សម្តេចធិបតី៖ រយៈពេលប៉ុន្មានខែមកនេះ សម្តេចបានសម្ពោធសមិទ្ធផល និងបើកការដ្ឋានសាងសង់ជាច្រើន ក្រោមការគាំទ្រថវិកាពីជប៉ុន
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ត្រឹមរយៈពេលប៉ុន្មានខែ ឆ្នាំ២០២៣ នៃការចាប់ផ្តើមអាណត្តិរបស់រាជរដ្ឋាភិបាលនីតិកាលទី៧ សម្តេចបានចូលរួមសម្ពោធសមិទ្ធផល និងបើកការដ្ឋានសាងសង់សមិទ្ធផលជាច្រើន ក្រោមការគាំទ្រថវិកាពីជប៉ុន ។
ក្នុងឱកាសអញ្ជើញបើកការដ្ឋានសាង សង់ចំណតផែកុងតឺន័រទឹកជ្រៅជំហានទី១ ស្ថិតនៅកំពង់ស្វយ័តក្រុងព្រះសីហនុ ខេត្តព្រះសីហនុ នៅថ្ងៃទី២២ ខែធ្នូនេះ សម្តេចធិបតី ហ៊ុន ម៉ាណែត បញ្ជាក់ថា «ក្នុងប៉ុន្មានខែនេះយើងសម្ពោធសមិទ្ធផលរួមគ្នាជាច្រើន ហើយនេះជានិមិត្តរូបនៃស្ថានការណ៍ អបអរសាទរនូវខួបទី៧០ឆ្នាំ នៃទំនាក់ទំនងការទូតកម្ពុជា-ជប៉ុន រីកចម្រើនពូនជ្រំនូវទំនាក់ទំនងដោយលេចចេញនូវផ្លែផ្កានៅលើដីសម្រាប់ប្រទេសទាំងពីរ និងប្រជាជនទាំងពីរ»។
សម្តេចធិបតីបានរំលឹកថា កាលថ្ងៃទី១៨ ខែធ្នូ ឆ្នាំ២០២៣ថ្មីៗនេះនៅទីក្រុងតូក្យូ សម្តេចបានជួបពិភាក្សាការងារជាមួយនាយករដ្ឋមន្ត្រីជប៉ុន នៅពេលដែលសម្តេចបានចូលរួមកិច្ចប្រជុំកំពូល រំលឹកខួបអនុស្សាវរីយ៍ខួបទី ៥០ឆ្នាំ រវាងអាស៊ាន និងជប៉ុន ដោយជជែកពីការពង្រឹកចំណងទំនាក់ទំនងមិត្តភាពរវាងប្រទេសកម្ពុជា និងជប៉ុន។
សម្តេចធិបតីគូសបញ្ជាក់ថា សម្រាប់ឆ្នាំ២០២៣ គឺមានលក្ខណៈពិសេសចំនួន២ ទី១៖ ការប្រារព្ធខួបទំនាក់ទំនងការទូត៧០ឆ្នាំ រវាងកម្ពុជា និងជប៉ុន និងលក្ខណៈពិសេសទី២៖ គឺប្រទេសទាំងពីរបានលើកកម្រិតទំនាក់ទំនងការទូតកម្ពុជា-ជប៉ុន ទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ ដែលជាកម្រិតខ្ពស់បំផុតក្នុងប្រវត្តិសាស្ត្រនៃទំនាក់ទំនងរវាងកម្ពុជា និងជប៉ុន ៕
