លោកជំទាវ យក់ សម្បត្តិ ដឹកនាំគណៈប្រតិភូក្រសួងសុខាភិបាល អញ្ជើញចូលរួមកិច្ចប្រជុំត្រីភាគី ស្តីពីការពិនិត្យឡើងវិញលើវឌ្ឍនភាពនៃការអនុវត្តគម្រោង ក្រោមក្របខ័ណ្ឌហិរញ្ញប្បទានពីធនាគារពិភពលោក

ភ្នំពេញ៖ ដោយបានទទួលអនុសាសន៏ពី ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ គម្រោងឆ្លើយតបន្ទាន់នឹងជំងឺកូវីដ ១៩ នៅកម្ពុជា បានដឹកនាំគណៈប្រតិភូក្រសួងសុខាភិបាល អញ្ជើញចូលរួមកិច្ចប្រជុំត្រីភាគី ស្តីពីការពិនិត្យឡើងវិញលើវឌ្ឍនភាពនៃការអនុវត្តគម្រោង ក្រោមក្របខ័ណ្ឌហិរញ្ញប្បទានពីធនាគារពិភពលោក នៅសណ្ឋាគារ សាន់ និង មូន រីវើសាយ រាជធានីភ្នំពេញ នាព្រឹកថ្ងៃទី២៣ ខែតុលា ឆ្នាំ២០២៣។

កិច្ចប្រជុំនេះរៀបចំដោយក្រសួងសេដ្ឋកិច្ច និងហិរញ្ញវត្ថុ ដែលដឹកនាំកិច្ចប្រជុំដោយសហប្រធាន ឯកឧត្តម ប៉ែន ធីរង្គ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោកស្រី Maryam Salim ប្រធានគ្រប់គ្រងធនាគារពិភពលោកប្រចាំប្រទេសកម្ពុជា ដែលមានការចូលរួមថ្នាក់ដឹកនាំគម្រោង ពីក្រសួងសុខាភិបាល ក្រសួងអប់រំ យុវជន និង កីឡា ក្រសួងសាធារណការ និងដឹកជញ្ជូន ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន និងក្រសួងដែនដី នគរូបនីយកម្ម និងសំណង់។

ក្រសួងសុខាភិបាល ក៏បានធ្វើបទបង្ហាញនូវវឌ្ឍនភាពការងារ និងបញ្ហាប្រឈមនានា នៃការអនុវត្តទៅលើគម្រោងចំនួន ០៤ រួមមាន៖ ១) គម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ ២) គម្រោងអាហារូបត្ថម្ភនៅកម្ពុជា ៣) គម្រោងពង្រឹងប្រព័ន្ធអប់រំមុនពេលបម្រើការងារសម្រាប់មន្ត្រីសុខាភិបាល និង៤) គម្រោងឆ្លើយតបន្ទាន់នឹងជំងឺកូវីដ ១៩ នៅកម្ពុជា៕