បរទេស៖ អាជ្ញាធរ Houthi របស់ប្រទេសយេម៉ែនបានបញ្ជាឱ្យបុគ្គលិកអាមេរិក និងអង់គ្លេស នៃអង្គការសហប្រជាជាតិ និងអង្គការមនុស្សធម៌ដែលមានមូលដ្ឋាននៅទីក្រុង Sanaa ចាកចេញពីប្រទេសក្នុងរយៈពេលមួយខែ។
ការសម្រេចចិត្តនេះធ្វើឡើងបន្ទាប់ពីសហរដ្ឋអាមេរិក និងអង់គ្លេស ដោយមានការគាំទ្រពីប្រទេសផ្សេងៗ ដោយវាយលុកគោលដៅយោធារបស់ក្រុមសម្ព័ន្ធមិត្តអ៊ីរ៉ង់ ដែលបាននិងកំពុងបើកការវាយប្រហារលើនាវាពាណិជ្ជកម្មនៅសមុទ្រក្រហម ដែលត្រូវបានគេបញ្ជាក់ថាមានទំនាក់ទំនងជាមួយអ៊ីស្រាអែល។
រដ្ឋាភិបាលសហរដ្ឋអាមេរិកកាលពីសប្តាហ៍មុនក៏បានប្រគល់ក្រុមនេះទៅក្នុងបញ្ជីក្រុមភេរវករផងដែរ នៅពេលដែលទីក្រុងវ៉ាស៊ីនតោនព្យាយាមទប់ស្កាត់ការវាយប្រហារលើការដឹកជញ្ជូនអន្តរជាតិនៅសមុទ្រក្រហម។ ក្រុម Houthis បានឲ្យដឹងថា ការវាយប្រហាររបស់ពួកគេគឺនៅក្នុងសាមគ្គីភាពជាមួយប៉ាឡេស្ទីន នៅពេលដែលអ៊ីស្រាអែលវាយប្រហារតំបន់ហ្គាហ្សា។
លិខិតមួយផ្ញើដោយក្រសួងការបរទេស Houthi ផ្ញើជូនអ្នកសម្របសម្រួលផ្នែកមនុស្សធម៌ស្តីទីរបស់អង្គការសហប្រជាជាតិនៅប្រទេសយេម៉ែនបាននិឲ្យដឹងថា ក្រសួងសូមសង្កត់ធ្ងន់ថាអ្នកត្រូវតែជូនដំណឹងដល់មន្ត្រី និងកម្មករដែលមានសញ្ជាតិអាមេរិក និងអង់គ្លេស ដើម្បីត្រៀមខ្លួនចាកចេញពីប្រទេសក្នុងរយៈពេល៣០ថ្ងៃ។
លិខិតនោះក៏បានបញ្ជាឲ្យអង្គការបរទេសមិនជួលពលរដ្ឋអាមេរិក និងអង់គ្លេសសម្រាប់ប្រតិបត្តិការរបស់យេម៉ែន។
ការិយាល័យរបស់ Hawkins ដែលខ្លួនគាត់ជាជនជាតិអង់គ្លេសមិនបានឆ្លើយតបនឹងសំណើសុំការអត្ថាធិប្បាយទេ។ ស្ថានទូតអាមេរិក និងអង់គ្លេសនៅយេម៉ែនមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
ចលនា Houthi គ្រប់គ្រងភាគច្រើននៃប្រទេសយេម៉ែន បន្ទាប់ពីសង្គ្រាមជិតមួយទសវត្សរ៍ប្រឆាំងនឹងក្រុមចម្រុះដែលគាំទ្រដោយសហរដ្ឋអាមេរិក និងដឹកនាំដោយអារ៉ាប៊ីសាអូឌីត។ សង្រ្គាមបានផ្លាស់ប្តូរទៅជាគ្មានសង្រ្គាម គ្មានសន្តិភាព ខណៈការប្រយុទ្ធគ្នាបានឈប់ជាទ្រង់ទ្រាយធំ ប៉ុន្តែភាគីទាំងពីរបានបរាជ័យក្នុងការបន្តបទឈប់បាញ់ជាផ្លូវការដោយអង្គការសហប្រជាជាតិ។
យន្តហោះចម្បាំង នាវា និងនាវាមុជទឹករបស់សហរដ្ឋអាមេរិក និងអង់គ្លេស បានបើកការវាយប្រហារតាមផ្លូវអាកាសរាប់សិបដងនៅទូទាំងប្រទេសយេម៉ែន ដើម្បីជាការសងសឹកចំពោះការវាយប្រហាររបស់ពួក Houthi ខណៈដែលនាវាកុងតឺន័រត្រូវបានបង្ខំឱ្យបង្វែរចេញពីសមុទ្រក្រហម ដែលជាផ្លូវដឹកជញ្ជូនលឿនបំផុតពីអាស៊ីទៅអឺរ៉ុប។
មន្ទីរបញ្ចកោណបានឲ្យដឹងថា កងកម្លាំងសហរដ្ឋអាមេរិក និងអង់គ្លេសកាលពីថ្ងៃអង្គារបានកំណត់គោលដៅលើទីតាំងផ្ទុកក្រោមដីរបស់ Houthi ក៏ដូចជាសមត្ថភាពមីស៊ីល និងការឃ្លាំមើល។
ប្រភព៖ CNA
ប្រែសម្រួលដោយ៖ ឡាយ លីហួ
