បាំងកក៖ អភិបាលខេត្តបានឲ្យដឹងថា មនុស្ស ២៣នាក់បានស្លាប់បន្ទាប់ពីការផ្ទុះនៅរោងចក្រកាំជ្រួចនៅភាគកណ្តាលប្រទេសថៃកាលពីថ្ងៃពុធ ទី១៧ ខែមករា។
រូបភាពដែលបានចែករំលែកដោយសេវាសង្គ្រោះក្នុងតំបន់ បានបង្ហាញឱ្យឃើញនូវកំទេចកំទីដែកដែលរាយប៉ាយនៅលើដី និងផ្សែងខ្មៅយ៉ាងសន្ធោសន្ធៅ។
ការបំផ្ទុះបានកើតឡើងនៅម៉ោងប្រហែល ៣ រសៀល (០៨០០ GMT) នៅជិតទីប្រជុំជន Sala Khao ក្នុងខេត្ត Suphan Buri កណ្តាល។
យើងបានទទួលរបាយការណ៍ពីក្រុម EOD ថាមានអ្នកស្លាប់ចំនួន ២៣ នាក់។ លោក Nattapat Suwanprateep អភិបាលខេត្ត Suphan Buri បានប្រាប់ AFP ដោយយោងទៅលើក្រុមអ្នកកម្ចាត់គ្រឿងផ្ទុះ។
ពុំមានការបញ្ជាក់ពីអ្វីដែលអាចបណ្តាលឱ្យមានការផ្ទុះនេះឡើយ ។
ទោះជាយ៉ាងណា លោក Nattapat បានលើកឡើងថា ក្រុមមន្ត្រីកំពុងស៊ើបអង្កេតពីអ្វីដែលអាចបង្កឲ្យមានឧបទ្ទវហេតុនេះ។
រោងចក្រនេះបានដំណើរការស្របច្បាប់ដោយមានអាជ្ញាប័ណ្ណត្រឹមត្រូវ។ មន្ត្រីប៉ូលីសបានបញ្ជាក់ថា តំបន់ជុំវិញមិនមានការខូចខាតទេ។
លោក Nattapat បានឲ្យដឹងថា បង្អួចកញ្ចក់នៅលើផ្ទះមួយបានរងការប៉ះពាល់ដោយការផ្ទុះនេះ ប៉ុន្តែមិនមានរបាយការណ៍ផ្សេងទៀតទេ។
ឧត្តមសេនីយ៍ឯក Naiyawat Phademchid បានប្រាប់ AFP នាយករដ្ឋមន្ត្រី Srettha Thavisin ដែលបច្ចុប្បន្ននៅប្រទេសស្វីសសម្រាប់វេទិកាសេដ្ឋកិច្ចពិភពលោក បានទទួលដំណឹងអំពីឧបទ្ទវហេតុនេះ។
ប្រភព៖ CNA
ប្រែសម្រួលដោយ៖ ហៃ ឆៃមុីនាង
