សម្តេចធិបតី៖ ការចងក្រងជាសហគមន៍របស់កសិករ គឺសំខាន់ណាស់សម្រាប់ធានានូវខ្សែចង្វាក់ផលិតកម្ម និងខ្សែចង្វាក់ផ្គត់ផ្គង់ ដោយប្រសិទ្ធភាព
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ការចងក្រងជាសហគមន៍របស់កសិករ និងរៀបចំជាសហគមន៍កសិកម្មទំនើប ពិតជាសំខាន់ណាស់ សម្រាប់ធានាបាននូវខ្សែចង្វាក់ផលិតកម្ម និងខ្សែចង្វាក់ផ្គត់ផ្គង់ដោយប្រសិទ្ធភាព ។
នាឱកាសអញ្ជើញប្រកាសដាក់ឱ្យ អនុវត្តជាផ្លូវការនូវកម្មវិធីនយោបាយ ៣ទៀត ពាក់ព័ន្ធនឹងវិស័យកសិកម្ម នៅថ្ងៃទី២០ ខែវិច្ឆិកា ឆ្នាំ២០២៣នេះ សម្តេចធិបតី ហ៊ុន ម៉ាណែត បានបញ្ជាក់ថា «ការគិតគូរនេះដែលយើងបានចងក្រងជារចនាសម្ព័ន្ធ ហើយដាក់គោលនយោបាយមួយនៅក្នុងកម្មវិធីនេះ គឺការរៀបចំជាសហគមន៍កសិកម្មទំនើប ពាក្យថាសហគមន៍កសិកម្មទំនើបមិនមែនបានន័យថា យើងមានត្រឹមតែមានធនធាន មានតែបច្ចេកវិទ្យាទំនើបទេ ប៉ុន្តែទំនើបទាំងការគិត ទំនើបទាំងរបៀបរបបធ្វើការសហការគ្នា ដែលខ្ញុំតែងតែឱ្យគិតថាពេលខ្លះ យើងសុខចិត្តយកលេខ១០ នៅក្នុងក្រុមលេខ១ ជាជាងយកលេខ១ នៅក្នុងក្រុមលេខ១០ បានន័យថាយើងត្រូវវាយតម្លៃខ្លួនយើង ថាតើកន្លងទៅពួកយើងផលិតម្នាក់ៗឯងទៅអត់រួច?» ។
សម្តេចធិបតី ហ៊ុន ម៉ាណែត បន្ថែមថា «សេដ្ឋកិច្ចមាត្រដ្ឋានសំខាន់ណាស់ក្នុងការប្រកួតប្រជែង ហើយជាពិសេសនោះដែលយើងដាក់ទិសដៅប្រែក្លាយនឹងដើរចេញពីកសិកម្មបែបគ្រួសារទៅជាកសិកម្មបែបទំនើប និងកសិកម្មឧស្សាហកម្មទ្រង់ទ្រាយធំ ដែលទាមទារឱ្យកសិករនីមួយៗ ដែលចូលទៅក្នុងសហគមន៍កសិកម្មទំនើប មានផ្នត់គំនិតដែលចង់ឲ្យសហគមន៍របស់ខ្លួនមានភាពប្រកួតប្រជែង និងរួមគ្នានៅក្នុងកញ្ចប់គោលនយោបាយរួម ដើម្បីឱ្យតំបន់យើងក្លាយទៅជាតំបន់ដែលមានភាពប្រកួតប្រជែងជួយដល់សេដ្ឋកិច្ច ជួយដល់វិស័យកសិកម្មក្នុងការប្រកួតប្រជែងទាំងនៅក្នុងនឹងក្រៅ ចឹងការរៀបចំចងក្រងគ្នានេះសំខាន់ណាស់ ហើយការរៀបចំចងក្រងនេះគឺមានកិច្ចការសំខាន់ត្រង់ថា វាធានានៅខ្សែចង្វាក់ផលិតកម្ម និងខ្សែចង្វាក់ផ្គត់ផ្គង់ដោយប្រសិទ្ធភាព» ៕
