នាយករដ្ឋមន្ត្រី ក្រើនរលឹក និងបំផុសស្មារតី ថ្នាក់ដឹកនាំ មន្ត្រីក្រសួងមហាផ្ទៃ ត្រូវមានមនសិការបម្រើជាតិ និងប្រជាជន ដោយមិនគិតអំពីឧបសគ្គ និងការនឿយហត់

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានក្រើនរលឹក និងបំផុសស្មារតីថ្នាក់ដឹកនាំ និងមន្ត្រីរបស់ក្រសួងមហាផ្ទៃ ត្រូវមានភាព ជាអ្នកដឹកនាំ ដ៏ឈ្លាសវៃ ជាមន្ត្រីដ៏សកម្ម និងជាពិសេស មានមនសិការបម្រើជាតិ និងប្រជាជន ដោយមិនគិតអំពីឧបសគ្គ នៃការនឿយហត់ ណាមួយឡើយ ។

ក្នុងឱកាសអញ្ជើញ សម្ពោធដាក់ឱ្យប្រើប្រាស់ ជាផ្លូវការ “អគារទីស្តីការថ្មី នៃក្រសួងមហាផ្ទៃ” នាថ្ងៃទី ៦ ខែវិច្ឆិកា សម្តេចធិបតី ហ៊ុន ម៉ាណែត បានបញ្ជាក់ថា «ខណៈដែលយើង កំពុងប្រារព្ធនូវសមិទ្ធផល ជាទីមោទនៈនេះ គឺអគារថ្មីនៃទីស្ដីការក្រសួងមហាផ្ទៃ នៅថ្ងៃនេះ ខ្ញុំសូមក្រើនរលឹក និងបំផុសស្មារតីថ្នាក់ដឹកនាំ និងមន្ត្រីរបស់ក្រសួងមហាផ្ទៃ ផងដែរថា ជាមួយនឹងតួនាទី ដ៏សំខាន់របស់ក្រសួង រាជរដ្ឋាភិបាល ក៏មានក្តីរំពឹងខ្ពស់ លើក្រសួងមហាផ្ទៃ ហើយ ក្តីរំពឹងនេះ នឹងទាមទារឲ្យមានភាពជាអ្នកដឹកនាំដ៏ឈ្លាសវៃ ជាមន្ត្រីដ៏សកម្ម និងជា ពិសេស មាននូវមនសិការបម្រើជាតិ និងប្រជាជន ដោយមិនគិតអំពីឧបសគ្គ នៃការនឿយហត់ ណាមួយឡើយ» ។

សម្តេចធិបតីបន្តថា ក្រោមការដឹកនាំរបស់ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ សម្តេចជឿជាក់ទាំងស្រុងថា ក្រសួងមហាផ្ទៃ នឹងឆ្លើយតបបានទៅនឹងក្តីរំពឹងនេះ ។

សម្តេចធិបតីបន្ថែមថា អគារក្រសួងមហាផ្ទៃដ៏ធំស្កឹមស្កៃនេះ ជាសក្ខីភាពឆ្លុះបញ្ចាំង អំពីសារៈសំខាន់ និងតួនាទីរបស់ក្រសួងមហាផ្ទៃ នៅក្នុងរាជរដ្ឋាភិបាល ដែលជាឆ្អឹងខ្នង និងជាសេនាធិការដ៏សំខាន់ របស់រាជរដ្ឋាភិបាល នៅក្នុងការអនុវត្តគោលនយោបាយ របស់រាជរដ្ឋាភិបាល ជាពិសេសការផ្ដល់សេវារដ្ឋបាល និងការគាំទ្រសន្តិសុខ សាធារណៈ ជូនដល់ប្រជាពលរដ្ឋ។ ជាមួយគ្នានេះ ក្រសួងមហាផ្ទៃ ក៏ដើរតួនាទី ជាស្ពានផ្សាភ្ជាប់គោលនយោបាយថ្នាក់ជាតិ ដែលដាក់ចេញដោយរាជរដ្ឋាភិបាល ទៅជាការអនុវត្តដែលភាគច្រើន ធ្វើឡើងដោយរដ្ឋបាលថ្នាក់ក្រោមជាតិ និងនៅជាប់ ផ្ទាល់បញ្ហានៅមូលដ្ឋាន ៕