អង្គការ WCS៖ ការគាំទ្រនូវបច្ចេកទេសចិញ្ចឹមត្រី សម្ភារៈ និងពូជត្រីដល់កសិករក្នុងតំបន់គោលដៅ ដើម្បីបង្កើនមុខរបររបស់កសិករ និងបង្កើនប្រាក់ចំណូលប្រចាំគ្រួសារ

ភ្នំពេញ៖ កន្លងទៅថ្មីៗនេះ អង្គការសមាគមអភិរក្សសត្វព្រៃ (WCS) សហការជាមួយនាយកដ្ឋានអភិវឌ្ឍវារីវប្បកម្ម នៃរដ្ឋបាលជលផល បានជ្រើសរើស ផ្ដល់វគ្គបណ្ដុះបណ្ដាលស្ដីពីការចិញ្ចឹមត្រីក្នុងបែលក្ខណៈគ្រួសារ និងប្រគល់ជូននូវពូជបន្លែចម្រុះ ចំណីត្រី សំម្ភារៈ និងពូជត្រីក្នុងស្រុក មានដូចជាត្រីឆ្ពិន(៦៥គីឡូក្រាម) ត្រីអណ្តែង(៣២.៥០គីឡូក្រាម) និងត្រីក្រាញ់(១៣គីឡូក្រាម) សរុបចំនួន១១០.៥០គីឡូក្រាមដល់កសិករគំរូតាមភូមិគោលដៅ ១៧គ្រួសារ ក្នុងនោះមានស្រ្តី៣នាក់ ដោយ១០គ្រួសាររស់នៅស្រុកស្រែអំបិល ខេត្តកោះកុង និង ០៧គ្រួសារផ្សេងទៀតរស់នៅស្រុកសំបូរ ខេត្តក្រចេះ។

ការគាំទ្រនូវបច្ចេកទេសចិញ្ចឹមត្រី សម្ភារៈ និងពូជត្រីដល់កសិករក្នុងតំបន់គោលដៅទាំងនេះ ដើម្បីបង្កើនមុខរបររបស់កសិករ បង្កើនប្រាក់ចំណូលប្រចាំគ្រួសារ ជាពិសេសកាត់បន្ថយសំពាធ លើធនធានជលផល និងការប្រើប្រាស់ដងព្រែក ស្ទឹង ទន្លេ និងបឹងបួរ ក្នុងគោលបំណងចូលរួមក្នុងការងារអភិរក្សធនធានជលផល ជាពិសេសកន្ទាយក្បាលកង្កែប(ល្មិច) អណ្តើកហ្លួងឬសរសៃ និងក្រពើត្រីជាដើម ដែលជាសត្វកម្រជិតផុតពូជ។

ក្រុមការងារផ្នែកអភិវឌ្ឍន៍សហគមន៍នៃអង្គការ WCS សហការជាមួយមន្រ្តីជំនាញរដ្ឋបាលជលផល និងអាជ្ញាធរមូលដ្ឋាន តែងតែចុះពង្រឹងនិងតាមដានផ្ទាល់ជាមួយកសិករទាំង១៧គ្រួសារ ដើម្បីធានាពីប្រសិទ្ធភាពក្នុងការប្រើប្រាស់ចំណេះដឹងក្នុងការចិញ្ចឹមត្រីក្នុងបែ ជាពិសេសការគ្រប់គ្រងគុណភាពទឹក ការផ្ដល់ចំណី ការសម្អាតបរិស្ថានជុំវិញស្រះ ការកត់ត្រាចំណាយ និងចំណេញ ។

បច្ចប្បន្នពួកគាត់ទាំង១៧គ្រួសារកំពុងចិញ្ចឹមត្រី និងមើលថែត្រីរបស់ពួកគាត់ដោយសប្បាយរីករាយ និងយកចិត្តទុកដាក់។ គម្រោងគាំទ្រកសិករចិញ្ចឹមត្រីក្នុងបែនេះទទួលបានការគាំទ្រថវិកាពី Margaret C. Cargill Philanthropy, US Forest Service, and US Fish and Wildlife Service. ៕