មន្រ្តីជំនាញ ប.ស.ស. ចូលរួមកិច្ចប្រជុំពិគ្រោះយោបល់សាធារណៈ ស្ដីពី “សេចក្ដីព្រាងក្របខណ្ឌ គោលនយោបាយជាតិគាំពារសង្គម៖ ចក្ខុវិស័យឆ្នាំ២០៣០”
ភ្នំពេញ៖ លោក គាត ពុធណារិទ្ធ អនុប្រធានក្រុមការងារកិច្ចការច្បាប់នៃ ប.ស.ស. តំណាងដ៏ខ្ពង់ខ្ពស់ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមការងារកិច្ចការច្បាប់ នៃ ប.ស.ស. នាថៃ្ងទី៣០ ខែវិច្ឆិកា ឆ្នាំ២០២៣ បានដឹកនាំមន្រ្តីជំនាញចូលរួមក្នុងកិច្ចប្រជុំពិគ្រោះយោបល់សាធារណៈ ស្ដីពី “សេចក្ដីព្រាងក្របខណ្ឌគោលនយោបាយជាតិគាំពារសង្គម៖ ចក្ខុវិស័យឆ្នាំ២០៣០” ក្រោមអធិបតី លោកជំទាវ ប៉ែន សុបភា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការប្រតិបត្តនៃក្រុមប្រឹក្សាជាតិគាំពារសង្គម។
ក្នុងកិច្ចប្រជុំពិគ្រោះយោបល់សាធារណៈពេញមួយព្រឹកនេះ មានគោលបំណងប្រមូលធាតុចូលពីគ្រប់ភាគីពាក់ព័ន្ធក្នុងកម្រិតទូលាយ ដើម្បីធ្វើយ៉ាងណាឱ្យក្របខណ្ឌគោលនយោបាយជាតិគាំពារសង្គម៖ ចក្ខុវិស័យឆ្នាំ២០៣០ ដែលនឹងដាក់ឱ្យដំណើរការក្នុងពេលខាងមុខនេះ កាន់តែគ្រប់ជ្រុងជ្រោយ និងអាចឈានទៅពង្រឹងប្រព័ន្ធគាំពារសង្គមបន្ថែម ដោយផ្តោតលើការកសាងភាពធន់ និងភាពទន់ភ្លន់ស្របទៅនឹងការវិវត្តនៃកត្តាសេដ្ឋកិច្ច និងសង្គមជាទូទៅ ព្រមទាំងអាចឆ្លើយតបបានទាន់ពេលទៅនឹងគ្រោះអាសន្ន និងវិបត្តិនានា។
បច្ចុប្បន្នបេឡាជាតិសន្តិសុខសង្គម បាននឹងកំពុងបន្តពង្រឹងដំណើរការចាត់ចែង និងគ្រប់គ្រងរបបសន្តិសុខសង្គមឱ្យមានតម្លាភាព និង គណនេយ្យភាពពេញលេញ តាមរយៈការប្រកាន់ខ្ជាប់នូវគោលការណ៍អភិបាលកិច្ចល្អ ដើម្បីកសាងជំនឿទុកចិត្តពីសាធារណជន ជាពិសេស សមាជិក ប.ស.ស. និងនិយោជក ដែលជាបុគ្គលមានកាតព្វកិច្ចបង់ភាគទានជូន ប.ស.ស. និងបន្តជំរុញការអភិវឌ្ឍសមត្ថភាពស្ថាប័ន និងធនធានមនុស្ស រួមទាំង ការធ្វើបរិវត្តកម្មឌីជីថលប្រព័ន្ធគ្រប់គ្រង សំដៅបង្កើនប្រសិទ្ធភាព និងភាពងាយស្រួលក្នុងការផ្តល់សេវាជូនសមាជិក ប.ស.ស. ជាអតិបរមា។
សូមបញ្ជាក់ថា៖ កិច្ចប្រជុំពិគ្រោះយោបល់សាធារណៈខាងលើនេះ ប្រព្រឹត្តទៅនៅសណ្ឋាគារសុខាភ្នំពេញ ដោយមានវត្តមានអញ្ជើញចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធ អង្គការជាតិ អន្តរជាតិ សរុបប្រមាណជាង ១០០នាក់ ៕
