លោកជំទាវ យក់ សម្បត្តិ អញ្ជើញជាអធិបតី ក្នុងសិក្ខាសាលាថ្នាក់ជាតិ ស្តីពីកម្ពុជាបានត្រៀមខ្លួនជាស្រេចក្នុងការទប់ស្កាត់ការរាតត្បាតសកលណាមួយជាយថាហេតុ
ភ្នំពេញ៖ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល តំណាងដ៏ខ្ពង់ខ្ពស់របស់ ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល នាព្រឹកថ្ងៃចន្ទ ១រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣០ ខែតុលា ឆ្នាំ២០២៣ បានអញ្ជើញជាអធិបតី ក្នុងសិក្ខាសាលាថ្នាក់ជាតិ ស្តីពីកម្ពុជាបានត្រៀមខ្លួនជាស្រេចក្នុងការទប់ស្កាត់ការរាតត្បាតសកលណាមួយជាយថាហេតុ នៅសណ្ឋាគារសុខារ៉េស៊ីដង់ភ្នំពេញ រាជធានីភ្នំពេញ។
ក្នុងសិក្ខាសាលានេះ ដោយមានការចូលរួមពីថ្នាក់ដឹកនាំជាន់ខ្ពស់មកពី ២០ស្ថាប័នចំណុះរាជរដ្ឋាភិបាល អង្គការសុខភាពពិភពលោក និងប្រតិភូសហភាពអឺរ៉ុប ដែលមានចំនួនសរុបប្រមាណ ៧០រូបរួមមាន៖ ១.ក្រសួងកសិកម្ម រុក្ខាប្រមាញ់ និងនេសាទ, ២.ក្រសួងពាណិជ្ជកម្ម, ៣.ក្រសួងធម្មការ និងសាសនា, ៤.ក្រសួងបរិស្ថាន, ៥.ក្រសួងព័ត៌មាន, ៦.ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ៧.ក្រសួងការងារ និងបណ្តុះបណ្តាលវិជ្ជាជីវៈ, ៨.ក្រសួងរ៉ែ និងថាមពល, ៩.ក្រសួងប្រៃសណីយ៍ និងទូរគមនាគមន៍, ១០.ក្រសួងអភិវឌ្ឍន៍ជនបទ, ១១.ក្រសួងសង្គមកិច្ច អតីតយុទ្ធជន និងយុវនីតិសម្បទា, ១២.ក្រសួងទេសចរណ៍, ១៣.ក្រសួងសេដ្ឋកិច្ច និងហិរញ្ញវត្ថុ, ១៤.ក្រសួងអប់រំ យុវជននិងកីឡា, ១៥.ក្រសួងមហាផ្ទៃ, ១៦.ក្រសួងយុត្តិធម៌, ១៧.ក្រសួងការពារជាតិ, ១៨.អគ្គលេខាធិការនៃអគ្គលេខាធិការដ្ឋាន អាជ្ញាធរជាតិទប់ស្កាត់អាវុធគីមីនុយក្លេអ៊ែរ ជីវសាស្រ្ត និងវិទ្យុសកម្ម, ១៩.គណៈកម្មាធិការជាតិគ្រប់គ្រងគ្រោះមហន្តរាយ, ២០.ថ្នាក់ដឹកនាំពីនាយកដ្ឋាន វិទ្យាស្ថាន សាកលវិទ្យាល័យ និងមជ្ឈមណ្ឌលជាតិក្រោមចំណុះឱ្យក្រសួងសុខាភិបាល។
សិក្ខាសាលានេះ មានគោលបំណងពង្រឹងការចូលរួមការអនុវត្តសមត្ថភាពស្នួលនៃនិយ័តកម្មសុខភាពអន្តរជាតិ និងផ្តល់នូវការយល់ដឹងពីតម្រូវការអនុវត្តនិយ័តកម្មសុខភាពអន្តរជាតិ សម្រាប់វិធីសាស្រ្តរួម ពហុវិស័យ និងពហុជំនាញ ដើម្បីដោះស្រាយចន្លោះខ្វះខាត និងការសម្របសម្រួលជាមុនសម្រាប់ការត្រៀមលក្ខណៈសង្គ្រោះបន្ទាន់ និងសន្តិសុខសុខភាពសម្រាប់ពេលខាងមុខបន្តទៀត ៕
