យុវសិស្សចំនួន២៥០នាក់នៅសាលារៀនអន្តរទ្ធីបអាមេរិកាំងសាខាផ្សារថ្មីទទួលបានចំណេះដឹងពីបញ្ហាគ្រឿងញៀននិងបារីអេឡិចត្រូនិក

ភ្នំពេញ៖ នាថ្ងៃទី២៣ ខែមករា ឆ្នាំ២០២៤ អនុវត្តតាមយុទ្ធសាស្រ្តពហុវិស័យ និងយុទ្ធនាការប្រយុទ្ធប្រឆាំងគ្រឿងញៀន អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនសហការជាមួយសាលារៀនអន្តរទ្ធីបអាមេរិកាំងសាខាផ្សារថ្មីផ្សព្វផ្សាយពីផលប៉ះពាល់នៃគ្រឿងញៀននិងបារីអេឡិចត្រូនិកជូនដល់លោកគ្រូ អ្នកគ្រូ បុគ្គលិកសិក្សា សិស្សពីថ្នាក់ទី៧ ដល់ថ្នាក់ទី១២ ចំនួន២៥០នាក់ ស្រី១៣៦នាក់។

លោកចាងហ្វាង ពៅ ភក្តី បានថ្លែងថា គ្រឿងញៀនជាបញ្ហារួម ក្តីបារម្ភរូម ដែលត្រូវតែខិតខំរួមជួយគ្នាតាមគ្រប់លទ្ធភាពធ្វើយ៉ាងឱ្យសិស្សនុសិស្សគ្រប់រូបបានយល់ច្បាស់និងមិនទៅពាក់ព័ន្ធបញ្ហាគ្រឿងញៀននិងបញ្ហាបារីអេឡិចត្រូនិច។

ថ្លែងក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ក្នុងឱកាសនោះ ឯកឧត្តម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ: នៃអគ្គលេខាធិកាដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានអរគុណដល់គណ:គ្រប់គ្រងសាលា ដែលបានផ្តល់កិច្ចសហការចូលរួមអនុវត្តតាមសេចក្តីណែនាំរបស់អាជ្ញាធរជាតិប្រយុទ្ធប្រឆាំងគ្រឿងញៀនដែលមានឯកឧត្តមសន្តិបណ្ឌិត នេត សាវឿន ជាប្រធាន បន្តយកចិត្តរៀបចំពិធីផ្សព្វផ្សាយនេះឡើងដើម្បីពង្រឹងសមត្ថភាព ចំណេះដឹងដល់សិស្សដើម្បីចូលរួមបង្ការ ទប់ស្កាត់ការរីករាលដាលបញ្ហាគ្រឿងញៀននិងបារីអេឡិចត្រូនិកទាំងក្នុងគ្រួសារសាលារៀន និងសហគមន៍របស់ពួកគាត់បញ្ចៀសនូវហានិភ័យ ទុក្ខសោកនាដកម្មចំពោះខ្លួនឯង ក្រុមគ្រួសារ និងសង្គមជាតិ។

ក្នុងឱកាសនោះដែរ ឯកឧត្តម ឧត្តមសេនីយ៍ឯក លឹម តុងហួត បានប្រាប់ឱ្យដឹងថាបន្ថែមទៀតថា យុវជន យុវតី នៅក្នុងវ័យ១៣ឆ្នាំ ដល់១៨ឆ្នាំនេះ គឺជាវ័យមួយដែលពោរពេញដោយការលូតលាស់ចង់សាក ចង់ដឹង ចង់ស្គាល់នូវអ្វីៗដែលថ្មីៗ ដែលតំរូវឱ្យយើងទាំងអស់គ្នាត្រូវតែចូលរួមជួយតម្រង់ទិសពួកគាត់ឱ្យចាប់យកនូវបទពិសោធន៍ល្អ សម្រាប់ជាទុនសម្រាប់ដំណើរឆ្ពោះទៅអនាគតរុងរឿងគេចផុតបានពីអំពើអបាយផ្សេងៗពិសេសគឺបញ្ហាគ្រឿងញៀន និងបញ្ហាបារីអេឡិកត្រូនិក។

តាមរយ: វាគ្មិន លោកឧត្តមសេនីយ៍ត្រី យិន យឿត និងលោកវេជ្ជបណ្ឌិត ចាន់ ផានិត បានឱ្យដឹងថា ពិធីផ្សព្វផ្សាយនេះពិតជាទទួលលទ្ធផលល្អ ព្រោះសិស្សទាំងអស់មានសេចក្តីក្លាហាន តាមរយ:ការចូលរួមសកម្មភាពសហការជាមួយវាគ្មិន ស្តាប់ ចែករំលែកចំណេះដឹង និងចម្ងល់នានាពីបញ្ហាគ្រឿងញៀនដោយទឹកមុខសប្បាយរីករាយស្និទស្នាល “ការទទួលបានព័ត៌មានពិតពីបញ្ហាគ្រឿងញៀន អាចជួយឱ្យមនុស្សជាទីស្រឡាញ់ចាកផុតបានពីបញ្ហាគ្រឿងញៀន” ៕