សម្តេចនាយករដ្ឋមន្ត្រី ណែនាំឱ្យគ្រប់អង្គភាពទ័ពត្រៀមមធ្យោបាយ និងកម្លាំង ដើម្បីចូលរួមជួយសង្គ្រោះពលរដ្ឋពេលមានគ្រោះមហន្តរាយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឱ្យគ្រប់អង្គភាពទ័ពទាំងអស់ ត្រៀមមធ្យោបាយសម្ភារគ្រប់បែបយ៉ាង និងកម្លាំង ដើម្បីចូលរួមជួយសង្គ្រោះប្រជាពលរដ្ឋ ពេលមានគ្រោះមហន្តរាយណាមួយ។

សម្ដេចធិបតីបានថ្លែងបែបនេះក្នុងឱកាសអញ្ជើញជាអធិបតីក្នុងពិធីអបអរសាទរ ខួបអនុស្សាវរីយ៍លើកទី២៨ ថ្ងៃបង្កើតបញ្ជាការដ្ឋានទ័ពពិសេស នៅព្រឹកថ្ងៃទី១០ ខែវិច្ឆិកា ឆ្នាំ២០២៣នេះ។

សម្តេចធិបតីបានថ្លែងដូចនេះថា “សូមអង្គភាពទាំងអស់យកចិត្តទុកដាក់ត្រៀមកម្លាំង និងមធ្យោបាយសម្ភារគ្រប់បែបយ៉ាង ដើម្បីចូលរួមជួយសង្គ្រោះប្រជាពលរដ្ឋ នៅពេលមានគ្រោះភ័យជាយថាហេតុណាមួយ ដោយត្រូវមានស្មារតីបុរេសកម្ម ព្រមទាំងសហការឱ្យបានស្អិតរមួតជាមួយអាជ្ញាធរដែនដី និងក្រសួងស្ថាប័នពាក់ព័ន្ធ”។

សម្តេចធិបតី ក៏បានណែនាំឱ្យគ្រប់អង្គភាពទាំងអស់ ជំរុញការការកសាងសេដ្ឋកិច្ចនៅនឹងកន្លែងដូចជា ការបង្ករបង្កើនផល និងការចិញ្ចឹមសត្វជាដើម ដើម្បីចូលរួមលើកកម្ពស់ជីវភាពរស់នៅរបស់កងទ័ព និងក្រុមគ្រួសារ ដើម្បីធានាបានផាសុខភាព សុខុមាលភាព ផលិតភាព ក្នុងការបំពេញបេសកកម្មរបស់ខ្លួន៕