មន្ត្រីជាន់ខ្ពស់ក្រសួងការពារជាតិកូរ៉េ សង្ឃឹមថា កម្លាំងកម្ពុជា-កូរ៉េ នឹងប្រគៀកស្មារគ្នា ក្នុងប្រតិបត្តិការរក្សាសន្តិភាព
ភ្នំពេញ៖ ឧត្តមសេនីយ៍ត្រី Woo Kyoung-Suk អគ្គនាយករង ទទួលបន្ទុកគោលនយោបាយអន្តរជាតិ នៃក្រសួងការពារជាតិ សាធារណរដ្ឋកូរ៉េ នាថ្ងៃទី១ ខែធ្នូ ឆ្នាំ២០២៣ បានអញ្ជើញជួបសម្តែងការគួរសម និងពិភាក្សាការងារជាមួយឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី១ គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព។ កិច្ចពិភាក្សានេះផងដែរ ក៏បានផ្តោតសំខាន់ទៅលើវគ្គហ្វឹកហ្វឺនគម្រោងត្រីភាគី កម្ពុជា-អសប-កូរ៉េ ដែលបាននឹងបិទបញ្ចប់ដោយជោគជ័យនាពេលខាងមុខនេះ។
ឯកឧត្តម នាយឧត្តមសេនីយ៍ សែម សុវណ្ណនី បានទទួលស្វាគមន៍យ៉ាងកក់ក្តៅចំពោះការមកដល់របស់លោក Woo KyoungSuk និងបាននាំយកពាក្យពេចន៍សួរសុខទុក្ខរបស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ជូនគណៈប្រតិភូនៃសាធារណរដ្ឋកូរ៉េផងដែរ។ ឯកឧត្តម នាយឧត្តមសេនីយ៍ បានបន្តថា វគ្គហ្វឹកហ្វឺនត្រីភាគី កម្ពុជា-អសប-កូរ៉េ បានដំណើរការ៦សប្តាហ៍ដោយជោគជ័យ ដោយនឹងបិទបញ្ចប់ក្រោមវត្តមានដ៏ខ្ពង់ខ្ពស់ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ។
ឧត្តមសេនីយ៍ត្រី Woo KyoungSuk បានថ្លែងអំណរគុណយ៉ាងជ្រៀលជ្រៅចំពោះកម្ពុជា ដែលបានទទួលស្វាគមន៍យ៉ាងកក់ក្តៅវត្តមានមកដល់របស់លោក។ ទន្ទឹមនោះ លោកក៏បានអរគុណដល់កិច្ចខិតខំប្រឹងប្រែងរបស់កម្ពុជា លើវគ្គហ្វឹកហ្វឺនត្រីភាគី TPP ប្រកបដោយប្រសិទ្ធិភាព។ លោកបានលើកឡើងថា ការបិទវគ្គហ្វឹកហ្វឺននេះពិតជាមានសារៈសំខាន់ និងអត្ថន័យធំធេងណាស់ ដែលវាបង្ហាញពីទំនាក់ទំនងរវាងត្រីភាគី កម្ពុជា-អសប-កូរ៉េ ក្នុងការពង្រឹងកិច្ចសហប្រតិបត្តិការរក្សាសន្តិភាព។
ឧត្តមសេនីយ៍ត្រី Woo KyoungSuk បានបន្ថែមថា កម្ពុជា បានបញ្ជូនកងកម្លាំងជាច្រើនទៅតំបន់បេសកកម្ម ហើយបច្ចុប្បន្ន កូរ៉េ ក៏បានចល័តកម្លាំងទៅសាធារណរដ្ឋលីបង់ និងស៊ូដង់ខាងត្បូងផងដែរ។ លោកសង្ឃឹមថា កម្លាំងកម្ពុជា និងកូរ៉េ នឹងប្រគៀកស្មារគ្នាក្នុងប្រតិបត្តិការរក្សាសន្តិភាព។
ជាមួយគ្នានោះ លោករំពឹងថា ប្រទេសទាំងពីរ នឹងបន្តទំនាក់ទំនងទ្វេភាគីកាន់តែរឹងមាំ ជាពិសេសពង្រីក និងពង្រឹងការហ្វឹកហ្វឺនវិស្វកម្ម រួមទាំងឈានទៅដល់វគ្គហ្វឹកហ្វឺនបោសសម្អាតមីនផងដែរ។
ឯកឧត្តម នាយឧត្តមសេនីយ៍ សែម សុវណ្ណនី បានមានប្រសាន៍បន្ថែមថា កម្ពុជា-កូរ៉េ មានទំនាក់ទំនងល្អជាមួយគ្នាយូរលង់ណាស់មកហើយ។ ឯកឧត្តម នាយឧត្តមសេនីយ៍ ជឿជាក់ថា ប្រទេសទាំងពីរ នឹងមានកិច្ចសហប្រតិបត្តិការកាន់តែល្អប្រសើរទៅមុខទៀត៕
