពាក្យបានអំពានាវដល់ប្រជាពលរដ្ឋដែលធ្វើដំណើរនៅតាមដងផ្លួវសាធារណៈ ត្រូវមានការចូលរួមគោរពច្បាប់ចរាចរណ៍ផ្លូវគោកឱ្យបានគ្រប់គ្នា ជាពិសេសនៅក្នុងរាជធានីភ្នំពេញ ដោយអត្រាគ្រោះថ្នាក់ចរាចរណ៍មានបញ្ហាកើនឡើងនៅពេលយប់។ ដូច្នេះ ប្រជាពលរដ្ឋត្រូវមានការប្រុងប្រយ័ត្នឱ្យបានខ្ពស់ និងកុំពិសារគ្រឿងស្រវឹងនៅពេលបើកបរ ៕