សម្តេចធិបតី៖ បើសិនអត់មានសន្តិភាព សួរថាយើងបានបង្រួបបង្រួមជាតិ ទឹកដី ហើយខេត្តកោះកុងមានការអភិវឌ្ឍន៍ដូចថ្ងៃនេះទេ?

ភ្នំពេញ៖ ក្នុងឱកាសអញ្ជើញ សម្ពោធស្ពានបេតុង និងសំណេះសំណាលជាមួយកម្មករ និយោជិតសរុបជាង ១ម៉ឺននាក់ នៅខេត្តកោះកុង នាថ្ងៃទី៨ ខែមករា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចោទជាសំណួរថា បើសិនអត់សន្តិភាព សួរថាយើងបានបង្រួបបង្រួមជាតិទឹកដី ហើយខេត្តកោះកុង តភ្ជាប់ និងមានការអភិវឌ្ឍន៍រីកចម្រើន ដូចសព្វថ្ងៃនេះដែរទេ?

សម្តេចធិបតី ហ៊ុន ម៉ាណែត មានប្រសាសន៍ថា បងប្អូនប្រជាពលរដ្ឋយើងនៅទីនេះ យើងដឹងហើយថាគ្មានស្អីកើតឡើងដោយចៃដន្យនោះទេ ជាកន្លែងដែលល្អពីមុនសង្គ្រាម ទៅជាកន្លែងបែកបាក់គ្នា រហូតអីឡូវយើងអភិវឌ្ឍន៍ឡើងវិញ គឺវាកើតចេញពីការខិតខំប្រឹងប្រែងលះបង់ច្រើនណាស់ ហើយសំខាន់បំផុតគឺការរៀបចំដាក់ចេញនូវគោលនយោបាយច្បាស់លាស់ ដើម្បីយើងអាចភ្ជាប់មកប៉ុនណេះ ។ សម្ដេចបានចោទជាសំណួរថា គោលនយោបាយស្អីខ្លះ អនុវត្តន៍ស្អីខ្លះ? ទី១៖ ការការដាក់ចេញគោលនយោបាយត្រឹមត្រូវ, ទី២៖ ការអនុវត្តដោយស្មោះត្រង់ និងប្រសិទ្ធភាព ទើបយើងបាន ។

សម្តេចធិបតី ហ៊ុន ម៉ាណែត បញ្ជាក់ថា «បើសិនអត់សន្តិភាព សួរថាយើងបានបង្រួបបង្រួមជាតិទឹកដី ហើយខេត្តកោះកុង តភ្ជាប់ទេ? ថ្ងៃមុនខ្ញុំទៅសម្ពោធទំនបវារីអគ្គិសនីនៅថ្មបាំង កន្លែងនោះកាលពីជំនាន់ លន់ នល់ ជាកន្លែងលាក់ទ័ព ដើម្បីតស៊ូប្រឆាំងជាមួយ លន់ នល់ ជំនាន់ខ្មែរក្រហមក៏ជាកន្លែងលាក់ទ័ព ដើម្បីប្រឆាំងជាមួយខ្មែរក្រហម»។

សម្តេចធិបតី គូសបញ្ជាក់ថា ក្រោយឆ្នាំ១៩៧៩ តំបន់មួយចំនួននៅក្នុងខេត្តកោះកុង នៅតែជាទីតាំងសមរភូមិក្តៅនៅឡើយរវាងកងទ័ពខ្មែរក្រហម និងកងទ័ពរដ្ឋកម្ពុជា នាសម័យនោះ។ បើគ្មានសន្តិភាព តើយើងអាចបង្រួបបង្រួមជាតិបានទេ? យើងអាចធ្វើខេត្តកោះកុងជាខេត្តដែលតភ្ជាប់មួយបណ្តាខេត្តផ្សេងៗទៀតដូចសព្វថ្ងៃ ឬទេ? មានផ្លូវតែប្រើមិនកើត ដោយសារផ្លូវដាច់ដោយគ្រាប់មីន មានដីអំណោយផល មានទឹកដែលអាចធ្វើកំពង់ផែបាន ប៉ុន្តែ មិនអាចអភិវឌ្ឍន៍បានដោយសារគ្មានអ្នកវិនិយោគមកបណ្តាក់ទុន ៕