ឆ្នាំ២០២៣ ប្រជាពលរដ្ឋរងគ្រោះ និងងាយរងគ្រោះជាង៤ពាន់គ្រួសារ ក្នុងខេត្តបាត់ដំបងបានទទួលអំណោយមនុស្សធម៌ពីសាខាកាកបាទក្រហមកម្ពុជាខេត្ត
ភ្នំពេញ៖ ក្នុងឆ្នាំ២០២៣នេះប្រជាពលរដ្ឋរងគ្រោះ និងងាយរងគ្រោះចំនួន៤,១៩២ គ្រួសារស្មើនឹង១៤,១២៥នាក់ស្រី ៦,៨៦២នាក់(១៧០លើក) មកពីភូមិ ចំនួន៦១៨ភូមិ និងឃុំសង្កាត់ ចំនួន ២៦៤ ក្នុងខេត្តបាត់ដំបងបានទទួលអំណោយមនុស្សធម៌ពីសាខាកាកបាទក្រហមកម្ពុជា ខេត្តបាត់ដំបងក្នុងនោះអំណោយរបស់កាកបាទក្រហមកម្ពុជា ថ្នាក់កណ្តាលចំនួន ១,០១១គ្រួសារ អំណោយរបស់សាខាខេត្តផ្ទាល់ ចំនួន២,៦១០គ្រួសារ(ប្រគល់ផ្ទះ២ខ្នង) និង អំណោយរបស់អនុសាខាក្រុងស្រុកផ្ទាល់ចំនួន៥៧១ គ្រួសារ ក្នុងខេត្តបាត់ដំបង ។
នៅក្នុងប្រជុំបូកលទ្ធផលកម្មភាពការងារឆ្នាំ២០២៣ និងលើកទិសដៅអនុវត្តន៍បន្តឆ្នាំ២០២៤ កាលពីថ្ងៃទី១១ ខែមករា ឆ្នាំ២០២៤ ឯកឧត្តម សុខ លូ អភិបាលខេត្ត និងជាប្រធានគណៈកម្មាធិការសាខាខេត្តបាត់ដំបង បានក្រើនរំលឹក និងជម្រុញ អំពីការងារមួយចំនួនសម្រាប់អនុវត្តបន្តពិសេសត្រូវត្រៀមគ្រប់លក្ខណះ ទាំងកម្លាំង មធ្យោបាយ ស្បៀង សម្ភារៈ ទាំងថវិកាសម្រាប់ការឆ្លើយតបគ្រោះមហន្តរាយផ្សេងៗបានភ្លាមៗទាន់ពេលវេលា ហើយត្រូវយកចិត្តទុកដាក់ធ្វើយ៉ាងណាអោយការផ្តល់សេវាកម្មមនុស្សធម៌កាន់តែប្រសើរជាងមុន ជួយអ្នកងាយរងគ្រោះបានច្រើនជាងមុន និងប្រសិទ្ធភាពខ្ពស់ រួមជាមួយការកសាងកម្លាំង បណ្តាញនៅមូលដ្ឋានឲ្យកាន់តែរឹងមាំដើម្បីចូលរួមកសាងភាពធន់នឹងភាពរីកចម្រើននៅសហគមន៍-បន្តសហការចុះអប់រំផ្សព្វផ្សាយអំពីការលើកកំពស់សុវត្ថិភាពចរាចរណ៍ផ្លូវគោក ក្នុងឱកាសពិធីបុណ្យជាតិ សំខាន់ៗ រួមជាមួយ ការខិតខំ ជំរុញការបណ្ដុះបណ្ដាលជាមូលដ្ឋាន ការពង្រឹងសមត្ថភាព ជូនមន្ត្រី យុវជន អ្នកស្ម័គ្រចិត្តកាកបាទក្រហមកម្ពុជា ដែលជាប្រតិបត្តិករ និងជាកម្លាំងចលករ មិនអាចខ្វះបាន ក្នុងការអនុវត្តន៍វិស័យអាទិភាពទាំង ៤ តាម យុទ្ធសាស្ត្រ ២០២១- ២០៣០ របស់កាកបាទក្រហមកម្ពុជា។
ឯកឧត្ដមបន្ថែមថា ទន្ទឹមនោះ ត្រូវពង្រឹងការគ្រប់គ្រងមូលនិធិគ្រប់គ្រងចំណូលចំណាយ ទាំងថ្នាក់សាខា និងអនុសាខារួមជាមួយការទូទាត់ អោយមាន តម្លាភាពនិងគណនេយ្យភាព៕
