សម្តេចធិបតី ណែនាំឱ្យគ្រឹះស្ថានធនាគារ និងហិរញ្ញវត្ថុ រៀបចំឥណទានឡើងវិញ ជូនវិស័យទេសចរណ៍នៅសៀមរាប និងអតិថិជនក្នុងវិស័យអចលនទ្រព្យ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំដល់គ្រឹះស្ថានធនាគារ និងមីក្រូហិរញ្ញវត្ថុ រៀបចំឥណទានឡើងវិញជាបណ្តោះអាសន្ន ជូនដល់ប្រតិបត្តិករក្នុងវិស័យទេសចរណ៍នៅខេត្តសៀមរាប និងអតិថិជនក្នុងវិស័យអចលនទ្រព្យ ដែលបានជួបប្រទះនូវការលំបាកផ្នែកហិរញ្ញវត្ថុ។
ក្នុងឱកាសអញ្ជើញជួបវិស័យឯកជន ក្នុងវេទិកា «រាជរដ្ឋាភិបាល-ផ្នែកឯកជន» លើកទី១៩ នាថ្ងៃទី១៣ ខែវិច្ឆិកា សម្តេចធិបតី បញ្ជាក់ថា «អនុញ្ញាតឱ្យគ្រឹះស្ថានធនាគារ និងហិរញ្ញវត្ថុរៀបចំឥណទានឡើងវិញ ចំពោះវិស័យទេសចរណ៍នៅខេត្តសៀមរាប ជូនអតិថិជន ដែលជួបប្រទះការលំបាកផ្នែកហិរញ្ញវត្ថុបណ្តោះអាសន្ន ដោយមិនចាំបាច់ធ្វើសមវិធានធន់រយៈពេល១២ខែ។ លើកទឹកចិត្តដល់គ្រឹះស្ថានធនាគារ និងមីក្រូហិរញ្ញវត្ថុរៀបចំឥណទានឡើងវិញចំពោះវិស័យអចលនទ្រព្យ ជូនអតិថិជន ដែលជួបប្រទះការលំបាកផ្នែកហិរញ្ញវត្ថុបណ្តោះអាសន្ន ដោយត្រូវអនុវត្តតាមបញ្ញត្តិរបស់ធនាគារជាតិនៃកម្ពុជា គ្រឹះស្ថានត្រូវធ្វើការសិក្សា និងវិភាគច្បាស់លាស់អំពីស្ថានភាពរបស់អតិថិជន និងផលប៉ះពាល់នៃឥណទានរបស់អតិថិជន ចំពោះប្រព័ន្ធទាំងមូល ព្រមទាំងអាចស្នើសុំការពិភាក្សាជាមួយធនាគារជាតិ ដើម្បីពិចារណាអំពីវិធានការអនុគ្រោះតាម ករណីជាក់ស្តែងបន្ថែមទៀត» ។
