ឯកឧត្តម គង់ សោភ័ណ្ឌ អញ្ជើញសំណេះសំណាល និងថ្លែងអំណរគុណ អ្នកសង្កេតការណ៍ ស.ស.យ.ក ខេត្តកណ្ដាល
ភ្នំពេញ៖ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្ត និងជាប្រធានសហភាពសហព័ន្ធយុវជនកម្ពុជាខេត្តកណ្តាល នាព្រឹក ថ្ងៃសៅរ៍ ២កើត ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែកញ្ញា ឆ្នាំ២០២៣ បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសំណេះសំណាល និងថ្លែងអំណរគុណ អ្នកសង្កេតការណ៍ ស.ស.យ.ក ខេត្តកណ្ដាល ស្ថិតនៅក្រុងតាខ្មៅ ខេត្តកណ្តាល។
ឯកឧត្តម គង់ សោភ័ណ្ឌ អភិបាលខេត្ត មានប្រសាសន៍ថា ស.ស.យ.ក បានបំពេញតួនាទីភារកិច្ចរបស់ខ្លួន យ៉ាងសំខាន់ ជាពិសេស ការសង្កេតការណ៍នៅក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ នៃរដ្ឋសភា កាលពីថ្ងៃទី២៣ ខែកក្កដា ឆ្នាំ២០២៣ កន្លងមកនេះ។
ឯកឧត្តមអភិបាលខេត្ត បានបញ្ជាក់ថា គុណសម្បត្តិនៃតួនាទីភារកិច្ចរបស់ស.ស.យ.ក នៅក្នុងអំឡុងពេលបោះឆ្នោត រួមមាន៖
-តួនាទីភារកិច្ចជាអ្នកសង្កេតការណ៍ក្នុងថ្ងៃបោះឆ្នោត គឺពិតជាមានសារៈសំខាន់ និងមានតម្លៃជាទីបំផុតនៅក្នុងសង្គម ក្នុងការអនុវត្តលទ្ធិប្រជាធិបតេយ្យ សេរី ពហុបក្ស។
-អ្នកសង្កេតការណ៍ គឺជាសាក្សីនៃការបោះឆ្នោតដោយសេរី ត្រឹមត្រូវ និង យុត្តិធម៌។
-ការងារជាអ្នកសង្កេតការណ៍របស់យុវជន ក៏ជាឱកាស សិក្សារៀនសូត្រ និង អភិវឌ្ឍន៍សមត្ថភាពខ្លួនឱ្យទាន់សម័យសភាពការណ៍ ការវិវត្តន៍នៃសង្គម ប្រជាធិបតេយ្យ។ ពិសេសបានជំរុញពង្រឹងសមត្ថភាពរបស់យុវជន ឱ្យក្លាយ ជាធនធានមនុស្សដ៏មានសក្តានុពលសម្រាប់សង្គមជាតិ។
-ក្នុងនាមជាយុវជន ស.ស.យ.ក ចូលរួមសង្កេតការបោះឆ្នោត គឺទទួលបាន អត្ថប្រយោជន៍នៃការចម្រើនពុទ្ធិ អំពីចំណេះដឹងទូទៅ ពិសេសអំពីនីតិវិធី បទបញ្ជា ក្រមសីលធម៌ នៃការបោះឆ្នោតជ្រើសតាំងតំណាងរាស្ត្រនីតិកាល ទី៧ ឆ្នាំ២០២៣ និងយល់ច្បាស់លាស់ពីតួនាទី ភារកិច្ចរបស់អ្នកសង្កេត ការណ៍ជាតិនៃគណៈកម្មាធិការសហភាពសហព័ន្ធយុវជនកម្ពុជា។
-ក្នុងនាមជាអ្នកសង្កេតការណ៍យុវជន ស.ស.យ.ក ខេត្ត បានចូលរួមលះបង់ ក្នុងនាមជាអ្នកស្ម័គ្រចិត្ត ដើម្បីបង្កើនចំណេះដឹង ទេពកោសល្យ ការច្នៃប្រឌិត ដើម្បីទទួលបានបទពិសោធន៍ល្អៗ សម្រាប់បំរើផលប្រយោជន៍ជូនជាតិ ៕
