ភ្នំពេញ៖ រដ្ឋបាលស្រុកបូរីអូរស្វាយសែនជ័យ បានចេញសេចក្តីប្រកាសព៍ត័មាន ស្តីពីការផ្សព្វផ្សាយរបស់អង្គភាព ឌីអិនសន្តិភាពញ៉ូវ (DN Sentepaheap News) អំពីករណីឈូសឆាយដីព្រៃសហគមន៍អូររុន។
យោងតាមលិខិតរបស់រដ្ឋបាលស្រុកបុរីអូរស្វាយសែនជ័យ បានឱ្យដឹងថា ដោយមានការបង្ហោះព័ត៌មានក្នុងបណ្ដាញទំនាក់ទំនងសង្គម Facebook របស់អង្គភាព ឌីអ៊ិនសន្តិភាពញ៉ូវ (DN Sentepaheap News) កាលពីថ្ងៃទី១២ ខែវិច្ឆិកា ឆ្នាំ២០២៣ អំពីការឈូស ឆាយដីព្រៃ នៅក្នុងព្រៃសហគមន៍អូររុន ស្ថិតនៅភូមិអូររុន ឃុំអូរស្វាយ ស្រុកបុរីអូរស្វាយសែនជ័យ។
ឆ្លៀតក្នុងឱកាសនេះ រដ្ឋបាលស្រុកបុរីអូរស្វាយសែនជ័យ សូមធ្វើការគូសបញ្ជាក់បន្ថែមថា ចំណុចទីតាំងដែលមានការឈូសឆាយខាងលើ ជាទីតាំងបុស្សចាស់ដុះព្រៃឫស្សីឡើងវិញដែលប្រជាពលរដ្ឋ ធ្លាប់បានធ្វើការអាស្រ័យផលមកជាយូរឆ្នាំមកហើយ គឺនៅមុនពេលនៃការចុះបញ្ជីដីព្រៃសហគមន៍អូររុន មួយវិញទៀត ចំណុចទីតាំងដីខាងលើ ជាទីតាំងដីដែលបានកាត់ឆ្កៀលចេញពីដីព្រៃសហគមន៍អូររុន តាំងតែពីពេលមុនធ្វើការចុះបញ្ជីដីព្រៃសហគមន៍ទៅទៀត ដូចនេះការបង្ហោះព័ត៌មានក្នុងបណ្ដាញទំនាក់ ទំនងសង្គម Facebook របស់អង្គភាព ឌីអ៊ិនសន្តិភាពញ៉ូវ (DN Sentepaheap News) កាលពីថ្ងៃទី១២ ខែវិច្ឆិកា ឆ្នាំ២០២៣ អំពីការឈូសឆាយដីព្រៃសហគមន៍អូររុន ជាការផ្សាយពុំឈរលើមូលលើមូលដ្ឋាន វិជ្ជាជីវៈសារព័ត៌មានពិត ដែលតែងតែធ្វើការផ្សព្វផ្សាយព័ត៌មានមិនពិតប្រាកដ ដោយសារទីតាំងខាងលើ កន្លងមកក្រុមការងារចុះស្រង់ទិន្នន័យក្បាលដីអាស្រ័យផលជាក់ស្ដែងយូរឆ្នាំ ក្នុងតំបន់ការពារធនធាន ធម្មជាតិ និងច្រករបៀងអភិរក្សជីវៈចម្រុះ បានធ្វើការចុះកំណត់ទីតាំងដីប្រើប្រាស់អាស្រ័យផលជាក់ ស្ដែងយូរឆ្នាំនៅក្នុងព្រៃសហគមន៍រួចរាល់ ក្រោយមានការផ្សព្វផ្សាយព័ត៌មានខាងលើនេះ រដ្ឋបាលស្រុក បានអញ្ជើញអ្នកពាក់ព័ន្ធមកធ្វើការអប់រំ ណែនាំ បញ្ឈប់ការកាប់រានដីព្រៃបន្តទៀត និងមន្ត្រីជំនាញ ពាក់ព័ន្ធកំពុងស្រាវជ្រាវ ដើម្បីបន្តនីតិវិធីតាមផ្លូវច្បាប់។
រដ្ឋបាលស្រុកបុរីអូរស្វាយសែនជ័យ បានបញ្ជាក់ថា អាស្រ័យហេតុដូចបានជម្រាបជូនខាងលើ សូមសាធារណៈជន អ្នកសារព័ត៌មានជាតិ អន្តរជាតិ និងបងប្អូនប្រជាពលរដ្ឋមេត្តាជ្រាបជាព័ត៌មាន។
ជាមួយគ្នានោះដែរបើតាមការបញ្ជាក់ពី ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង មានប្រសាសន៍ប្រាប់អង្គភាពសារព័ត៌មាន HOT News Asia ឱ្យដឹងថា ក្នុងករណីខាងលើនេះកន្លងមក រដ្ឋបាលស្រុកបានបំភ្លឺរួចមកហើយចំពោះករណីនេះ។ ហើយតាមការបញ្ជាក់ពីរដ្ឋបាលស្រុក និងមន្ទីរកសិកម្ម រុក្ខាប្រមាញ់ និងនេសាទខេត្ត ថាការបង្កើតសហគមន៍នេះគឺបង្កើតក្រោយប្រជាពលរដ្ឋដែលរស់នៅទីនោះ៕
